Read Iloko 2 Chronicles 30 Bible Online

2 Chronicles 30 - Iloko bible

2 Chronicles 30

¹Saan a naramrambakan ti Fiesta ti Paskua iti naituding a tiempo, iti umuna a bulan, gapu ta bassit ti bilang dagiti naikonsagrar a papadi ken saan pay nga adu dagiti tattao a naummong idiay Jerusalem. Iti kasta, nagaanamongan da Ari Hezekias, dagiti ofisialesna ken dagiti tattao ti Jerusalem a rambakanda ti fiesta iti maikadua a bulan ket napakaammoan dagiti amin a tattao ti Israel ken Juda. Inkagumaan ti ari ti nagpaipan kadagiti surat kadagiti tribu ti Efraim ken Manases; inawisna ida a mapan iti Templo idiay Jerusalem tapno makipagrambakda iti Fiesta ti Paskua a pammadayaw ken ni Yahweh a Dios ti Israel.

⁴Agsipud ta inanamongan ti ari ken dagiti tattao ti planoda,

⁵inawisda amin nga Israelita, manipud Dan iti amianan agingga idiay Beerseba iti abagatan tapno rambakanda ti Fiesta ti Paskua idiay Jerusalem, kas mayannurot iti Linteg; kayatda nga ad-adu ti makipagrambak.

⁶Iti panagbilin ti ari ken dagiti ofisialesna, adda dagiti naibaon iti entero a Juda ken Israel ket impakaammoda daytoy nga awis: “Tattao ti Israel, agsublikayo iti Apo a Dios da Abraham, Isaac ken Jacob tapno agsubli met ti Apo kadakayo—dakayo a nakalisi iti pannakabalin dagiti ari ti Asiria a nangsakup iti daga.

⁷Diyo tuladen dagiti kapuonanyo ken dagiti padayo nga Israelita a nangtallikud iti Apo a Diosda. Kas makitayo, nakaro ti panangdusana kadakuada.

⁸Dikay agsuksukir a kas kadakuada. Agtulnogkayo ketdi iti Apo. Umaykayo iti Templo idiay Jerusalem a pinasanto iti agnanayon ti Apo a Diosyo. Agdaydayawkayo kenkuana tapno bumaawen ti pungtotna kadakayo.

⁹No agsublikayo iti Apo, mawayawayaanto dagiti kakabagianyo a naitalaw a kas balud; kaasianto dagiti nangitalaw kadakuada ket pagawidendanto ida. Naayat ken manangngaasi ti Apo a Diosyo ket no agsublikayo kenkuana, awatennakayto.”

¹⁰Napan dagiti naibaon iti amin a siudad iti sakup dagiti tribu ti Efraim ken Manases, ken iti sakup ti Zebulon iti amianan. Ngem kinatkatawaan ken rinabrabak ida dagiti tattao.

¹¹Nupay kasta, adda met la sumagmamano a tattao kadagiti tribu ti Aser, Manases ken Zebulon a siaayat a mapan idiay Jerusalem.

¹²Tinignay met ti Dios dagiti taga-Juda ket pinagmaymaysana dagiti tattao iti tarigagayda nga agtungpal iti pagayatanna kas naipakaammo kadagiti bilin nga inted ti ari ken dagiti ofisialesna.

¹³Iti maikadua a bulan, adu a tattao ti naguummong idiay Jerusalem tapno rambakanda ti Fiesta ti Tinapay nga Awan Lebadurana.

¹⁴Innalada dagiti amin nga altar a naus-usar idiay Jerusalem a pagidatagan kadagiti daton ken pagpuoran iti insenso ket imbellengda iti Tanap ti Kidron.

¹⁵Iti maika-14 nga aldaw ti bulan, pinartida dagiti karnero a daton nga agpaay iti Fiesta ti Paskua. Gapu iti bain dagiti papadi ken dagiti Levita a saan a nadalus iti imatang ti linteg, inkonsagrarda ti bagida ken ni Yahweh ket nagidatagda kadagiti daton a mapuoran iti Templo.

¹⁶Napanda iti nairanta a lugarda iti Templo kas sagudayen ti Linteg ni Moises, ti tao ti Dios. Inted dagiti Levita ti dara dagiti animal kadagiti papadi ket inwarsida iti altar.

¹⁷Gapu ta adu kadagiti tattao ti saan a nadalus iti imatang ti linteg, dida mabalin ti agparti kadagiti urbon ti karnero nga agserbi iti Paskua; iti kasta, insaup dagiti Levita ida ket indatonda dagiti karnero ken ni Yahweh.

¹⁸Saan la a dayta. Adu kadagiti naggapu kadagiti tribu ti Efraim, Manases, Isacar ken Zebulon ti saan a nangaramid iti seremonia ti pannakadalus ket saan a maiparbeng ti panangrambakda iti Fiesta ti Paskua. Ngem inkararagan ni Ari Hezekias ida:

¹⁹“O Apo a Dios dagidi kapuonanmi, iti kinaimbagmo, pakawanem koma dagiti agdaydayaw kenka iti amin a pusoda nupay saanda a nadalus iti imatang ti linteg.”

²⁰Impangag ni Yahweh ti kararag ni Hezekias; pinakawanna dagiti tattao ket dina inan-ano ida.

²¹Pito nga aldaw a rinambakan a siraragsak dagiti tattao a naummong idiay Jerusalem ti Fiesta ti Tinapay nga Awan Lebadurana. Iti amin a kabaelan dagiti Levita ken dagiti papadi, inaldaw a dinaydayawda ni Yahweh.

²²Dinaydayaw ni Hezekias dagiti Levita gapu iti laingda a nangannong iti panagdaydayaw ken ni Yahweh. Idi malpas ti pito nga aldaw a panagidatagda kadagiti daton a pagdaydayaw ken ni Yahweh a Dios dagidi kapuonanda,

²³nagaanamonganda amin nga ituloyda ti agrambak. Nagrarambakda ngarud a siraragsak iti pito pay nga aldaw.

²⁴Nangted ni Ari Hezekias iti 1,000 a toro a baka ken 7,000 a karnero a partien ken sidaen dagiti tattao. Inikkan met ida dagiti ofisiales iti sangaribu a toro a baka ken 10,000 a karnero. Adu a papadi ti nangikonsagrar iti bagida.

²⁵Naragsak ti tunggal maysa—dagiti taga-Juda, dagiti papadi, dagiti Levita, dagiti tattao a naggapu iti amianan ken dagiti ganggannaet nga agnaeden iti agnanayon iti Israel ken Juda.

²⁶Nagrag-o ti siudad ti Jerusalem gapu ta awan pay ti naaramid a kastoy manipud idi tiempo ni Ari Solomon nga anak ni David.

²⁷Nagdawat dagiti papadi ken Levita ken ni Yahweh a bendisionanna dagiti tattao. Iti taeng ti Dios idiay langit, dimmanon dagiti kararagda ket impangagna ida.