Read Iloko 2 Chronicles 2 Bible Online

2 Chronicles 2 - Iloko bible

2 Chronicles 2

¹Inkeddeng ni Solomon ti mangbangon iti templo a pagdaydayawan ken ni Yahweh ken iti palasio a pagyananna.

²Nangikabil iti 70,000 a lallaki a para-bunag kadagiti materiales ken 80,000 a para-tikap iti bato iti katurturodan. Agdagup iti 3,600 a lallaki ti mangimaton iti trabaho.

³Nangipatulod ni Solomon iti mensahe ken ni Hiram nga ari ti Tiro. Kinunana: “Patulodannak kadagiti kayo a sedro kas iti inaramidmo idi binangon ni Ari David nga amak ti palasiona.

⁴Ngamin, mangipatakderak iti templo a kas pammadayaw iti Apo a Diosko. Maikonsagrar daytoy a pagpuoran iti nabanglo nga insenso iti imatangna. Sadiayto met ti kanayon a pangidatonanmi kenkuana iti nasagradoan a tinapay ken pagpuoranmi kadagiti daton iti tunggal bigat ken rabii, iti tunggal Aldaw a Panaginana, iti tunggal Fiesta ti Lutuad ken kadagiti dadduma a nasantoan nga aldaw a pagdaydayaw iti Apo a Diosmi, kas naibilin a maannurot iti agnanayon iti Israel.

⁵Dakkel a templo ti rantak a bangonen, ta natantan-ok ti Diosmi ngem dagiti amin a didiosen.

⁶Ngem iti kinapudnona, awan ti makabalin a mangbangon iti templo nga agpaay iti Dios, ta uray ti nalawa a langit, saan nga umdas a manglaon kenkuana. Kasano ngarud a makabangonak iti templo a saan laeng a pagpuoran iti insenso a maipaay iti Dios?

⁷No mabalin, mangibaonka iti tao a nalaing nga agkitikit, agpanday iti balitok, pirak, gambang, landok, ken eksperto iti lupot nga asul, purpura ken nalabaga. Kaduananto dagiti nalaing nga agtrabaho a taga-Juda ken taga-Jerusalem a pinili daydi David nga amak.

⁸Ammok a nalaing nga agpukan dagiti tattaom. Ipatulodannak ngarud kadagiti kayo a sedro, saleng ken sandalo nga aggapu idiay Libano. Sisasaganaak a mangibaon kadagiti tattaok tapno tumulongda kadagiti tattaom

⁹a mangisagana iti adu a kayo. Ngamin, dakkel ken nadaeg daytoy a templo a rantak a bangonen.

¹⁰Kas abasto dagiti tattaom, mangipatulodak kenka iti 100,000 a salup a trigo, 100,000 a salup a sebada, 110,000 a galon nga arak ken 110,000 a galon a lana ti olibo.”

¹¹Kastoy ti insungbat ni Hiram nga ari ti Tiro iti suratna ken ni Solomon: “Gapu ta ay-ayaten ti Apo dagiti tattaona, insaadnaka nga arida.

¹²Madaydayaw koma ti Apo a Dios ti Israel a Namarsua iti langit ken iti daga! Inikkanna ni Ari David iti masirib nga anak, mannakaawat ken nalaing, ket ita, rantana ti mangbangon iti templo nga agpaay iti Apo ken mangbangon iti palasio a pagyananna.

¹³Ita, ibaonko nga umay kenka ti maysa a tao a nalaing iti aniaman a kita ti trabaho. Isu ni Huramabi a

¹⁴nagtaud iti tribu ti Dan ti inana. Taga-Tiro ti amana. Nalaing nga agpanday iti balitok, pirak, bronse ken landok, ket batido met kadagiti aramid iti bato ken kayo. Batido met iti trabaho a mainaig iti lupot nga asul, purpura ken nalabaga a lupot ken nafino a linen. Nalaing pay nga agkitikit ket matuladna ti aniaman a maipasakar kenkuana. Kaduananto dagiti tattaom ken dagiti pinagtrabaho daydi Ari David nga amam.

¹⁵“Ipatulodmo ngaruden dagiti trigo, sebada, lana ti olibo ken arak nga inkarim nga ited,

¹⁶ta pukanenmin iti kabakiran ti Libano ti amin a sedro a masapulmo. Aramidenminto ida a balsa a maipaanud iti taaw agingga idiay Joppe a pakabunaganda a maipan idiay Jerusalem.”

¹⁷Pinabilang ni Ari Solomon dagiti amin a ganggannaet nga agnanaed iti Israel, kas iti inaramid daydi amana a David. Natakuatanna nga agdagupda iti 153,600.

¹⁸Nangdutok iti 70,000 kadakuada a para-bunag kadagiti materiales, 80,000 a mapan agtikap iti bato iti kabambantayan ken 3,600 a mangimaton iti trabaho.