Read Iloko Ezra 10 Bible Online

Ezra 10 - Iloko bible

Ezra 10

¹Sidudumog ni Ezra iti sangoanan ti Templo, ket agsangsangit a nangipudno kadagitoy a basbasol. Kabayatan ti panagkararagna, linawlaw ti adu nga Israelita—lallaki, babbai ken ubbing—nga agsangsangit met iti nasaem.

²Kinuna kenkuana ni Secanias nga anak ni Jehiel iti familia ni Elam, “Nagbasolkami iti Dios ta nangasawakami kadagiti babbai a ganggannaet, ngem uray no kasta, adda pay la namnama ti Israel.

³Ita, ikarimi a sipapasnek iti Diostayo a papanawenmi dagiti babbai ken dagiti annakmi kadakuada. Tungpalenmi ti balakadmo ken ti balakad dagiti dadduma nga agtungtungpal kadagiti bilin ti Dios. Aramidenmi ti mayannurot iti linteg ti Dios.

⁴Rebbengmo ti aggunay. Ibagam ti rumbeng a maaramid, ket sumurotkami kenka.”

⁵Pinagsapata ni Ezra dagiti pangulo dagiti papadi, pangulo dagiti Levita ken dagiti amin a tattao nga aramidenda ti insingasing ni Secanias.

⁶Kalpasanna, pimmanaw ni Ezra iti sangoanan ti Templo ket napan iti kuarto ni Jehohanan nga anak ni Eliasib. Pinalabasna ti rabii sadiay a pulos a saan a nangan ken imminum. Nagpatpatnag a dinungdung-awanna dagitoy nga Israelita gapu ta tinallikudanda ti Dios.

⁷Iti entero a Jerusalem ken Juda, adda naiwaragawag a bilin kadagiti nagsubli a napagtalaw nga aguummongda idiay Jerusalem.

⁸Naipakaammo pay a madusa ti siasinoman a saan a makadar-ay iti las-ud ti tallo nga aldaw, babaen ti bilin dagiti ofisiales ken dagiti panglakayen, masamsam dagiti sanikuana ket mapukawna ti kalinteganna a kas miembro ti komunidad.

⁹Iti uneg ti tallo nga aldaw, iti maika-20 nga aldaw iti maikasiam a bulan, dimteng dagiti amin a lallaki nga agnanaed iti sakup ti Juda ken Benjamin. Naguummongda iti plasa ti templo idiay Jerusalem. Agtudtudo idi iti napigsa. Agtigtigerger ti tunggal maysa gapu iti lamiis ti panawen ken gapu iti butengda iti nakaayabanda.

¹⁰Timmakder ni Ezra a padi ket kinunana kadakuada, “Nagsalungasingkayo babaen iti panangasawayo kadagiti babbai a ganggannaet. Gapu iti daytoy, pinadakkelyo ti basol ti Israel.

¹¹Ita ngarud, ipudnoyo dagiti basbasolyo iti Apo a Dios dagiti familiayo, ket aramidenyo ti pakaragsakanna. Adaywanyo dagiti ganggannaet nga agnanaed iti dagayo ket isinayo dagiti ganggannaet nga assawayo.”

¹²Impukkaw dagiti tattao, “Aramidenmi ti aniaman nga ibagam.”

¹³Ngem innayonda, “Adu unay dagiti tattao ket napigsa pay ti tudo; dimi maanusan ti agyan ditoy ruar. Maysa pay, saan a mabiit nga aramiden daytoy ta nakadagdagsen ti nagbasolanmi.

¹⁴Bay-am a dagiti ofisialesmi ti mangilungalong iti pannakarisut daytoy a kaso. Ikkam ti tunggal maysa nga addaan iti asawa a ganggannaet iti gundaway a dumatag iti naituding a tiempo, agraman dagiti papangulo ken ukom iti siudad a pagnanaedanna. Iti kasta, maikkat ti pungtot ti Dios.”

¹⁵Awan ti simmupring iti daytoy a plano malaksid ni Jonatan nga anak ni Asael ken ni Jazeyas nga anak ni Tikva. Kimmanunong da Mesullam ken Sabbetai a Levita kadakuada.

¹⁶Inaramid dagiti nagsubli a napagtalaw a kas balud ti naisingasing. Nangpili ni Ezra a padi kadagiti lallaki a nagtaud kadagiti pangulo dagiti familia ket inlistada dagiti naganda. Iti umuna nga aldaw ti maika-10 a bulan, rinugianda ti panagusig.

¹⁷Kalpasan ti tallo a bulan, nausig amin a kaso dagiti lallaki nga adda asawana a ganggannaet.

¹⁸Daytoy ti listaan dagiti nagasawa kadagiti ganggannaet a babbai: Dagiti papadi a nailista segun ti familiada: Iti familia ni Josue ken dagiti kakabsatna nga annak ni Josadac: Maasias, Eliezer, Jarib ken Gedalias.

¹⁹Inkarida nga isinada dagiti assawada, ket nangidatonda iti kalakian a karnero a pakapakawanan dagiti basbasolda.

²⁰Iti familia ni Immer: Hanani ken Zebadias.

²¹Iti familia ni Harim: Maasias, Elias, Semaias, Jehiel ken Uzzias.

²²Iti familia ni Pasur: Elioenai, Maasias, Ismael, Netanel, Josabad ken Elasa.

²³Dagiti Levita: Josabad, Simei, Kelaias (managan pay Kelita), Petahias, Juda ken Eliezer.

²⁴Dagiti musiko: Eliasib. Dagiti guardia ti Templo: Sallum, Telem ken Uri.

²⁵Dagiti dadduma nga Israelita: Iti familia ni Paros: Ramias, Izzias, Malkija, Mijamin, Eleazar, Malkija ken Benaias.

²⁶Iti familia ni Elam: Mattanias, Zacarias, Jehiel, Abdi, Jeremot ken Elias.

²⁷Iti familia ni Zattu: Elioenai, Eliasib, Mattanias, Jeremot, Zabad ken Aziza.

²⁸Iti familia ni Bebai: Jehohanan, Hananias, Zabbai ken Atlai.

²⁹Iti familia ni Bani: Mesullam, Malluk, Adaias, Jasub, Seal ken Jeremot.

³⁰Iti familia ni Pahat Moab: Adna, Kelal, Benaias, Maasias, Mattanias, Bezalel, Binnui ken Manases.

³¹Iti familia ni Harim: Eliezer, Issijas, Malkija, Semaias, Simeon, Benjamin, Malluk ken Semarias.

³³Iti familia ni Hasum: Mattenai, Mattatta, Zabad, Elifelet, Jeremai, Manases ken Simei.

³⁴Iti familia ni Bani: Maadai, Amram, Uel, Benaias, Bedeias, Keluhi, Vanias, Meremot, Eliasib, Mattanias, Mattenai ken Jaasu.

³⁸Iti familia ni Binnui: Simei, Selemias, Natan, Adaias, Maknadebai, Sasai, Sarai, Azarel, Selemias, Semarias, Sallum, Amarias ken Jose.

⁴³Iti familia ni Nebo: Jeiel, Mattitias, Zabad, Zebina, Jaddai, Joel ken Benaias.

⁴⁴Ganggannaet ti assawa amin dagitoy a lallaki. Insinada dagiti assawada ket pinapanawda ida agraman dagiti annakda.