Read Iloko 2 Chronicles 19 Bible Online

2 Chronicles 19 - Iloko bible

2 Chronicles 19

¹Nagawid ni Jehosafat nga ari ti Juda iti palasiona idiay Jerusalem nga awan ti nakaan-anoanna.

²Adda profeta, ni Jehu nga anak ni Hanani, a nangsabat iti ari ket kinunana kenkuana, “Ipagarupmo aya a nasayaat ti tumulong kadagiti managdakdakes ket ayatem dagiti gumurgura iti Apo? Iti kasta nga inaramidmo, pinagpungtotmo ti Apo.

³Ngem uray no kasta, adda naimbag nga aramidmo. Dinadaelmo amin a simbolo ni Asera a diosa a pagdaydayawan dagiti tattao ket inkagumaam a tungpalen ti pagayatan ti Dios.”

⁴Uray no nagnaed ni Jehosafat idiay Jerusalem, masansan nga agdaliasat ket sarungkaranna dagiti tattao, manipud Beerseba iti abagatan agingga iti igid ti katurturodan ti Efraim iti amianan tapno pagsublienna ida ken ni Yahweh a Dios dagidi kapuonanda.

⁵Nangdutok kadagiti ukom iti tunggal nasarikedkedan a siudad ti Juda

⁶ket binilinna ida: “Agannadkay iti panangukomyo. Saan a tao ti pagtaudan ti turayyo a mangukom no di ket ti Apo nga adda kadakayo no yetnagyo ti sentensia.

⁷Agbutengkay iti Apo ket agannadkayo kadagiti aramidyo gapu ta saan nga ipalubos ti Apo a Diostayo ti panagsaur, panangidumduma wenno panangawat iti pasuksok.”

⁸Idiay Jerusalem, nangdutok ni Jehosafat kadagiti Levita, papadi ken sumagmamano a mabigbigbig nga umili nga agtugaw a kas ukom a mangrisut kadagiti kaso a mainaig iti panagsalungasing iti Linteg ni Yahweh wenno kadagiti riri dagiti umili ti siudad maipapan iti linteg.

⁹Imbilinna kadakuada: “Aramidenyo dagiti pagrebbenganyo a sibubuteng iti Apo ket napudnokayo nga agtungpal kenkuana iti amin nga aramidyo.

¹⁰No adda kailianyo iti aniaman a siudad a mangidatag kadakayo iti kaso, pammapatay man wenno panagsalungasing iti linteg wenno bilin, masapul a bagbagaanyo ida a naimbag kadagiti annongenda bayat ti pannakausig ti kaso tapno saanda nga agbasol iti Apo. No saan a kasta ti aramidenyo, agdissuorto kadakayo nga agkakailian ti pungtot ti Apo. Ngem no aramidenyo ti pagrebbenganyo, dikay agbasol.

¹¹Ni Amarias a Nangato a Padi ti mangibanag kadagiti amin a kaso maipapan iti relihion. Ni met Zebadias nga anak ni Ismael, ti gobernador ti Juda, ti masurot kadagiti amin a kaso maipapan iti sibil. Dagiti Levita ti mangipatungpal kadagiti pangngeddeng ti pangukoman. Bumilegkayo ket tungpalenyo dagitoy a bilin ket sapay koma ta adda ti Apo kadagiti agaramid iti naimbag.”