Read Iloko 2 Chronicles 26 Bible Online

2 Chronicles 26 - Iloko bible

2 Chronicles 26

¹Pinili dagiti amin a tattao ti Juda ni Uzzias nga anak ni Amazias a mangsukat iti amana nga ari. Sangapulo ket innem ti tawen ni Uzzias. (

²Kalpasan ti ipapatay ni Amazias, sinakup manen ni Uzzias ti Elat ket tinarimaanna ti siudad.)

³Agtawen iti 16 ni Uzzias idi maisaad nga ari ket nagturay idiay Jerusalem iti 52 a tawen. Ni Jecolia a taga-Jerusalem ti inana.

⁴Kas iti amana, naimbag ti inar-aramidna iti imatang ni Yahweh.

⁵Ni Zacarias ti mamalbalakad kenkuana maipapan iti relihion. Iti unos ti panagbiag ni Zacarias, napudno ni Uzzias a nagserbi ken ni Yahweh ket binendisionan ti Dios.

⁶Ginubat ni Uzzias dagiti Filisteo. Rinebbana dagiti bakud dagiti siudad ti Gat, Jamnia ken Asdod; nangbangon kadagiti nasarikedkedan a siudad iti asideg ti Asdod ken kadagiti dadduma a lugar idiay Filistia.

⁷Tinulongan ti Dios iti panangparmekna kadagiti Filisteo, kadagiti Arabo nga agnanaed iti Gurbaal ken kadagiti Meunita.

⁸Nagbuis dagiti Ammonita ken ni Uzzias. Bimmileg ket nagdindinamag uray pay idiay Egipto.

⁹Tapno nalagda dagiti sarikedked ti Jerusalem, nangbangon ni Uzzias kadagiti torre a pagwanawanan iti Ruangan ti Suli, iti Ruangan ti Tanap ken iti pagsikkoan ti bakud.

¹⁰Nagbangon pay kadagiti nasarikedkedan a pagwanawanan iti tay-ak ket nagkali iti adu a bubon gapu ta dadakkel ti pangen ti bakana iti akinlaud nga arisadsad dagiti turod ken kadagiti tanap. Gapu ta magustoanna ti panagtalon, indagadagna kadagiti tattao ti panagmulada iti ubas ken panagbangkagda iti katurturodan ken iti nadam-eg a daga.

¹¹Dakkel ti armadana a sisasagana a makigubat. Nabingbingay daytoy iti adu a bunggoy segun ti listaan nga adda kada Jehiel ken Maaseyas a sekretariona. Ni Hananias a maysa kadagiti ofisiales ti ari ti mangimaton iti armadana.

¹²Agdagup iti 2,600 dagiti ofisiales iti armada.

¹³Adda 307,500 a soldado iti babaenda a nalaing a makigubat kadagiti kabusor ti ari.

¹⁴Ni Uzzias ti nangted kadagiti masapsapul ti armada—kalasag, pika, helmet, kabal, bai ken pana, ken kadagiti bato a pagpallatibong.

¹⁵Sadiay Jerusalem, nagaramid dagiti para-partuatna kadagiti sarapa dagiti para-pana ken dagiti para-pallatibong nga adda kadagiti torre ken sulsuli ti bakud ti siudad. Nagdinamag iti amin a lugar ket kasta unay ti bilegna gapu kadagiti tulong a naited kenkuana.

¹⁶Ngem idi nagbalin a nabileg ni Ari Uzzias, timmangsit ket daytoy ti nakaigapuan ti pannakarpuogna. Binusorna ni Yahweh a Diosna; simrek ngamin iti Templo tapno agpuor iti insenso iti altar ti insenso.

¹⁷Simmurot ni Azarias a kaduana ti 80 a napipigsa ken natutured a papadi

¹⁸tapno lapdanda iti aramidenna. Kinunada, “Uzzias! Awan ti kalintegam nga agpuor iti insenso iti Apo. Dagiti laeng papadi a nagtaud ken ni Aaron ti nakonsagrar a mangaramid iti daytoy. Panawam daytoy nasantoan a lugar. Napaguram ti Apo a Dios ket dinakanto padayawan.”

¹⁹Sitatakder ni Uzzias iti Templo iti abay ti altar a pagpuoran iti insenso ket siiiggem iti insensario. Nakapungtot kadagiti papadi ket dagus nga adda nagbettak a kukutel iti mugingna.

²⁰Idi kitaen ni Azarias ken dagiti kaduana a papadi ti ari ket naimatangda ti kukutel iti mugingna, dinagdagusda a pinapanaw iti Templo. Nagdardaras a rimmuar ti ari gapu ta dinusa ni Yahweh.

²¹Manipud idin agingga iti ipapatay ni Ari Uzzias, saan a nadalus iti imatang ti linteg gapu iti sakitna. Saanen a nakastrek iti Templo. Nagnaed iti bukodna a balay. Naikkat kenkuana dagiti pagrebbenganna a kas ari ket ni Jotam nga anakna ti nangituray iti pagilian.

²²Insurat ni profeta Isaias nga anak ni Amoz dagiti dadduma a banag nga inaramid ni Ari Uzzias bayat ti panagturayna.

²³Natay ni Uzzias ket naitabon iti daga ti ari ngem gapu iti sakitna, saan a naitabon kadagiti pagitantaneman kadagiti ari. Ni Jotam nga anakna ti simmukat kenkuana nga ari.