Read Iloko Ezra 4 Bible Online

Ezra 4 - Iloko bible

Ezra 4

¹Nadamag dagiti kabusor dagiti tattao ti Juda ken Benjamin a bangbangonen manen dagiti nagsubli nga Israelita a napagtalaw a kas balud ti Templo ni Yahweh a Dios ti Israel.

²Napanda ngarud ken ni Zerubbabel ken kadagiti papangulo dagiti familia ket kinunada: “Tulongandakayo a mangbangon iti templo. Agdaydayawkam iti isu met laeng a Dios a pagdaydayawanyo. Nagidatdatagkami kenkuana kadagiti daton manipud imbaonnakami nga agnaed ditoy ni Esarhadon nga ari ti Asiria.”

³Ngem imbaga da Zerubbabel, Josue ken dagiti papangulo dagiti familia, “Saanmi a masapul ti tulongyo iti panangbangonmi iti templo ti Apo a Diosmi. Dakam a mismo ti mangbangon, ta kasta ti imbilin ni Ciro nga emperador ti Persia.”

⁴Gapu iti daytoy, pinadas dagiti umili iti dayta a daga a pasardengen ti pannakabangon ti templo. Inupay ken binutbutengda dagiti Judio.

⁵Pinasuksokanda pay dagiti ofisiales ti gobierno ti Persia tapno saan nga ituloy dagiti Israelita ti panggepda. Kasta ti inar-aramidda bayat ti panagturay ni Emperador Ciro agingga iti panagturay ni Emperador Dario.

⁶Idi mangrugi ti panagturay ni Emperador Xerxes, nangidatag dagiti kabusor dagiti tattao nga agnaed iti Juda ken Jerusalem kadagiti naisurat a darumda kadakuada.

⁷Bayat ti panagturay ni Artaxerxes nga emperador ti Persia, indarum ida da Bislam, Mitredat, Tabeel ken dagiti kakaduada. Nailanad dagiti pammabasolda iti maysa a surat a naiturong iti emperador. Arameo ti naaramat iti surat ket maipatarus iti pagsasao ti Persia no maibasa.

⁸Nagsurat met da Rehum a gobernador ken Simsai a sekretario ti probinsia. Kastoy ti suratda ken ni Emperador Artaxerxes maipapan iti Jerusalem:

⁹“Naggapu daytoy a surat kada Rehum a gobernador, Simsai a sekretario ti probinsia ken dagiti kakaduana, dagiti ukom ken amin nga ofisiales a sigud nga umili iti Erec, Babilonia, ken Susa iti pagilian ti Elam,

¹⁰ken dagiti dadduma a tattao nga impanaw ni nabileg ken naindaklan nga Asurbanipal ket pinagnaedna ida iti siudad ti Samaria ken iti probinsia ti Laud-ti-Eufrates.”

¹¹Daytoy ti linaon ti surat: “Patgenmi nga Emperador Artaxerxes: Surat daytoy dagiti adipenmo iti probinsia ti Laud-ti-Eufrates.

¹²“Kayatmi nga ipakaammo kenka, Natan-ok nga Emperador, nga agnaeden iti Jerusalem dagiti Judio a naggapu kadagiti nadumaduma a sakupmo. Bangbangonenda manen dayta managdakdakes ken nasukir a siudad. Tartarimaanendan dagiti pamuon ket dandanidan malpas ti bakud.

¹³Natan-ok nga Emperador, no mabangon manen dayta a siudad ket malpasda dagiti bakudna, dinton kayat dagiti tattao ti agbayad iti buis ket bumassit ti mapastrek ti pagarian.

¹⁴Ita, gapu ta adda pagrebbenganmi kenka, Natan-ok nga Emperador, dimi kayat a mapasamak daytoy, isu nga isingasingmi a

¹⁵mangipaulogka iti bilin a masukimat dagiti libro nga indulin dagiti kapuonam. No aramidem daytoy, matakuatamto a nasukir dayta a siudad. Manipud idi un-unana, parikuten dagiti ar-ari ken agtuturay iti probinsia. Narigat nga iturayan dagiti umili iti dayta a siudad. Dayta ti gapuna a nadadael ti Jerusalem.

¹⁶Ngarud, kapkapnekanmi a no mabangon manen dayta a siudad ken malpas dagiti bakudna, saanmonton a maiturayan ti probinsia ti Laud-ti-Eufrates.”

¹⁷Daytoy ti sungbat ti emperador nga impatulodna: “Patgek a gobernador Rehum, Simsai a sekretario ken dagiti kakaduayo nga agnaed iti Samaria ken kadagiti dadduma a paset ti probinsia ti Laud-ti-Eufrates. Kablaawankayo.

¹⁸“Naipatarus ti impatulodyo a surat ket naibinsabinsada kaniak.

¹⁹Imbilinko a maisayangkat ti maysa a panagsukimat ket natakuatak a manipud idi un-unana, nagsukir ti Jerusalem iti turay ti ari. Naammoak nga adu ti nasukir a tattao iti dayta a siudad. Nalaingda a mangpataud iti riribuk.

²⁰Mamaingel nga ari ti nagturay iti Jerusalem, ket inturayanda ti entero a probinsia ti Laud-ti-Eufrates. Nagsingirda iti buis ken kuarta a nagtaud iti nadumaduma a pamastrekan.

²¹Mangipaulogkayo ngarud iti bilin a sumardeng dagiti Judio a mangbangon manen iti dayta a siudad agingga nga adda sabali a bilinko.

²²Tungpalenyo a dagus daytoy tapno saan a madegdegan ti pannakadangran ti pagarian.”

²³Apaman a naibasa daytoy a surat ni Emperador Artaxerxes ken ni Rehum, Simsai ken kadagiti kakaduada, nagdardarasda a napan idiay Jerusalem. Pinilitda dagiti Judio nga isardengda ti trabahoda.

²⁴Naisardeng idi ti pannakabangon ti Templo ket saan a nasagsagid agingga iti maikadua a tawen a panagturay ni Dario nga emperador ti Persia.