Read Iloko 2 Chronicles 27 Bible Online

2 Chronicles 27 - Iloko bible

2 Chronicles 27

¹Duapulo ket lima ti tawen ni Jotam idi maisaad nga ari ket 16 a tawen a nagturay idiay Jerusalem. Ni Jerusa nga anak ni Zadok ti inana.

²Naimbag ti inar-aramidna iti imatang ni Yahweh a kas ken ni amana; ngem saan a kas ken ni amana a nagbasol babaen iti panagpuorna iti insenso ken iseserrekna iti Templo. Nupay kasta, intultuloy dagiti tattao ti panagbasolda.

³Ni Jotam ti nangbangon iti Akin-amianan a Ruangan ti Templo ket adu ti tinarimaanna iti bakud ti siudad iti maysa a disso iti Jerusalem a maaw-awagan iti Ofel.

⁴Kadagiti kabambantayan ti Juda, nagbangon kadagiti siudad ket kadagiti bakir, nagpatakder kadagiti sarikedked ken torre a pagwanawanan.

⁵Nakigubat iti ari ti Ammon ken ti armadana ket pinarmekna ida. Pinilitna dagiti Ammonita nga agbayad kenkuana iti buis iti las-ud ti tallo a tawen: uppat a tonelada a pirak, 50,000 a salup ti trigo ken 50,000 a salup ti sebada.

⁶Nagbalin a nabileg nga ari ni Jotam gapu ta sipupudno a nagtulnog ken ni Yahweh a Diosna.

⁷Nailanad iti Pakasaritaan dagiti Ari ti Israel ken Juda dagiti dadduma a pasamak iti panagturayna, dagiti gubat a nakirangetanna, ken dagiti pagannurotan nga intuyangna.

⁸Agtawen iti 25 idi maisaad nga ari ket 16 a tawen a nagturay idiay Jerusalem.

⁹Idi natay, naitabon idiay Siudad ni David. Ni Ahaz nga anakna ti simmukat kenkuana nga ari.