Read Iloko 2 Chronicles 18 Bible Online

2 Chronicles 18 - Iloko bible

2 Chronicles 18

¹Idi bimmaknang ken agdindinamag ni Ari Jehosafat, inyasawana ti maysa a kameng ti familiana iti kameng ti familia ni Ahab nga ari ti Israel.

²Kalpasan ti sumagmamano a tawen, napanna sinarungkaran ni Ahab idiay Samaria. Sinangaili ni Ahab ni Jehosafat ken dagiti kinakuyogna, ket adu a karnero ken baka ti pinartina iti padaya nga inangayna para kadakuada. Pinadasna a guyugoyen ni Jehosafat a makikadua kenkuana a mangraut iti siudad ti Ramot idiay Galaad.

³Kinunana, “Kuyogennak man a mangraut iti Ramot.” Insungbat ni Jehosafat, “Madadaanak no nakasaganakan, kasta met ti armadak. Kumuyogkaminto kadakayo.”

⁴Sana innayon, “Ngem umuna pay a makiumanka iti Apo maipapan iti daytoy.”

⁵Pinaayaban ni Ahab dagiti profeta. Dandani 400 kadakuada ti simmangpet ket sinaludsodna, “Innak kadi rauten ti Ramot?” “Inka rauten,” insungbatda. “Pagballigiennakanto ti Dios.”

⁶Ngem sinaludsod ni Jehosafat, “Awan kadin sabali a profeta a mabalintay a pakiumanan iti Apo?”

⁷“Adda pay maysa,” insungbat ni Ahab. “Isu ni Micaias nga anak ni Imla. Ngem kagurgurak dayta a tao gapu ta awan a pulos ipadtona a pagimbagak.” “Apo Ari,” insungbat ni Jehosafat, “dimo kunkuna ti kasta.”

⁸Inayaban ngarud ni Ari Ahab ti maysa kadagiti ofisiales ti palasio ket imbilinna kenkuana a dagdagusenna a mapan alaen ni Micaias.

⁹Adda dagiti dua nga ari iti pagirikan iti ruar ti ruangan ti Samaria. Agtutugawda kadagiti tronoda ken sikakawesda iti pagan-anayda nga ari. Iti sangoananda, agipadpadto dagiti amin a profeta.

¹⁰Maysa kadagiti profeta, ni Zedekias nga anak ni Kenaana ti nagaramid kadagiti sinan-sara a landok ket kinunana ken ni Ahab, “Kastoy ti kuna ti Apo, ‘Dagitoyto ti aramatem a pakigubat kadagiti taga-Siria agingga a maparmekmo ida.’”

¹¹Kasta met ti imbaga dagiti dadduma a profeta, “Rautem ti Ramot ket agballigikanto. Pagballigiennaka ti Apo.”

¹²Kabayatanna, kinuna ti naibaon a mangala ken ni Micaias, “Sangsangkamaysa dagiti profeta nga agkuna nga agballigi ti ari. Masapul a kasta met ti sawem.”

¹³Ngem insungbat ni Micaias, “Isapatak iti nagan ti sibibiag a Dios a no ania ti sawen ti Diosko, isu ti sawek!”

¹⁴Idi dumatag ti profeta iti ari, sinaludsod kenkuana ti ari, “Micaias, rumbeng kadi wenno saan a rautenmi ken ni Ari Jehosafat ti Ramot?” “Inka rauten,” insungbat ni Micaias. “Awan duadua nga agballigika. Pagballigiennakanto ti Apo.”

¹⁵Ngem kinuna ni Ahab, “Namin-anon nga imbagak kenka a ti laeng pudno ti sawem kaniak iti nagan ti Apo?”

¹⁶Insungbat ni Micaias, “Makitak ti armada ti Israel a nawarawara kadagiti katurturodan. Kasda la karnero nga awan ti pastorda. Ket kinuna ti Apo, ‘Awan ti pangulo dagitoy a tattao; pagawidem nga awan ti pakaan-anoanda.’”

¹⁷Kinuna ni Ahab ken ni Jehosafat, “Kitaem man no di pudno ti imbagak kenka nga awan ti ipadto ni Micaias a naimbag maipapan kaniak; pasig a dakes!”

¹⁸Intuloy ni Micaias: “Ita, denggem ti kuna ti Apo. Nakitak ti Apo nga agtugtugaw iti tronona sadi langit; agtatakder dagiti anghelesna iti abayna.

¹⁹Sinaludsod ti Apo, ‘Siasino kadakayo ti mangallilaw ken ni Ahab tapno mapan idiay Ramot ket matay sadiay?’ Nagduduma ti sao dagiti angheles.

²⁰Idi agangay, adda maysa nga espiritu a nagpasango, inasitganna ti Apo ket kinunana, ‘Siak ti mangallilaw kenkuana!’ ‘Kasano?’ sinaludsod ti Apo.

²¹Insungbat ti espiritu, ‘Innak kadagiti profeta ni Ahab ket pagulbodek amin ida.’ Kinuna ti Apo, ‘Inka ngaruden. Agballigikanto a mangallilaw kenkuana.’”

²²Ket inggibus ni Micaias: “Daytoy ti naaramid. Pinagulbod ti Apo dagitoy a profetam. Mismo a ti Apo ti nangituyang iti daytoy a pannakadidigram!”

²³Inasitgan ni profeta Zedekias ni Micaias sana tinungpa ket sinaludsodna, “Kaano pay ti panangpanaw kaniak ti espiritu ti Apo ket immaynaka kinasao?”

²⁴“Maammoamto inton inka aglemmeng iti maysa nga akin-uneg a kuarto,” insungbat ni Micaias.

²⁵Kalpasanna, imbilin ni Ari Ahab iti maysa kadagiti ofisialesna, “Tiliwem ni Micaias ket idatagmo iti mangituray iti siudad, ni Amon, ken ni Prinsipe Joas.

²⁶Ibagam kadakuada nga ipisokda iti pagbaludan ket danum ken tinapay laeng ti itedda kenkuana agingga nga agsubliak a sikakaradkad.”

²⁷“No agsublika nga awan dakes a mapasamakmo,” kinuna ni Micaias, “dayta ti pakakitaan a saan a nagsao ti Apo kaniak!” Ket innayonna, “Dakay amin, laglagipenyo ti imbagak.”

²⁸Nagkuyog ni Ahab nga ari ti Israel ken ni Jehosafat nga ari ti Juda a napan nangraut iti Ramot idiay Galaad.

²⁹Kinuna ni Ahab ken ni Jehosafat, “Manglimlimoak a makigubat ngem agkaweska a kas ari.” Nanglimlimo ngarud ti ari ti Israel ket napan iti paggugubatan.

³⁰Nabilinen ti ari ti Siria dagiti pangulo dagiti lugan a pakigubat a ti laeng ari ti Israel ti darupenda.

³¹Ngarud, idi makitada ni Ari Jehosafat, impagarupda amin nga isu ti ari ti Israel ket nagmaymaysada a nangdarup kenkuana. Ngem nagpukkaw ni Jehosafat ket inispal ni Yahweh a Dios idi yadayona kadagiti mannakigubat a nangdarup kenkuana.

³²Idi makita dagiti pangulo dagiti lugan a pakigubat a saan nga isu ti ari ti Israel, insardengda ti panangkamatda kenkuana.

³³Ngem adda mannakigubat ti Siria a nangibiat iti panana ket naipaspasarak a napuntaan ti nagsaipan ti kalasag ni Ari Ahab. “Nasugatanak!” impukkaw ni Ari Ahab iti mangiturturong iti luganna a pakigubat ket binilinna a pumanawda iti paggugubatan.

³⁴Bayat ti gubat, nakasanggir latta ni Ari Ahab iti luganna a pakigubat a sumangsango kadagiti taga-Siria. Natay idi lumnek ti init.