Read Iloko 2 Chronicles 16 Bible Online

2 Chronicles 16 - Iloko bible

2 Chronicles 16

¹Iti maika-36 a tawen a panagturay ni Asa nga ari ti Juda, rinaut ni Baasa nga ari ti Israel ti Juda. Tapno awan ti makastrek wenno makaruar iti Juda, rinugianna a sinarikedkedan ti Rama.

²Isut' gapuna a nangala ni Asa kadagiti pirak ken balitok kadagiti pagiduldulinan iti Templo ken iti bukodna a palasio, ket pinaipanna iti ari ti Siria, ni Ben-hadad, nga agturay idiay Damasco. Kastoy ti pinaibagana kadagiti imbaonna:

³“Isagutko kenka dagitoy pirak ken balitok. Dawatek nga agkaduata a kas iti panagkadua dagidi ammata. Ita, waswasem ti nagtulaganyo ken ni Baasa nga ari ti Israel tapno ipanawna dagiti soldadona iti sakupko.”

⁴Immanamong ni Ben-hadad iti singasing ni Asa. Imbaonna dagiti ofisialesna ken dagiti armadada a mangraut kadagiti siudad ti Israel. Sinakupda ti Ijon, Dan, Abel Bet Maaca ken amin a siudad ti Neftali a nakaidulinan dagiti abasto.

⁵Idi madamag ni Ari Baasa ti mapaspasamak, insardengna ti panangsarikedkedna iti Rama ket dina intuloyen ti trabaho.

⁶Kalpasanna, nangummong ni Ari Asa kadagiti tattao manipud iti amin a paset ti Juda ket pinabunagna dagiti bato ken tarikayo nga us-usaren ni Baasa iti pannakasarikedked ti Rama. Inusarna dagitoy a pinangsarikedked kadagiti siudad ti Geba ken Mizpa.

⁷Iti dayta a tiempo, napan ni profeta Hanani ken ni Ari Asa ket kinunana, “Agsipud ta nagtalekka iti ari ti Siria a saan ketdi nga iti Apo a Diosmo, linibasannaka ti armada ti ari ti Israel.

⁸Saan aya nga adu dagiti mannakigubat nga Etiopiano ken Libiano? Saan aya nga adu met dagiti luganda a pakigubat ken nagkabalio a mannakigubat? Ngem gapu ta nagtalekka idi iti Apo, inyawatna ida kenka ket pinarmekmo ida.

⁹Sikikita ti Apo iti entero a daga tapno pakirdenna dagiti napudno kenkuana. Minamaag ti inaramidmo ket daytoy ti gapuna a manipud ita, kanayonton ti pannakigubatmo.”

¹⁰Kasta unay ti pungtot ni Asa iti profeta ket pinaibaludna. Daytoy met la a tiempo nga inrugi ni Asa ti panangparigatna iti sumagmamano kadagiti tattao.

¹¹Nailanad iti Pakasaritaan dagiti Ari ti Juda ken Israel dagiti amin a napasamak iti panagturay ni Asa, manipud panangrugina agingga iti panaggibusna.

¹²Iti maika-39 a tawen a panagturay ni Asa nga ari, adda nakaro a sakit a kimpet kadagiti sakana ket saanen a makapagna. Nagpatulong kadagiti mangngagas a saan ketdi ken ni Yahweh.

¹³Kalpasan ti dua a tawen, natay

¹⁴ket naitabon iti tanem iti kabatoan nga insaganana nga agpaay kenkuana iti Siudad ni David. Bangbanglo ken lana ti inaramatda iti pannakaisagana ti bangkayna a maitanem ket nagpasgedda iti dakkel nga apuy a kas panangipakitada iti panagladingitda iti ipapatayna.