Read Iloko 2 Chronicles 21 Bible Online

2 Chronicles 21 - Iloko bible

2 Chronicles 21

¹Natay ni Jehosafat. Naitabon iti tanem dagiti ar-ari iti Siudad ni David, ket ni Jehoram nga anakna ti simmukat kenkuana nga ari.

²Innem ti lallaki a kakabsat ni Jehoram, da Azarias, Jehiel, Zacarias, Azariahu, Micael ken Sefatias. Annak amin ida ni Jehosafat nga ari ti Juda.

³Adu ti balitok, pirak ken dadduma nga agkakapateg a sanikua nga inted ti amada kadakuada. Naikkan ti tunggal maysa kadakuada iti aywanan a nasarikedkedan a siudad ti Juda. Ngem gapu ta ni Jehoram ti inauna, isu ti pinilina a sumukat kenkuana.

⁴Idi natalgeden ti panagturay ni Jehoram iti pagarian, pinapapatayna dagiti amin a kakabsatna agraman sumagmamano nga ofisiales nga Israelita.

⁵Agtawen ni Jehoram iti 32 idi mangrugi nga agari, ket walo a tawen a nagturay idiay Jerusalem.

⁶Tinuladna dagiti dakes nga aramid ni Ari Ahab ken dagiti dadduma nga ari ti Israel, agsipud ta inasawana ti maysa kadagiti annak ni Ahab. Nagbasol ken ni Yahweh,

⁷ngem saan a kinayat a dadaelen ni Yahweh ti kaputotan ni David, agsipud ta adda tulagda ken ni David ket inkarina nga agtultuloy nga agturay dagiti kaputotanna.

⁸Bayat ti panagturay ni Jehoram, immalsa ti Edom a maibusor iti Juda ket nagbalin a siwawaya a pagilian.

⁹Iti kasta, nagrubbuat ni Jehoram ken dagiti ofisialesna agraman dagiti lugan a pakigubat tapno rautenda ti Edom. Sadiay, linakub ida dagiti armada ti Edom, ngem iti rabii naipamuspusanda ti panaglibasda.

¹⁰Manipud idin, naisinan ti Edom iti Juda. Iti dayta met la a tiempo, immalsa met ti siudad ti Libna gapu ta tinallikudan ni Jehoram ni Yahweh a Dios dagiti kapuonanna.

¹¹Nangbangon pay kadagiti lugar a pagdaydayawan dagiti pagano kadagiti nangato a disso ti Juda, ket insungsongna dagiti tattao ti Juda ken Jerusalem nga agbasol ken ni Yahweh.

¹²Nagsurat ni profeta Elias ken ni Jehoram. Kastoy ti nailanad iti surat: “Ukomennaka ti Apo a Dios ni kapuonam a David, agsipud ta dimo tinulad ti panagbiag ni amam a Jehosafat wenno ti pagwadan ni apongmo nga Ari Asa.

¹³Sinurotmo ketdi ti aramid dagiti ari ti Israel ket insungsongmo dagiti tattao ti Juda ken Jerusalem nga agaramid iti dakes, kas iti panangisungsong ni Ahab ken dagiti simmaruno kenkuana iti Israel tapno agbiagda a saan a napudno iti Dios. Pinapataymo pay dagiti lallaki a kakabsatmo a naim-imbag ngem sika.

¹⁴Gapu kadagitoy, nakaronto ti panangdusa ti Apo kadagiti tattaom, annakmo ken assawam ket dadaelennanto amin dagiti sanikuam.

¹⁵Kaptento ti nakaro a sakit dagiti bagismo, ket kumaronto a kumaro iti panaglabas dagiti aldaw.”

¹⁶Adda dagiti Filisteo ken Arabo iti asideg ti pagnanaedan dagiti taga-Etiopia iti igid ti baybay. Imbaon ida ni Yahweh a manggubat ken ni Jehoram.

¹⁷Rinautda ti Juda, nagsamsamda iti palasio, ket impanawda a kas balud dagiti amin nga assawa ken annak ti ari malaksid ni Ahazias nga inaudi nga anakna.

¹⁸Kalpasan amin dagitoy, nangyeg ni Yahweh iti naut-ot a sakit a kimpet kadagiti bagbagis ti ari.

¹⁹Dandani dua a tawen a kimmaro a kimmaro ti sakitna agingga a natay ti ari nga agsagsagaba. Saan a nagpasged dagiti iturayanna iti apuy a pangdung-awda kenkuana a kas iti inar-aramidda kadagiti kapuonanna.

²⁰Agtawen ni Jehoram iti 32 idi maisaad nga ari ket walo a tawen a nagturay idiay Jerusalem. Awan ti limdaang iti ipapatayna. Intabonda iti Siudad ni David, ngem saan nga iti tanem dagiti ar-ari.