Read Iloko 1 Chronicles 5 Bible Online

1 Chronicles 5 - Iloko bible

1 Chronicles 5

¹Dagitoy dagiti kaputotan ni Ruben, ti inauna kadagiti lallaki nga annak ni Jacob. (Gapu ta kinaiddana ti maysa kadagiti assawa ni amana, napukawna dagiti kalinteganna nga inauna, ket naited dagitoy a kalintegan ken ni Jose.

²Ngem ti tribu ti Juda ti nagbalin a kapigsaan, ket isu ti nagtaudan ti mangituray kadagiti amin a tribu.)

³Uppat dagiti lallaki nga annak ni Ruben nga inauna nga anak ni Jacob: Hanoc, Pallu, Hezron ken Carmi.

⁴Dagitoy dagiti agsasaruno a kaputotan manipud ken ni Joel: Semaias, Gog, Simei, Mica, Reayas, Baal ken Beera. Tiniliw ni Tiglat Pileser nga emperador ti Asiria ni Beera a pangulo ti tribu ket intugotna a kas balud.

⁷Iti libro a pakasaritaan ti familia, nailanad dagiti pangulo ti familia iti tribu ni Ruben: Jeyel, Zacarias;

⁸Bela, nga anak ni Azaz ken apoko ni Sema iti kapuonan ni Joel. Nagnaed daytoy a familia idiay Aroer ken iti masakupan manipud amianan agingga idiay Nebo ken Baal Meon.

⁹Adu ti arbanda a baka iti Galaad; iti kasta, sinakupda ti daga agingga iti let-ang iti daya a dumanon iti Karayan Eufrates.

¹⁰Idi tiempo ni Ari Saulo, rinaut ti tribu ti Ruben dagiti Hagarita; pinapatayda ida ket sinakupda ti dagada iti akindaya a paset ti Galaad.

¹¹Nagnaed ti tribu ti Gad idiay Basan iti amianan ti pagnanaedan ti tribu ti Ruben agingga idiay Saleca iti daya.

¹²Idiay Basan, ni Joel ti nangipasdek iti kalatakan a familia ket ni Safam ti nangipasdek iti maikadua a kalatakan. Da Janai ken Safat ti nangipasdek kadagiti dadduma a familia.

¹³Kamkameng ti dadduma a miembro ti tribu dagitoy pito a familia: Micael, Mesullam, Seba, Jorai, Jacan, Zia ken Eber.

¹⁴Kaputotan ida ni Abihail nga anak ni Huri a nagtaud kadagitoy a kapuonan: Abihail, Huri, Jaroa, Galaad, Micael, Jesisai, Jado, Buz.

¹⁵Ni Ahi nga anak ni Abdiel ken apoko ni Guni ti pangulo dagitoy a familia.

¹⁶Nagnaedda iti sakup ti Basan ken Galaad, kadagiti il-ili sadiay, ken iti amin a daga a pagpastoran idiay Saron. (

¹⁷Naurnos dagitoy a pakasaritaan idi tiempo da Ari Jotam iti Juda ken Ari Jeroboam iti Israel.)

¹⁸Adda 44,760 a mannakigubat iti tribu ti Ruben, Gad ken ti Akindaya a Manases. Nasanayda nga agiggem iti kalasag, kampilan ken pana.

¹⁹Ginubatda dagiti tribu ti Hagar nga agnanaed idiay Jetur, Nafis ken Nodab.

²⁰Nagtalekda iti Dios ket nagkararagda kenkuana tapno tulonganna ida. Impangag ti Dios ida ket pinagballigina ida kadagiti tribu ti Hagar ken dagiti kakaduada.

²¹Limapulo ribu a kamelio, 250,000 a karnero ken 2,000 nga asno ti sinamsamda kadagiti kabusorda. Intalawda a kas balud ti 100,000 a mannakigubat.

²²Adu ti pinapatayda kadagiti kabusor agsipud ta pagayatan ti Dios ti pannakigubatda. Nagnaedda iti dayta a lugar agingga iti tiempo ti pannakapagtalaw.

²³Immadu unay dagiti tattao iti Akindaya a Manases. Nagnaedda iti sakup ti Basan agingga iti Baal Hermon, Senir ken Bantay Hermon iti amianan.

²⁴Dagitoy dagiti pangulo ti familia: Efer, Isi, Eliel, Azriel, Jeremias, Hodavia ken Jadiel. Maingelda amin a soldado, ket nalatakda a papangulo dagiti familiada.

²⁵Ngem saan a napudno dagiti tattao iti Dios. Tinallikudanda ti Dios dagiti kapuonanda ket nagdaydayawda kadagiti didiosen dagiti tattao a pinapanaw ti Dios iti dayta a daga.

²⁶Iti kasta, sinugsogan ti Dios ni Pul nga emperador ti Asiria (agnagan pay iti Tiglat Pileser) tapno rautenna ti dagada. Pinagtalawna dagiti tribu ti Ruben, Gad ken ti Akindaya a Manases—ket pinagnaedna ida nga agnanayon idiay Hala, Habor, Hara ken iti asideg ti Karayan Gozan.