Read Iloko 2 Chronicles 11 Bible Online

2 Chronicles 11 - Iloko bible

2 Chronicles 11

¹Idi sumangpet ni Ari Rehoboam idiay Jerusalem, inummongna ti 180,000 a napili a mannakigubat manipud kadagiti tribu ti Benjamin ken Juda. Panggepna ti makigubat tapno maisubli ti panangiturayna kadagiti tribu ti amianan nga Israel.

²Ngem imbaon ni Yahweh ni profeta Semaias

³tapno ipakaammona ken ni Ari Rehoboam ken kadagiti amin a tattao kadagiti tribu ti Juda ken Benjamin daytoy a mensahe:

⁴“Diyo rauten dagiti padayo nga Israelita. Agawidkay aminen ta pagayatak ti napasamak.” Tinungpalda ti bilin ni Yahweh ket dida napan ginubat ni Jeroboam.

⁵Nagtalinaed ni Rehoboam idiay Jerusalem ket pinasarikedkedanna dagitoy a siudad ti Juda ken Benjamin:

⁶Betlehem, Etam, Tekoa,

⁷Bet-zur, Soco, Adullam,

⁸Gat, Maresa, Zif,

⁹Adoraim, Lakis, Azeka,

¹⁰Zora, Aijalon ken Hebron.

¹¹Pinalagdana dagiti sarikedked ket nangdutok iti pangulo dagiti mannakigubat iti tunggal siudad sa nangikabil kadagiti abasto a taraon, lana ti olibo ken arak,

¹²agraman dagiti kalasag ken gayang. Kastoy ti inaramidna a namagtalinaed iti Juda ken Benjamin iti babaen ti turayna.

¹³Pimmanaw dagiti papadi ken Levita iti amin a sakup ti Israel, ket napanda nagkamang ken ni Rehoboam idiay Juda.

¹⁴Binaybay-an dagiti Levita dagiti pagpastoranda ken dagiti dadduma a dagdagada ket napanda nagnaed idiay Juda ken Jerusalem, gapu ta saan a pinalubosan ida ni Jeroboam nga ari ti Israel ken dagiti simmukat kenkuana nga agserbi a kas papadi ni Yahweh.

¹⁵Nangdutok ni Jeroboam kadagiti bukodna a papadi nga agserbi kadagiti disso a pagdaydayawan dagiti pagano ken agdaydayaw kadagiti sinan-kalding ken sinan-baka a pinasukogna.

¹⁶Simmurot met kadakuada dagiti tattao iti amin a tribu ti Israel a napudno nga agserbi ken ni Yahweh a Dios ti Israel. Dimtengda idiay Jerusalem tapno makaidatagda kadagiti daton a mapuoran nga agpaay ken ni Yahweh a Dios dagidi kapuonanda.

¹⁷Daytoy ti nangpapigsa iti pagarian ti Juda ket tallo a tawen a tinarabayda ni Rehoboam nga anak ni Solomon. Nagbiagda a kas iti panagbiagda idi panawen da Ari David ken Ari Solomon.

¹⁸Inasawa ni Rehoboam ni Mahalat nga anak ni Jerimot nga anak ni David. Ni Abigail ti inana nga anak ni Eliab ken apoko ni Jesse.

¹⁹Tallo ti annakda a lallaki: da Jeus, Semarias ken Zaham.

²⁰Iti saan a mabayag, inasawa ni Rehoboam ni Maaca nga anak ni Absalom ket uppat ti annakda: da Abias, Attai, Ziza ken Selomit.

²¹Sangapulo ket walo amin dagiti assawa ni Rehoboam ken 60 pay ti kamalalana. Duapulo ket walo dagiti lallaki nga annakna ken 60 dagiti babbai. Ngem kadagiti amin nga assawana, ni Maaca ti impatpategna unay

²²ngem ni Abias ti impangpangrunana kadagiti annakna ket isu ti pinilina a sumukatto kenkuana nga ari.

²³Impakitana ti kinasiribna idi inikkanna iti annongen dagiti lallaki nga annakna sana inwaras ida kadagiti nasarikedkedan a siudad iti entero a Juda ken Benjamin. Nabuslon ti intedna a kasapulanda ket imbirokanna ida iti adu nga assawa.