Read Iloko 2 Chronicles 15 Bible Online

2 Chronicles 15 - Iloko bible

2 Chronicles 15

¹Inturayan ti espiritu ti Dios ni Azarias nga anak ni Oded

²ket napan kinasarita ni Azarias ni Ari Asa. Imbagana: “Denggendak, Ari Asa, ken dakayo amin a tattao ti Juda ken Benjamin. Adda kadakayo ti Apo no la ketdi addakayo met kenkuana. No birokenyo ti Apo, ipalubosna a masarakanyo ngem no paglikudanyo, baybay-annakayo.

³Nabayag a tiempo a nagbiag dagiti Israelita nga awanan iti pudpudno a Dios, awan papadi a mangisuro kadakuada, awan ti lintegda.

⁴Ngem no dumteng idi kadakuada ti riribuk, agkamangda iti Apo a Dios ti Israel. Binirokda ti Apo ket nasapulanda.

⁵Kadagidi nga aldaw, napeggad ti agdaliasat ta adda riribuk ken awan urnos iti amin a pagilian.

⁶Nawarawara dagiti pagilian, nagbibinnusorda kasta met dagiti siudad, agsipud ta indissuor kadakuada ti Dios ti nadumaduma a kita ti riribuk ken rigat.

⁷Ngem masapul a papigsaenyo ti pakinakemyo ket dikay maupay. Magunggonaankayto iti aramidyo.”

⁸Naparegta ni Asa idi mangngegna ti padto ni Azarias nga anak ni Oded. Pinaikkatna amin a makarimon nga imahen iti Juda ken Benjamin ken kadagiti siudad a sinakupna iti katurturodan ti Efraim. Tinarimaanna pay ti altar ni Yahweh nga adda iti paraangan ti Templo.

⁹Adu a tattao ti napan ken ni Asa ket nagnaedda iti pagarianna ta nakitada nga adda ni Yahweh kenkuana. Naggapuda idiay Efraim, Manases ken Simeon. Pinaayabanna amin ida agraman dagiti taga-Juda ken Benjamin.

¹⁰Naguummongda idiay Jerusalem iti maikatlo a bulan iti maika-15 a tawen a panagari ni Asa.

¹¹Iti dayta nga aldaw, nangalada kadagiti sinamsamda ket indatonda ken ni Yahweh. Pinuoranda a kas daton ti 700 a baka ken 7,000 a karnero.

¹²Nangaramidda iti tulag ket nagnunumoanda nga agdaydayawda iti amin a puso ken kararuada ken ni Yahweh a Dios dagidi kapuonanda.

¹³Mapapatay ti siasinoman a saan nga agdaydayaw kenkuana, ubing wenno nataengan, lalaki man wenno babai.

¹⁴Iti napigsa a timek, insapatada iti nagan ni Yahweh a dida salungasingen ti tulag ket kalpasanna, nagiikkisda ken nagpuyotda kadagiti trumpeta.

¹⁵Naragsak dagiti amin a tattao ti Juda gapu ta naimpusoan ti pannakitulagda. Pagay-ayatda ti agdaydayaw ken ni Yahweh. Inawatna ida ket inikkanna ida iti kappia iti aglikmutda.

¹⁶Inikkat ni Asa ni apongna a Maaca iti saadna a kas reyna, gapu ta nangaramid iti makarimon nga imahen ni Asera a diosa. Tinuang ni Asa ti imahen, binalsibalsigna sana pinuoran dagiti nasigsigit a pasetna iti Tanap ti Kidron.

¹⁷Uray no saan a dinadael ni Asa ti amin a pagdaydayawan kadagiti nangato a lugar, nagtalinaed a napudno ken ni Yahweh iti unos ti panagbiagna.

¹⁸Inkabilna iti Templo dagiti amin nga alikamen nga indaton ni amana iti Dios, agraman dagiti balitok ken pirak nga alikamen a mismo nga indatonna.

¹⁹Awanen ti gubat agingga iti maika-35 a tawen a panagturayna.