Read Iloko 2 Chronicles 17 Bible Online

2 Chronicles 17 - Iloko bible

2 Chronicles 17

¹Sinuktan ni Jehosafat ni Asa nga amana a kas ari ket pinapigsana ti pagarianna a sumaranget iti Israel.

²Nangipuesto kadagiti soldado kadagiti nasarikedkedan a siudad ti Juda, ken nangipasdek kadagiti kampo ti militar kadagiti away ken siudad a sinakup ni Asa iti pagilian ti Efraim.

³Binendisionan ni Yahweh ni Jehosafat, gapu ta sinurotna ti tugot ni amana kadagidi immuna a tawen a panagturay ti amana. Saan a nagdaydayaw ken ni didiosen a Baal.

⁴Nagserbi iti Dios ni amana, tinungpalna dagiti bilin ti Dios, ket dina tinulad ti aramid dagiti ari ti Israel.

⁵Gapu ken ni Yahweh, nagbalin a natalged ti pagarian ti Juda iti panangituray ni Jehosafat. Nagited dagiti amin a tattao kadagiti sagutda kenkuana isut' gapuna a bimmaknang ken nagbalin a mararaem unay.

⁶Imbilangna a dayaw ti panagserbina ken ni Yahweh ket dinadaelna amin a pagdaydayawan kadagiti nangato a lugar ken dagiti simbolo ni Asera a diosa iti Juda.

⁷Iti maikatlo a tawen a panagturayna, imbaonna dagitoy sumaganad nga ofisiales tapno isuroda ti Linteg ni Yahweh kadagiti siudad ti Juda: Ben-hail, Obadias, Zacarias, Netanel ken Micaias. Siam a Levita ti kimmuyog kadakuada: Semaias, Netanias, Zebadias, Asael, Semiramot, Jehonatan, Adoniha, Tobijas, ken Tobadonijas, agraman dua a papadi, da Elisama ken Jehoram. Intugotda ti libro ti Linteg ni Yahweh iti panangsursorda iti amin nga ili ti Juda ket insursuroda dagiti tattao.

¹⁰Gapu ken ni Yahweh, nagbuteng dagiti amin a kabangibang a pagarian a manggubat ken ni Jehosafat.

¹¹Nangted ti sumagmamano a Filisteo ken ni Jehosafat iti adu a pirak ken dadduma a sagut; inikkan ti sumagmamano nga Arabe iti 7,700 a karnero ken 7,700 a kalding.

¹²Ngarud, bimmileg a bimmileg ni Jehosafat. Iti entero a Juda, nangbangon kadagiti sarikedked ken siudad

¹³a pakaidulinan ti adu nga abasto. Idiay Jerusalem, nangipuesto kadagiti mamaingel nga ofisiales,

¹⁴segun ti familiada. Ni Adna ti pangulo dagiti soldado a nagtaud kadagiti kapuonan ti Juda ket adda 300,000 a mannakigubat iti babaenna.

¹⁵Sumaruno kenkuana ni Jehohanan iti saad ket adda 280,000 a mannakigubat iti babaenna;

¹⁶maikatlo ni Amasias nga anak ni Zikri ket adda 200,000 a soldadona. (Nagboluntario idi ni Amasias nga agserbi ken ni Yahweh.)

¹⁷Ni Eliada ti pangulo dagiti soldado a nagtaud kadagiti familia ti Benjamin. Maingel a soldado ni Eliada ket ipanguloanna ti 200,000 a tattao a nagtagikalasag ken nagtagipana.

¹⁸Ni Jehozabad ti sumaruno kenkuana iti saad; ipanguloanna ti 180,000 a nasayaat ti pannakaarmasna a soldado.

¹⁹Nagserbi dagitoy a tattao iti ari idiay Jerusalem malaksid la kadagiti mannakigubat nga impuestona kadagiti nasarikedkedan a siudad ti Juda.