Read Iloko 2 Chronicles 31 Bible Online

2 Chronicles 31 - Iloko bible

2 Chronicles 31

¹Idi malpas ti fiesta, napan amin dagiti Israelita iti tunggal siudad ti Juda ket rinebbada dagiti adigi a bato, tinumbada dagiti simbolo ni Asera a diosa; rinakrakda dagiti altar ken dagiti disso a pagdaydayawan dagiti pagano. Kasta met ti inaramidda iti entero a sakup ti Juda, Benjamin, Efraim ken Manases. Kalpasanna, nagawidda kadagiti ilida.

²Binuangay manen ni Ari Hezekias ti bunggoy dagiti papadi ken Levita ket naituding ti rebbengen ti tunggal bunggoy. Dagitoy ti trabahoda: agidatag kadagiti daton a mapuoran ken dagiti daton a pakikappia, tumulong iti panagdaydayaw iti Templo ken panagdayaw ken panagyaman iti nadumaduma a paset ti Templo.

³Naggapu kadagiti arban ken pangen ni Ari Hezekias dagiti animal a daton a mapuoran iti tunggal bigat ken rabii ken dagiti maidaton iti Aldaw a Panaginana, iti Fiesta ti Lutuad, ken kadagiti dadduma a fiesta a kas sagudayen ti Linteg ni Yahweh.

⁴Imbilin pay ti ari kadagiti agnaed iti Jerusalem a yegda dagiti datonda a naikeddeng a maited kadagiti papadi ken Levita tapno maipamaysada ti tiempoda nga agtungpal iti Linteg ni Yahweh.

⁵Apaman a naipaulog ti bilin, inyeg dagiti Israelita dagiti sagutda: kasayaatan a trigo, arak, lana ti olibo, diro ken dadduma nga apit ti talon; inyegda met dagiti apagkapullo ti amin a kukuada.

⁶Inyeg dagiti amin a tattao nga agnaed kadagiti siudad ti Juda ti apagkapullo dagiti baka ken karneroda. Nangyegda met iti adu a sagut nga indatonda ken ni Yahweh a Diosda.

⁷Nangrugi a nagsangpet dagiti sagut iti maikatlo a bulan ket nagtultuloy a naurnongda iti sumaruno nga uppat a bulan.

⁸Idi makita ni Ari Hezekias ken dagiti ofisialesna ti kaadu ti naited, indaydayawda ni Yahweh ken dinaydayawda dagiti tattaona nga Israelita.

⁹Nagsao ti ari kadagiti papadi ken Levita maipapan kadagitoy a sagut

¹⁰ket imbaga kenkuana ni Azarias a Nangato a Padi a kaputotan ni Zadok, “Manipud idi rugian dagiti tattao ti mangyeg kadagiti sagutda, saanen nga agkurang ti taraon ket agsobsobraan pay. Adda amin dagitoy kadatayo gapu ta binendisionan ti Apo dagiti tattaona.”

¹¹Kas imbilin ti ari, nangisaganada kadagiti kuarto a pagidulinan iti sakup ti Templo

¹²ket inkabilda sadiay dagiti amin a sagut ken apagkapullo. Dinutokanda ni Conanias, maysa a Levita, nga agaywan kadagiti pagidulinan ken ni Simei a kabsatna a katulonganna.

¹³Sangapulo a Levita ti nadutokan nga agtrabaho iti babaenda: Jehiel, Azazias, Nahat, Asahel, Jerimot, Jozabad, Eliel, Ismakias, Mahat ken Benaias, babaen iti panangdutok kadakuada ni Ari Hezekias ken ni Azarias a Nangato a Padi.

¹⁴Ni Kore nga anak ni Imna ti mangimaton iti pannakaawat kadagiti sagut a maidaton ken ni Yahweh ken ti pannakaibunongda. Maysa a Levita ni Kore. Isu ti pangulo dagiti guardia iti Akindaya a Ruangan ti Templo.

¹⁵Kadagiti siudad a pagnaedan dagiti papadi, siaanep a timmulong kenkuana dagitoy a Levita: Eden, Miniamin, Jesua, Semaias, Amarias ken Secanias. Agpapada ti taraon nga itedda kadagiti padada a Levita segun ti trabahoda

¹⁶a saan ketdi a segun ti familiada. Imbingayanda dagiti amin a lallaki nga agtawen iti tallopulo wenno nasursurok pay nga agserserbi iti inaldaw iti Templo segun dagiti trabahoda.

¹⁷Naituding ti annongen dagiti papadi segun ti familiada; ket naited met ti trabaho kadagiti Levita nga agtawen iti 20 wenno nasursurok pay segun ti akem ti bunggoyda.

¹⁸Nailistada amin agraman dagiti assawada, annak ken dadduma a kabbalayda gapu ta masapul a sisasaganada iti amin a tiempo a mangannong kadagiti nasagradoan a trabahoda.

¹⁹No maipapan kadagiti papadi nga agnaed kadagiti siudad a naituding kadagiti kaputotan ni Aaron wenno kadagiti pagpastoran a sakup dagitoy a siudad, adda dagiti nadutokan nga agibunong iti taraon kadagiti amin a lallaki kadagiti familia dagiti papadi ken iti amin a nailista iti familia dagiti Levita.

²⁰Iti entero a Juda, nalinteg ken makaay-ayo ti inar-aramid ni Ari Hezekias iti imatang ni Yahweh a Diosna.

²¹Nagballigi ni Hezekias gapu ta napasnek iti amin nga inaramidna nga agpaay iti Templo wenno aniaman nga adda pannakainaigna iti Linteg. Naan-anay ti kinapudnona iti Diosna.