Read Iloko 1 Chronicles 9 Bible Online

1 Chronicles 9 - Iloko bible

1 Chronicles 9

¹Nailista iti Libro dagiti Ari ti Israel ti amin nga Israelita segun iti familiada. Naitalaw dagiti tattao ti Juda ket naipanda idiay Babilonia a kas dusa dagiti basolda.

²Kadagiti immuna a nagsubli iti dagada kadagiti siudad, mairaman dagiti Israelita a saan a padi, dagiti papadi, Levita ken dagiti agtartrabaho iti templo.

³Napan nagnaed idiay Jerusalem dagiti tattao a nagtaud kadagiti tribu ti Juda, Benjamin, Efraim ken Manases.

⁴Innem a gasut ket siam a pulo ti familia iti tribu ti Benjamin ti nagnaed idiay Jerusalem. Ni Utai ti pangulo dagiti kaputotan ni Perez nga anak ni Juda. Anak ni Ammihud ni Utai ken apoko ni Omri. Mairaman kadagiti kapuonanna da Imri ken Bani. Ni Asaias ti pangulo dagiti kaputotan ni Sela nga anak ni Juda. Isu ti pangulo ti familiana. Ni Jeuel ti pangulo dagiti kaputotan ni Zera nga anak ni Juda.

⁷Nagnaed idiay Jerusalem dagiti sumaganad a kameng ti tribu ti Benjamin: ni Sallu nga anak ni Mesullam nga anak ni Hodavia nga anak ni Hassenua;

⁸ni Ibnias nga anak ni Jeroham; ni Ela nga anak ni Uzzi ken apoko ni Mikri; ni Mesullam nga anak ni Sefatian nga anak ni Reuel nga anak ni Ibniha.

⁹Adda 956 a familia dagiti Benjaminita nga agnanaed sadiay. Papangulo iti familia dagiti amin a lallaki a nainaganan iti ngato.

¹⁰Nagnaed idiay Jerusalem dagitoy a papadi: Jedayas, Jehoyarib ken Jakin. Ni Azarias nga anak ni Hilkias ti kangatoan nga agturay iti Templo. Kadagiti kaputotanna, mairaman da Mesullam, Zadok, Merayot ken Ahitub. Ni Adaias nga anak ni Jeroham nga iti kapuonanna, mairaman da Pasur ken Malkias. Ni Maasai nga anak ni Adiel nga iti kapuonanna mairaman da Jazera, Mesullam, Mesillemit ken Immer.

¹³Agdagup iti 1,760 dagiti papadi a pangulo dagiti familia. Nalaingda iti amin a kita ti trabaho iti Templo.

¹⁴Nagnaed idiay Jerusalem dagitoy a Levita: ni Semaias nga anak ni Hassub nga iti kapuonanna mairaman da Azrikam ken Hasabias iti kapuonan ni Merari; ni Bakbakkar, Heres ken Galal; ni Mattanias nga anak ni Mica nga iti kapuonanna mairaman da Zikri ken Asaf; ni Abdias nga anak ni Semaias nga iti kapuonanna, mairaman da Galal ken Jedutun; ni Berekias nga anak ni Asa ken apoko ni Elcana. Nagnaed iti masakupan ti ili ti Netofa.

¹⁷Nagnaed idiay Jerusalem dagitoy a guardia iti Templo: Sallum, Akkub, Talmon ken Ahiman. Ni Sallum ti panguloda.

¹⁸Agingga iti dayta a panawen, dagiti kameng ti kapuonanda ti para-bantay iti akindaya a pagserkan a mapan iti Ruangan ti Ari. Isuda idi ti guardia kadagiti ruangan a mapan kadagiti kampo dagiti Levita.

¹⁹Ni Sallum nga anak ni Kore ken apoko ni Ebiasaf, agraman dagiti kakabagianna iti kapuonan ni Kora, ti nadutokan a mangguardia iti pagserkan a mapan iti nasagradoan a Tolda, kas kadagidi kapuonanda idi isuda ti agaywan iti kampo ni Yahweh.

²⁰Adda idi panawen a daydi Dios-ti-alluadna a Finees nga anak ni Eleazar ti nangimaton kadakuada.

²¹Ni Zacarias nga anak ni Meselemia ti maysa kadagiti guardia iti pagserkan a mapan iti nasagradoan a Tolda.

²²Agdagup iti 212 dagiti napili a guardia kadagiti pagserkan ken ruangan. Nailistada segun kadagiti barrio a pagnaedanda. Ni Ari David ken ni Samuel a profeta ti nangdutok idi kadagiti kapuonanda kadagitoy a saad.

²³Isuda ken dagiti kaputotanda ti nagtultuloy a guardia kadagiti ruangan ti Templo.

²⁴Adda uppat a ruangan: maysa ti sumango iti amianan, maysa iti abagatan, maysa iti daya, ken maysa iti laud. Adda pangulo a guardia iti tunggal ruangan.

²⁵Timmultulong kadagitoy a guardia dagiti kakabagianda nga agnaed kadagiti barrio; tunggal grupo, agbantay iti uneg ti pito nga aldaw.

²⁶Levita dagiti uppat a papangulo a guardia ket isuda ti makaammo iti amin iti akemda. Isuda pay ti makaammo iti pannakabantay dagiti kuarto iti Templo ken dagiti abasto a naidulin sadiay.

²⁷Agnanaedda iti asideg ti Templo gapu ta pagrebbenganda a guardiaan ti Templo ken luktan dagiti ruanganna tunggal bigat.

²⁸Dagiti dadduma a Levita ti makaammo kadagiti alikamen a mausar iti panagdaydayaw. Bilangenda dagiti alikamen no mairuarda ket bilangenda manen no maidulinda kalpasan ti pannakausarda.

²⁹Adda met dagiti Levita nga agaywan kadagiti dadduma a nasagradoan nga alikamen, agraman iti arina, arak, lana ti olibo, insenso ken dagiti bangbanglo.

³⁰Ngem akem dagiti papadi a paglalaoken dagiti bangbanglo.

³¹Annong ni Mattitias a Levita nga inauna nga anak ni Sallum iti familia ni Kora ti pannakaluto dagiti tinapay a maidaton.

³²Dagiti nagtaud iti familia ni Kohat ti makaammo iti pannakaisagana ti nasagradoan a tinapay a maipaay iti Templo iti tunggal Aldaw a Panaginana.

³³Dagiti dadduma a familia dagiti Levita ti para-kanta iti Templo. Nagnaed kadagiti patakder ti Templo ti pangulo dagitoy a familia ket awan sabali nga akemda tapno madadaanda no adda pakaayabanda iti aldaw wenno rabii.

³⁴Papangulo iti familia dagiti Levita dagiti nainaganan segun iti kapuonan a nagtaudanda. Isuda dagiti papangulo a nagnaed idiay Jerusalem.

³⁵Binangon ni Jeiel ti siudad ti Gabaon ket nagnaed sadiay. Maaca ti nagan ti asawana.

³⁶Ni Abdon ti inauna nga anakna. Adien ni Abdon da Sur, Kis, Baal, Ner, Nadab,

³⁷Gedor, Ahio, Zacarias ken Miklot

³⁸nga ama ni Simea. Nagnaed dagiti kaputotanda idiay Jerusalem iti asideg dagiti dadduma a familia a kakabagianda.

³⁹Ni Ner ti ama ni Kis nga ama ni Saul. Adda uppat a lallaki nga annak ni Saul, da Jonatan, Malkisua, Abinadab ken Esbaal.

⁴⁰Ni Jonatan ti ama ni Meribbaal nga ama ni Mica.

⁴¹Uppat dagiti lallaki nga annak ni Mica, da Piton, Melek, Tarea ken Ahaz.

⁴²Ni Ahaz ti ama ni Jara. Adda tallo a lallaki nga annak ni Jara, da Alemet, Asmabet ken Zimri. Ni Zimri ti ama ni Mosa.

⁴³Ni Mosa ti ama ni Binea nga ama ni Refaias nga ama ni Eleasa nga ama ni Azel.

⁴⁴Innem a lallaki ti annak ni Azel: Azrikam, Bokeru, Ismael, Searias, Abdias ken Hanan.