Read Iloko 2 Chronicles 36 Bible Online

2 Chronicles 36 - Iloko bible

2 Chronicles 36

¹Pinili dagiti tattao ti Juda ni Joahaz nga anak ni Josias, ket kinonsagrarda nga ari idiay Jerusalem.

²Agtawen iti 23 ni Joahaz idi maisaad nga ari ti Juda ket tallo a bulan a nagturay idiay Jerusalem.

³Innala ni Neco nga ari ti Egipto a kas balud, ket pinagbuisna ti Juda iti 7,500 a libra a pirak ken 75 a libra a balitok.

⁴Insaad ni Neco ni Eliakim a kabsat ni Joahaz nga ari ti Juda ket sinukatanna ti naganna iti Jehoyakim. Naipan ni Joahaz idiay Egipto.

⁵Agtawen iti 25 ni Jehoyakim idi maisaad nga ari iti Juda ket 11 a tawen a nagturay idiay Jerusalem. Nagbasol ken ni Yahweh a Diosna.

⁶Rinaut ni Nebucadnesar nga ari ti Babilonia ti Juda. Tiniliwna ni Jehoyakim, ket kinawaranna nga impan idiay Babilonia.

⁷Impanna met iti palasiona dagiti dadduma a gameng ti Templo.

⁸Nailanad iti Pakasaritaan dagiti Ari ti Israel ken Juda dagiti amin nga inar-aramid ni Jehoyakim, agraman dagiti makarimon nga ugalina ken dakes nga inar-aramidna. Ni Jehoyakin nga anakna ti simmukat kenkuana nga ari.

⁹Agtawen iti 18 ni Jehoyakin idi maisaad nga ari ti Juda, ket tallo a bulan ken sangapulo nga aldaw a nagturay idiay Jerusalem. Nagbasol met ken ni Yahweh.

¹⁰Iti panangrugi ti tawen, innala ni Ari Nebucadnesar ni Jehoyakin ket impanna a kas balud idiay Babilonia. Innalana met dagiti gameng ti templo. Insaad ni Nebucadnesar ni Zedekias a kabsat ni Jehoyakin a kas ari ti Juda ken Jerusalem.

¹¹Agtawen iti 21 ni Zedekias idi maisaad nga ari ti Juda, ket 11 a tawen a nagturay idiay Jerusalem.

¹²Nagbasol ken ni Yahweh. Saan a nagpakumbaba ket dina impangag ni profeta Jeremias a nangipakaammo iti sao ni Yahweh.

¹³Immalsa ni Zedekias a maibusor ken ni Ari Nebucadnesar a nangpilit kenkuana nga agsapata iti Dios tapno agtalinaed a napudno. Natangken ti ulona ket dina kinayat ti agbabawi ken agsubli ken ni Yahweh a Dios ti Israel.

¹⁴Maysa pay, tinulad dagiti papangulo ti Juda, dagiti papadi ken dagiti tattao ti aramid dagiti nasion iti aglawlawda; nagdaydayawda met kadagiti imahen ket natulawan ti Templo a pinagbalin ni Yahweh a nasantoan.

¹⁵Kayat ni Yahweh a Dios dagiti kapuonanda nga ispalen dagiti tattaona ken ti Templona, isu nga intultuloyna ti nangibaon kadagiti mangballaag kadakuada.

¹⁶Ngem rinabrabakda laeng dagiti naibaon ken dagiti profetana ket kinatkatawaanda ti aniaman nga ibagada. Nagangayanna, napunnoan ni Yahweh ket simged ti pungtotna kadagiti tattaona.

¹⁷Imbaon ni Yahweh ti ari ti Babilonia a mangraut kadakuada. Pinatay ti ari dagiti lallaki nga agtutubo ti Juda iti Templo. Awan ti kinaasianna—ubbing wenno nataengan, lallaki wenno babbai, masakit wenno nasalun-at. Inyawat amin ida ti Dios iti pannakabalin ti ari.

¹⁸Sinamsam ti ari ti Babilonia ti amin nga alikamen iti uneg ti Templo agraman dagiti sanikua ti ari ken dagiti ofisialesna, ket impanna dagitoy idiay Babilonia.

¹⁹Pinuoranna ti Templo ken ti siudad agraman dagiti amin a palasio ken kinabaknang ti siudad, ket rinebbana dagiti bakud ti siudad.

²⁰Impanna idiay Babilonia dagiti tattao a saan a napapatay. Sadiay, nagserbida a tagabu kenkuana ken kadagiti kaputotanna agingga a pimmigsa ti pagarian ti Persia.

²¹Ket natungpal ti sao ni Yahweh idi imbagana ken ni profeta Jeremias, “Aginananto ti daga iti uneg ti 70 a tawen a sukat dagiti Tawen a Panaginana a saan a nangilin.”

²²Tapno matungpal ti impaltiing ni Yahweh ken ni profeta Jeremias, tinignayna ni Ciro nga emperador ti Persia tapno mangipaulog iti bilin a maibasa iti entero a paset ti pagarianna. Napasamak daytoy iti umuna a tawen a panagturay ni Ciro.

²³Kastoy ti nailanad: “Bilin daytoy ni Ciro nga emperador ti Persia. Insaadnak ti Apo a Dios ti Langit tapno iturayak ti entero a lubong. Impaannongna kaniak ti pannakabangon iti maysa a pasdek nga agpaay a templona idiay Jerusalem iti Juda. Ita, siasinoman a maibilang kadagiti tattao ti Dios, ibilinko ti ipapanyo idiay Jerusalem. Sapay koma ta kumuyog kadakayo ti Apo a Diosyo.”