Read Iloko 2 Chronicles 28 Bible Online

2 Chronicles 28 - Iloko bible

2 Chronicles 28

¹Duapulo ti tawen ni Ahaz idi maisaad nga ari ket nagturay iti 16 a tawen idiay Jerusalem. Dina tinulad ti naimbag nga aramid ni Ari David a kapuonanna; nagaramid ketdi iti saan a kaay-ayo ni Yahweh.

²Tinuladna dagidi aramid dagiti ari ti Israel. Nagpasukog kadagiti imahen ni didiosen a Baal;

³nagpuor iti insenso iti Tanap ti Hinnom; ket pinuoranna pay dagiti annakna a kas daton kadagiti imahen. Tinuladna dagiti makarimon nga ugali dagiti tattao a pinapanaw ni Yahweh iti daga idi dumteng dagiti Israelita.

⁴Nagidatag ni Ahaz kadagiti daton ken nagpuor kadagiti insenso kadagiti pagdaydayawan kadagiti nangato a lugar, kadagiti turod ken iti sirok ti tunggal narukbos a kayo.

⁵Gapu ta nagbasol ni Ahaz, impalubos ni Yahweh a Diosna a parmeken ti ari ti Siria ken alaenna ti adu a taga-Juda a kas balud iti panagsublina idiay Damasco. Impalubos pay ni Yahweh iti ari ti Israel, ni Peka nga anak ni Remalias, a parmekenna ni Ahaz ken patayenna ti 120,000 a mannakigubat a taga-Juda iti maysa nga aldaw. Impalubos ni Yahweh a Dios dagiti kapuonanda a mapasamak daytoy agsipud ta tinallikudanda.

⁷Maysa a soldado nga Israelita nga agnagan iti Zikri ti nangpatay ken ni Maaseyas nga anak ni Ari Ahaz, ni Azrikam a mangimaton iti palasio, ken ni Elkana a sumaruno iti ari iti turay.

⁸Tiniliw dagiti mannakigubat nga Israelita ti 200,000 a babbai ken ubbing a kailianda ket innalada ida a kas balud. Adu ti sinamsamda a kinabaknang nga inyawidda idiay Samaria.

⁹Ngem adda profeta ni Yahweh nga agnaed idiay Samaria; Oded ti naganna. Idi agsubli ti armada ti Israel ket dandanida sumrek iti siudad a kaduada dagiti balud a taga-Juda, sinabat ti profeta ida ket kinunana kadakuada, “Nakapungtot idi ti Apo a Dios dagiti kapuonanyo iti Juda ket impalubosna a parmekenyo ida ngem nagpapataykayo ket diyo natengngel ti pungtotyo.

¹⁰Ita, panggepyo a tagabuen dagiti lallaki ken babbai a taga-Jerusalem ken Juda! Diyo kadi ammo a nagbasolkayo met iti Apo a Diosyo?

¹¹Denggendak. Kakabsatyo dagitoy a balud. Wayawayaanyo ida tapno saan nga agdissuor kadakayo ti pungtot ti Apo.”

¹²Uppat kadagiti kangrunaan a pangulo ti Akin-amianan a Pagarian ti nangsupring iti inaramid ti armada. Isuda da Azarias nga anak ni Jehohanan, Berekias nga anak ni Mesillemot, Jehizkias nga anak ni Sallum ken Amasa nga anak ni Hadlai.

¹³Kinunada, “Diyo ipan ditoy dagiti balud! Nagbasoltayon iti Apo. Pinagpungtottayo ket umdasen a gapu ti pangdusaanna kadatayo. Ita, kayatyo manen a nayonan ti basoltayo.”

¹⁴Iti kasta, inyawat ti armada dagiti balud ken dagiti sinamsamda kadagiti tattao ken kadagiti panguloda.

¹⁵Nadutokan dagiti uppat a lallaki a mangted iti kawes dagiti balud; innalada dagiti kawes kadagiti sinamsamda. Inikkanda ida iti kawes ken sapatos, umdas a kanen ken inumenda sada sinapsapoan dagiti sugatda iti lana ti olibo. Impasakayda iti asno dagiti saan a makapagna ket insublida dagiti amin a balud idiay Jerico, ti siudad dagiti palma iti sakup ti Juda. Kalpasanna, nagawid dagiti Israelita idiay Samaria.

¹⁶Rinugian manen dagiti Edomita ti panangrautda iti Juda ket adu ti tiniliwda a balud, isu a nagpatulong ni Ari Ahaz iti emperador ti Asiria.

¹⁸Iti dayta a tiempo, rarauten dagiti Filisteo dagiti ili iti akinlaud nga arisadsad dagiti turod ken iti akin-abagatan a Juda. Sinakupda dagiti siudad ti Betsemes, Aijalon ken Gederot ken dagiti siudad ti Soco, Timna, ken Gimzo agraman dagiti barrioda ket nagnaedda sadiay iti agnanayon.

¹⁹Gapu ta sinalungasing ni Ari Ahaz dagiti kalintegan dagiti tattaona ket sinukirna ni Yahweh, riniribuk ni Yahweh ti Juda.

²⁰Ngarud, idinto a tulongan koma ni Tiglat Pileser ni Ahaz, binusorna ketdi ket inyegna ti riribuk kenkuana.

²¹Innala ni Ahaz ti amin a kinabaknang ti Templo, ti palasio ken dagiti taeng dagiti pangulo dagiti tattaona ket intedna iti emperador ti Asiria. Nupay kasta, saan a nakatulong daytoy.

²²Idi kakaro ti pannakadidigrana, dayta nga Ahaz, inyad-addana ketdi ti nagbasol ken ni Yahweh.

²³Nagidatag kadagiti daton kadagiti didiosen dagiti taga-Siria a nangparmek kenkuana. Kinunana, “Tinulongan dagiti didiosen dagiti Siriano dagiti ari ti Siria ket nalabit a tulongandak met no agidatonak kadakuada.” Ngem, daytoy ti nakaigapuan ti panagdissuor ti didigra kenkuana ken iti pagarianna.

²⁴Saan la a dayta. Binurburakna ti amin nga alikamen ti Templo. Sinerraanna ti Templo ket nagbangon kadagiti altar iti amin a paset ti Jerusalem.

²⁵Iti tunggal siudad ken ili ti Juda, nagbangon kadagiti lugar a pagdaydayawan ken pakapuoran iti insenso a maipaay kadagiti ganggannaet a didiosen. Kastoy ti nakaigapuan ti panagpungtot ni Yahweh kenkuana, ti Dios dagidi kapuonanna.

²⁶Nailanad iti Pakasaritaan dagiti Ari ti Juda ken Israel ti dadduma a pasamak iti panagturayna, manipud panangrugi agingga iti panaggibus ti turayna.

²⁷Natay ni Ari Ahaz ket naitabon idiay Jerusalem ngem saan nga iti pagitantaneman kadagiti ari. Ni Hezekias nga anakna ti simmukat kenkuana nga ari.