Read Iloko 2 Chronicles 33 Bible Online

2 Chronicles 33 - Iloko bible

2 Chronicles 33

¹Sangapulo ket dua ti tawen ni Manases idi maisaad nga ari iti Juda ket nagturay idiay Jerusalem iti 55 a tawen.

²Nagbasol ken ni Yahweh iti panangsurotna kadagiti makarimon nga ugali dagiti tattao a pinapanaw ni Yahweh iti daga idi sumangpet dagiti tattaona.

³Tinarimaan ni Manases dagiti lugar a pagdaydayawan a dinadael ni Hezekias nga amana. Nagaramid kadagiti altar a pagdaydayawan ken ni didiosen a Baal. Nangsukog iti imahen ni didiosen nga Asera ken nagdaydayaw kadagiti bituen.

⁴Nagaramid kadagiti altar para kadagiti didiosen iti Templo, ti lugar a kinuna idi ni Yahweh a masapul a pagdaydayawan kenkuana iti agnanayon.

⁵Kadagiti dua a paraangan iti Templo, nangaramid kadagiti altar a pagdaydayawan kadagiti bituen.

⁶Iti Tanap ti Hinnom, pinuoranna dagiti annakna a kas daton. Nagan-anito, nakiuman kadagiti mammadles ken espiritista. Nakaad-adu a kinadakes ti inaramidna a namagpungtot ken ni Yahweh.

⁷Nangikabil iti maysa nga imahen iti Templo, ti lugar nga imbaga ni Yahweh ken ni David ken ni Solomon nga anakna idi kinunana kadakuada: “Ditoy Jerusalem, iti daytoy a Templo, ti pinilik iti amin a sakup dagiti 12 a tribu ti Israel a lugar a masapul a pagdaydayawan kaniak.

⁸Ket no tungpalen dagiti Israelita dagiti amin a bilinko ken amin a sagudayen ti Linteg nga inted kadakuada ni Moises nga adipenko, diakto ipalubos a mapagtalawda iti daga nga intedko kadagidi kapuonanda.”

⁹Insungsong ni Manases dagiti tattao ti Juda ken Jerusalem nga agbasol. Ket ad-adu a kinadakes ti inaramidda ngem dagiti tattao a pinagtalaw ni Yahweh sakbay a dimteng sadiay dagiti tattaona.

¹⁰Saan nga impangag ni Manases ken dagiti tattaona ti panangballaag ni Yahweh kadakuada.

¹¹Ngarud, pinalubosan ni Yahweh dagiti pangulo ti armada ti Asiria a mangraut iti Juda. Tiniliwda ni Manases babaen kadagiti kawit, kinawaranda sada impan idiay Babilonia.

¹²Gapu iti panagsagabana, nagpakumbaba, nagkamang ken ni Yahweh a Diosna ket nagpatulong kenkuana.

¹³Impangag ti Dios ti kararag ni Manases ket pinalubosanna nga agsubli idiay Jerusalem tapno agturay manen. Iti kasta, nabigbig ni Manases a ni Yahweh ket Dios.

¹⁴Kalpasan daytoy, pinatayagna ti akinruar a bakud ti daan a Siudad ni David, iti bangirna ti daya manipud iti maysa a paset ti tanap iti asideg ti Ubbog Gihon iti amianan agingga iti Ruangan ti Ikan ken ti paset ti siudad ti Ofel. Nangikabil met iti maysa nga ofisial ti armada a mangipangulo iti maysa a bunggoy dagiti mannakigubat iti tunggal nasarikedkedan a siudad ti Juda.

¹⁵Inikkatna iti Templo dagiti ganggannaet a didiosen ken ti ladawan nga inkabilna sadiay ken dagiti altar dagiti pagano iti turod a nakabangonan ti Templo ken kadagiti dadduma a lugar iti Jerusalem; imbellengna dagitoy iti ruar ti siudad.

¹⁶Tinarimaanna met ti altar a pagdaydayawan ken ni Yahweh ket nagidatag kadagiti daton a pakikappia ken pagyaman sadiay. Binilinna dagiti amin a tattao ti Juda nga agdaydayawda ken ni Yahweh a Dios ti Israel.

¹⁷Uray no intultuloy dagiti tattao ti nagidaton kadagiti sakrifisio kadagiti sabali a lugar a pagdaydayawan, ni laeng Yahweh ti nangipaayanda.

¹⁸Nailanad iti Pakasaritaan dagiti Ari ti Israel ti amin nga inaramid ni Manases, ti kararagna iti Diosna ken dagiti mensahe dagiti profeta a nagsao kenkuana iti nagan ni Yahweh a Dios ti Israel.

¹⁹Nailanad iti Pakasaritaan dagiti Profeta ti kararag ti ari ken ti sungbat ti Dios iti dayta a kararag, ti pakasaritaan dagiti basolna, ti kinadakes nga inaramidna, dagiti inaramidna a pagdaydayawan ken dagiti simbolo ni Asera a diosa ken dagiti imahen a nagdaydayawanna.

²⁰Natay ni Manases ket naitabon iti palasio. Ni Amon nga anakna ti simmukat kenkuana a kas ari.

²¹Duapulo ket dua ti tawen ni Amon idi maisaad nga ari ti Juda ket nagturay idiay Jerusalem iti dua a tawen.

²²Kas ken ni Manases nga amana, nagbasol ken ni Yahweh ket nagdaydayaw kadagiti didiosen a nagdaydayawan daydi amana.

²³Ngem saan a kas iti daydi amana a nagpakumbaba iti imatang ni Yahweh, ket nakarkaro pay ti panagbasolna.

²⁴Insikat dagiti ofisialesna ket pinapatayda iti palasio.

²⁵Ngem pinapatay dagiti tattao ti Juda dagiti nangpapatay ken ni Amon ket insaadda ni Josias nga anakna nga ari.