Read Iloko 2 Chronicles 32 Bible Online

2 Chronicles 32 - Iloko bible

2 Chronicles 32

¹Kalpasan dagitoy a pasamak a nakakitaan iti napudno a panagserbi ni Hezekias ken ni Yahweh, dimteng ni Senakerib nga emperador ti Asiria tapno sakupenna ti Juda. Linakubna dagiti nasarikedkedan a siudad ket binilinna ti armadana a duprakenda dagiti bakud tapno mastrekda.

²Idi makita ni Hezekias a panggep met ni Senakerib a rauten ti Jerusalem,

³nagnunumoanda kadagiti ofisialesna a serraanda dagiti pagayusan ti danum iti ruar ti siudad tapno awan ti danum dagiti Asirio inton dumanonda iti Jerusalem. Impanguloan dagiti ofisiales ti adu a tattao a rimmuar ket sinerraanda amin a paggapuan ti danum isut' gapuna nga awanen ti rummuar a danum.

⁵Pinalagda ti ari dagiti sarikedked ti siudad. Pinatarimaanna dagiti nadadael a bakud, sa nagpabangon kadagiti pagwanawanan iti rabawna. Iti ruar dagitoy a bakud, nagpaaramid iti sabali a bakud. Pinatarimaanna met dagiti sarikedked a nabangon iti disso a nagaburan iti bangirna ti daya iti daan a paset ti Jerusalem. Nagpaaramid pay iti adu a pika ken kalasag.

⁶Inkabilna dagiti amin a lallaki iti siudad iti babaen dagiti ofisiales ti armada ket pinaummongna ida iti plasa iti ruangan ti siudad sana imbaga kadakuada,

⁷“Paturedenyo ti pakinakemyo ket dikay agbuteng iti emperador ti Asiria wenno iti armadana. Dakdakkel ti pannakabalintayo ngem isuda.

⁸Aggapu iti tao ti pannakabalinna ngem adda kadatayo ti Apo a Diostayo a tumulong kadatayo a makigubat.” Iti daytoy a sinao ni Ari Hezekias, napatured dagiti tattao.

⁹Iti saan a mabayag, idi adda pay la idiay Lakis ni Senakerib ken ti armadana, nangibaon kadagiti ofisialesna a mapan ken ni Hezekias ken kadagiti tattao ti Juda a kaduana idiay Jerusalem. Pinaibagana:

¹⁰“Siak ni Senakerib nga emperador ti Asiria. Ania aya ti mangpatpatured kadakayo nga agyan dita Jerusalem idinto a nalakuben?

¹¹Al-allilawennakayo laeng ni Hezekias iti panangibagbagana nga isalakannakayo ti Apo a Diosyo iti pannakabalinmi. Bay-annakayo a matay iti bisin ken waw.

¹²Saan aya nga isu ti nangdadael kadagiti altar ken kadagiti lugar a pagdaydayawan iti Apo? Saan aya nga imbagana kadagiti tattao ti Juda ken Jerusalem a maysa la nga altar ti pagdaydayawanda ken pagpuoranda iti insenso?

¹³Diyo kadi ammo ti inaramid dagidi kapuonak kadagiti tattao dagiti sabali a nasion? Diyo kadi ammo ti inaramidko kadakuada? Naisalakan aya dagiti didiosenda ida iti pannakabalin ti emperador ti Asiria?

¹⁴Adda kadin didiosen dagita a pagilian a nangisalakan iti pagilianda iti pannakabalinmi? Awan! Sinno ti agkuna a maisalakannakayo ti diosyo?

¹⁵Ita, dikay paallilaw wenno payaw-awan ken ni Hezekias. Diyo patpatien! Awan ti didiosen ti uray ania a nasion a nakaisalakan kadagiti tattaona iti pannakabalin ti siasinoman nga emperador ti Asiria! Ngarud, awan duadua a dinakay maisalakan daytoy a diosyo!”

¹⁶Nakarkaro pay ti imbaga dagiti ofisiales ti Asiria a maibusor ken ni Yahweh a Dios ken ni Hezekias nga adipen ni Yahweh.

¹⁷Adda pay surat ti emperador a nanglaisanna ken ni Yahweh a Dios ti Israel. Kastoy ti linaonna: “Saan a naispal dagiti didiosen dagiti nasion dagiti tattaoda iti pannakabalinko; saan met a maisalakan ti dios ni Hezekias dagiti tattaona iti pannakabalinko.”

¹⁸Tapno nalakada a sakupen ti siudad, binutbutengda dagiti adda iti rabaw ti bakud ti Jerusalem babaen iti panangyik-ikkisda kadagitoy a balikas iti pagsasao nga Hebreo.

¹⁹Imbagada a ti Dios ti Jerusalem ket awan dumana kadagiti didiosen dagiti sabali a pagilian—aramid ti tao ida.

²⁰Nagkararag ni Ari Hezekias, kasta met ni profeta Isaias nga anak ni Amoz. Nagdawatda iti Dios a tulonganna ida.

²¹Nangibaon ni Yahweh iti maysa nga anghel a nangpapatay kadagiti natutured a mannakigubat ken ofisiales ti armada ti Asiria. Sibabain a nagawid ti emperador idiay Asiria. Iti maysa nga aldaw, idi adda iti templo ti diosna, sumagmamano kadagiti annakna ti nangpapatay kenkuana iti kampilanda.

²²Kastoy ti panangispal ni Yahweh ken ni Ari Hezekias ken kadagiti tattao ti Jerusalem iti pannakabalin ni Senakerib nga emperador ti Asiria ken kadagiti sabali pay a kabusorda. Gapu kenkuana, naaddaan ni Hezekias ken dagiti tattao iti talna iti aglawlaw.

²³Adu a tattao ti napan idiay Jerusalem a nangyeg kadagiti datonda ken ni Yahweh ken sagutda ken ni Hezekias. Manipud idin, rinaraem dagiti amin a nasion ni Hezekias.

²⁴Iti dayta a tiempo, nagsakit ni Ari Hezekias ket nagistayan natay. Nagkararag ket inikkan ni Yahweh iti pagilasinan nga umimbagto.

²⁵Ngem natangsit unay ni Hezekias ket awan ti imparangarangna a panagyamanna iti imbag nga impaay kenkuana ni Yahweh. Nagsagaba ti Juda ken Jerusalem gapu iti daytoy.

²⁶Nupay kasta, iti kamaudianna, nagpakumbaba ni Hezekias ken dagiti tattao ti Jerusalem. Iti kasta, saan a dinusa ni Yahweh dagiti tattao iti panawen ni Hezekias.

²⁷Nagbalin a nakabakbaknang ni Hezekias ket rinaraem dagiti tattao. Nagpaaramid kadagiti kuarto a pagidulinan kadagiti balitokna, pirak, agkakapateg a bato, bangbanglo, kalasag ken dadduma a napateg nga alikamen.

²⁸Nagpaaramid pay kadagiti pagidulinan kadagiti trigo, arak ken lana ti olibo; nagpaaramid pay kadagiti koral dagiti baka ken karnerona.

²⁹Malaksid kadagitoy, pinaraburan ti Dios kadagiti baka ken karnero ken adu pay a dadduma a kinabaknang isut' gapuna nga adu ti impasdekna a siudad.

³⁰Ni Ari Hezekias ti nangserra iti pagruaran ti Ubbog Gihon ket inturongna ti ayus ti danum iti usok a sumrek iti Jerusalem. Nagballigi ni Hezekias iti amin nga inaramidna.

³¹Uray idi dimteng dagiti pannakabagi ti Babilonia tapno agdamagda kadagiti karkarna a pasamak iti daga, pinalubosan ti Dios nga aramiden ni Hezekias ti kaykayatna tapno suotenna laeng ti kababalinna.

³²Nailanad iti Parmata ni Profeta Isaias nga Anak ni Amoz ken iti Pakasaritaan dagiti Ari ti Juda ken Israel ti dadduma a pasamak iti panagturay ni Ari Hezekias ken ti panangipategna ken ni Yahweh.

³³Natay ni Hezekias ket naitabon iti bakras ti turod iti asideg ti pagitantaneman kadagiti ari. Iti pannakatayna, pinadayawan dagiti tattao ti Juda ken Jerusalem. Ni Manases nga anakna ti simmukat kenkuana nga ari.