Read Iloko 2 Chronicles 5 Bible Online

2 Chronicles 5 - Iloko bible

2 Chronicles 5

¹Idi malpas amin a trabaho iti Templo, impan ni Solomon dagiti amin nga indaton daydi amana a David ken ni Yahweh, iti pagidulinan iti Templo: dagiti alikamen a balitok, pirak ken dagiti dadduma nga alikamen.

²Inummong ni Ari Solomon dagiti panglakayen ti Israel, dagiti pangulo dagiti tribu ken dagiti kapuonan idiay Jerusalem tapno alaenda ti Lakasa ti Tulag ni Yahweh nga adda iti Sion iti Siudad ni David.

³Nagtitiponda amin iti Fiesta dagiti Abong-abong.

⁴Idi naummong dagiti amin a panglakayen, innala dagiti papadi ti Lakasa ti Tulag.

⁵Babaen iti tulong dagiti Levita, binagkatda agraman ti nasagradoan a Tolda ken amin nga alikamenna ket impanda iti Templo.

⁶Naguummong da Solomon ken dagiti amin nga Israelita iti sangoanan ti Lakasa ti Tulag. Nagidatonda iti adu a karnero ken baka—nakaad-adu ken saan a mabilang.

⁷Kalpasanna, inserrek dagiti papadi ti Lakasa ti Tulag iti akin-uneg a kuarto ti Templo, iti Kasantoan a Disso, iti baba dagiti payak dagiti kerubim.

⁸Siuukrad dagiti payak dagiti kerubim ket linlinonganda ti lakasa ken dagiti assiwna.

⁹Nakaat-atiddog dagiti assiw, isut' gapuna a makita dagiti murdongda iti masungad a kuarto iti sangoanan ti akin-uneg a santuario. Ngem saan ida a makita iti ruar. Addada pay laeng sadiay kadagitoy nga aldaw.

¹⁰Awan karga ti Lakasa ti Tulag malaksid kadagiti dua a tapi a bato nga inkabil ni Moises idi addada idiay Bantay Sinai, ti bantay a nakitulagan ni Yahweh kadagiti Israelita idi rummuarda idiay Egipto.

¹¹Kinonsagrar dagiti amin a papadi nga adda sadiay ti bagbagida, uray ania a bunggoy ti nakaikamenganda. Siaarruat iti linen a pagan-anay dagiti musiko a Levita—da Asaf, Heman, ken Jedutun ken dagiti kameng ti kapuonanda. Nagtakderda iti asideg ti altar iti bangirna iti daya. Nakaiggemda kadagiti piangpiang ken arpa ket kaduada ti 120 a papadi nga agpuypuyot kadagiti trumpeta. Indaydayaw dagiti kumakanta ni Yahweh, a dinanggayan dagiti trumpeta, piangpiang ken dadduma nga instrumento. Inkantada: “Madaydayaw ti Apo gapu ta naimbag ket agnanayon ti ayatna.” Pagammoan, napno ti Templo iti ulep nga agranraniag iti makapurar a dayag ni Yahweh. Saan a makapagtalinaed dagiti papadi iti balay ti Dios ket dida naituloy ti annongda iti panagdaydayaw.