Read Iloko Ezra 5 Bible Online

Ezra 5 - Iloko bible

Ezra 5

¹Iti dayta a tiempo, dua a profeta, da Haggeo ken Zacarias nga anak ni Iddo, ti nangikasaba kadagiti sao ti Dios ti Israel kadagiti Judio nga agnaed iti Juda ken Jerusalem.

²Idi mangngeg da Zerubbabel nga anak ni Salatiel ken ni Josue nga anak ni Josadac dagitoy a mensahe, inrugida manen a bangonen ti Templo. Tinulongan dagiti dua a profeta ida.

³Napan a dagus idiay Jerusalem ni Tattenai a gobernador ti Laud-ti-Eufrates ken ni Setar Bozenai agraman dagiti padada nga ofisiales ket sinaludsodda, “Siasino ti nangbilin kadakayo a bangonenyo manen daytoy a Templo ket ikabilyo dagiti alikamenna?”

⁴Sinaludsodda pay ti nagnagan dagiti tumultulong iti pannakabangon ti Templo.

⁵Ngem bambantayan ti Dios dagiti papangulo a Judio ket inkeddeng dagiti ofisiales ti Persia a baybay-anda pay la ida agingga a makapagsuratda ken ni Emperador Dario ken maawatda ti sungbatna.

⁶Kastoy ti impadamagda iti emperador:

⁷“Patgenmi nga Emperador Dario: Sapay koma ta natalna ti panagturaymo.

⁸“Kayatmi nga ipakaammo, Natan-ok nga Emperador, a napankam iti probinsia ti Juda ket natakuatanmi a mabangbangon manen ti Templo ti Naindaklan a Dios. Dadakkel a bato ti aramaten dagiti tattao ket kayo dagiti pasanggir a maikamang iti bakud. Nagagetda nga agtrabaho ket adu ti malpas iti inaldaw.

⁹“Sinaludsodmi kadagiti panguloda no siasino ti nangbilin kadakuada a mangbangon manen iti Templo ken mangikabil kadagiti alikamenna.

¹⁰Dinamagmi pay ti nagnaganda tapno maipakaammomi kenka no siasino dagiti mangidadaulo iti trabaho.

¹¹Insungbatda nga adipen ida ti Dios ti langit ken daga, ket bangbangonenda manen ti Templo. Maysa kano a mannakabalin nga ari ti Israel ti nangbangon iti daytoy ken nangikabil kadagiti amin nga alikamenna. Adun a tawen ti napalabas manipud pannakaipatakderna.

¹²Gapu ta pinagpungtot dagidi kapuonanda ti Dios ti langit, inyawatna ida iti pannakabalin ni Nebucadnesar nga ari ti Babilonia a maysa a Caldeo. Nadadael ti Templo ket naipan dagiti tattao a kas balud idiay Babilonia.

¹³Kalpasanna, kunada nga idi umuna a tawen a panagturay ni Ciro nga emperador ti Babilonia, impaulogna ti bilin a mabangon manen ti Templo.

¹⁴Kunada pay a pinaisubli ni Ciro dagiti alikamen a balitok ken pirak nga innala ni Nebucadnesar iti Templo idiay Jerusalem ket impanna iti templo idiay Babilonia. Inyawat ni Emperador Ciro dagitoy nga alikamen iti maysa a tao nga agnagan Sesbasar a dinutokanna a gobernador ti Juda.

¹⁵Imbaga ti emperador kenkuana nga alaenna dagiti alikamen ket isublina iti Templo idiay Jerusalem. Imbagana pay a bangonenna manen ti Templo iti lugar a nakaisaadanna idi.

¹⁶Iti kasta, napan ni Sesbasar ket insaadna ti fondasion. Manipud idi agingga ita, nagtultuloy ti trabaho ngem saan pay a nalpas.

¹⁷Ngarud, no pagayatam, Natan-ok nga Emperador, pasukimatmo koma dagiti libro ti pagarian ti Babilonia tapno maammoan no adda wenno awan ti bilin nga impaulog ni Emperador Ciro a mabangon manen ti Templo ti Jerusalem. Ipakaammomto kadakami ti pagayatam maipapan iti daytoy a banag.”