Read Iloko Ezra 1 Bible Online

Ezra 1 - Iloko bible

Ezra 1

¹Iti umuna a tawen a panagturay ni Ciro nga emperador ti Persia, tinignay ni Yahweh ti ari tapno mangipaulog iti bilin a maibasa iti entero a pagarianna. Naaramid daytoy tapno matungpal ti sao ni Yahweh babaen ken ni profeta Jeremias.

²“Daytoy ti bilin ni Ciro nga Emperador ti Persia. Ti Apo a Dios ti langit ti nangisaad kaniak nga agturay iti entero a lubong. Imbagana kaniak a mangbangonak iti templo nga agpaay kenkuana idiay Jerusalem iti Juda.

³Sapay koma ta adda ti Dios kadakayo amin a tattaona. Inkayo idiay Jerusalem, ket bangonenyo manen ti Templo ti Apo a Dios ti Israel, ti Dios a pagdaydayawan idiay Jerusalem.

⁴No adda kadagiti tattaona a napagtalaw a kas balud ti makasapul iti tulong iti panagsublina, masapul a tulongan dagiti kaarrubana. Ikkanda iti pirak ken balitok, dadduma a masapsapul agraman animal a para-awit ken sagsagut a maidatag iti Templo ti Dios idiay Jerusalem.”

⁵Tinignay ti Dios ti puso dagiti papangulo ti familia iti tribu da Juda ken Benjamin, kasta met dagiti papadi ken Levita, agraman dagiti dadduma a tattao. Iti kasta, nagrubbuatda a mapan mangbangon manen iti Templo ni Yahweh idiay Jerusalem.

⁶Timmulong dagiti amin a kaarrubada ket nangtedda iti adu a kasapulan: pirak nga al-alikamen, balitok, abasto, animal a para-awit, agraman napapateg a bambanag ken sagsagut a maidatag iti Templo.

⁷Insubli pay ni Ciro dagiti malukong ken kopa nga innala idi ni Ari Nebucadnesar iti Templo idiay Jerusalem ken inkabilna iti templo dagiti didiosenna.

⁸Inyawatna ida ken ni Mitredat a pangulo ti tesoreria ti pagarian. Nangaramid ni Mitredat iti listaan dagitoy para ken ni Sesbasar a gobernador ti Juda.

⁹Dagitoy ti naited: malukong a balitok a maaramat iti panagidaton 30 malukong a pirak a maaramat iti panagidaton 1,000 dadduma pay a malukong 29 babassit a malukong a balitok 30 babassit a malukong a pirak 410 dadduma pay nga alikamen 1,000

¹¹Agdagup amin iti 5,400 dagiti balitok ken pirak a malukong ken dadduma pay nga alikamen nga intugot ni Sesbasar ken dagiti napagtalaw a kas balud idi pimmanawda idiay Babilonia tapno agsublida idiay Jerusalem.