Read Iloko 2 Chronicles 14 Bible Online

2 Chronicles 14 - Iloko bible

2 Chronicles 14

¹Natay ni Ari Abias ket naitabon iti tanem dagiti ari iti Siudad ni David. Ni Asa nga anakna ti simmukat kenkuana nga ari ket bayat ti panagturay ni Asa, adda kappia iti pagilian iti las-ud ti sangapulo a tawen.

²Naragsakan ni Yahweh a Diosna ken ni Asa gapu kadagiti nalinteg ken naimbag nga aramidna.

³Inikkatna dagiti altar ken dagiti pagdaydayawan dagiti pagano; rinebbana dagiti bato nga adigi ket tinumbana dagiti simbolo ni Asera a didiosen.

⁴Binilinna dagiti tattao ti Juda nga aramidenda ti pagayatan ni Yahweh a Dios dagidi kapuonanda ken tungpalenda dagiti pannursurona ken dagiti bilinna.

⁵Gapu ta pinukawna dagiti pagdaydayawan dagiti pagano ken dagiti altar a pagidatagan iti insenso iti amin a siudad ti Juda, adda kappia iti pagarian bayat ti panagturayna.

⁶Nangbangon kadagiti sarikedked kadagiti siudad ti Juda bayat ti panawenna. Adu a tawen nga awan ti gubat gapu ta impaayan ni Yahweh iti kappia.

⁷Imbagana kadagiti tattao ti Juda, “Sarikedkedantayo dagiti siudad; agaramidtayo kadagiti bakud, torre, ken ruangan a maserraan ken mabalunetan. Iturayantayo ti daga gapu ta inaramidtayo ti pagayatan ni Yahweh a Diostayo ket sinalaknibannatayo ken inikkannatay iti talged iti aglikmut.” Ngarud, nagbangonda ket rimmang-ayda.

⁸Adda armada ni Ari Asa a buklen ti 300,000 a mannakigubat a taga-Juda a naarmasan kadagiti kalasag ken gayang ken 280,000 a mannakigubat a taga-Benjamin a siaarmas kadagiti kalasag ken pana. Naturedda amin ken napeklanda a mannakigubat.

⁹Adda taga-Etiopia nga agnagan iti Zera a nangraut iti Juda. Aganay a maysa a milion dagiti tattaona ket agdagup iti 300 dagiti luganna a pakigubat. Dimmarupda agingga idiay Maresa.

¹⁰Napan sinaranget ni Asa ida ket nagpuesto dagiti dua nga armada a makigubat iti Tanap ti Zefata iti asideg ti Maresa.

¹¹Nagkararag ni Asa ken ni Yahweh a Diosna: “O Apo, sika laeng ti makatulong iti nakapsut nga armada a sumaranget iti nabileg nga armada. Tulongannakam itan, O Apo a Diosmi, gapu ta agpannuraykami kenka, ket iti naganmo, immaymi sinaranget daytoy dakkel nga armada. O Apo, sika ti Diosmi; awan ti mangnamnama a mangparmek kenka.”

¹²Pinarmek ni Yahweh dagiti taga-Etiopia idi darupen ida ni Asa ken dagiti soldado ti Juda. Nagtatarayda

¹³ket sinunson ida ni Asa ken ti armadana agingga idiay Gerar. Adu unay ti natay kadagiti taga-Etiopia ket saanen a kabaelan ti armada ti aguummong manen tapno makigubat. Pinarmek ida ni Yahweh ken ti armadana. Adu ti sinamsam dagiti mannakigubat.

¹⁴Kalpasanna, dinadaelda dagiti siudad iti asideg ti Gerar gapu ta nagbutengda ken ni Yahweh. Nagsamsam ti armada kadagitoy amin a siudad ket adu ti innalada.

¹⁵Rinautda met dagiti kampo ti sumagmamano nga agpaspastor ket intalawda ti adu a karnero ken kamelio. Kalpasanna, nagsublida idiay Jerusalem.