Read Iloko Ezra 6 Bible Online

Ezra 6 - Iloko bible

Ezra 6

¹Impaulog ngarud ni Emperador Dario ti bilin a masukimat dagiti libro ti pagarian a naidulin idiay Babilonia.

²Ngem iti siudad ti Ecbatana, iti probinsia ti Media, ti nakasarakanda iti maysa a nalukot a pagbasaan. Kastoy ti nailanad:

³“Iti umuna a tawen a panagturay ni Emperador Ciro, imbilinna a mabangon manen ti Templo idiay Jerusalem a kas lugar a pakaidatagan dagiti sagut ken daton a mapuoran. Siam a pulo a kadapan ti kangato ket 90 a kadapan ti kaakaba ti Templo.

⁴Iti pannakabangon dagiti bakud, adda maibaet a kayo iti tunggal tallo a katuon a batbato. Aggapunto iti tesoreria ti pagarian ti amin a magasto.

⁵Kasta met a dagiti balitok ken pirak nga alikamen nga innala ni Ari Nebucadnesar iti Templo ti Jerusalem nga impanna idiay Babilonia, maisublida iti sigud a lugarda iti Templo ti Jerusalem.”

⁶Kastoy ti sungbat ni Emperador Dario: “Kadakayo, Tattenai a gobernador iti Laud-ti-Eufrates, Setar Bozenai ken dagiti padayo nga ofisiales iti probinsia. “Adaywanyo ti Templo.

⁷Dikay bumibiang iti pannakabangonna. Palubosanyo ti gobernador ti Juda ken dagiti papangulo a Judio a mangbangon manen iti Templo ti Dios iti sigud a nakabangonanna.

⁸Maysa pay, ibilinko nga aramidenyo ti annongenyo kadagiti papangulo maipapan iti pannakabangon manen ti Templo. Itedyo a dagus dagiti amin a magastoda tapno saan a mataktak ti trabaho. Aggapu iti pondo ti pagarian ti mabusbos a buis a nasingir iti Laud-ti-Eufrates.

⁹Masapul nga itedyo iti inaldaw ti amin a masapul dagiti papadi dita Jerusalem. Itedyo ti aniaman nga ibagada a masapulda: dagiti bumaro a baka, karnero wenno urbon ti karnero a mapuoran a daton iti Dios ti langit, agraman trigo, asin, arak wenno lana ti olibo.

¹⁰Masapul a maaramid daytoy tapno makaidatagda kadagiti daton a pakaragsakan ti Dios ti langit, ken mabalinda a dawaten ti pammendisionna kaniak ken kadagiti annakko.

¹¹No adda mangsalungasing iti daytoy a bilin, maikkat ti maysa a pasanggir ti balayna, mapatirad ti murdong ti pasanggir a maiduyok iti bagina. Marakrak ti balayna ket agbalin a gabsuon ti rugit.

¹²Sapay koma ta parmeken ti Dios a nangpili iti Jerusalem a lugar a pagdaydayawan dagiti tattao kenkuana ti siasinoman nga ari wenno nasion a mangsalungasing iti daytoy a bilin wenno agpanggep a mangdadael iti Templo. Masapul a matungpal nga awan ti pagkuranganna daytoy impaulogko a bilin. Emperador Dario.”

¹³Tinungpal da Gobernador Tattenai, Setar Bozenai ken dagiti padada nga ofisiales ti amin a bilin ti emperador.

¹⁴Napardas ti trabaho dagiti papangulo a Judio iti pannakabangon ti Templo ta pinapigsa ida da profeta Haggeo ken profeta Zacarias. Nalpasda ti Templo kas imbilin ti Dios ti Israel ken kas imbilin dagiti emperador ti Persia—da Ciro, Dario ken Artaxerxes.

¹⁵Nalpasda iti maikatlo nga aldaw ti bulan a maaw-awagan iti Adar, iti maikanem a tawen a panagturay ni Emperador Dario.

¹⁶Siraragsak dagiti amin nga Israelita a nangikonsagrar iti Templo—dagiti papadi, dagiti Levita ken dagiti amin a nagsubli a napagtalaw a kas balud.

¹⁷Iti pannakaikonsagrar ti templo, nangidatonda iti 100 a toro a baka, 200 a karnero ken 400 nga urbon ti karnero. Nangidatagda pay iti 12 a kalding a daton gapu iti basol—maysa ti agpaay iti tunggal tribu ti Israel.

¹⁸Binunggo-bunggoyda dagiti papadi ken dagiti Levita nga agserbi iti Templo idiay Jerusalem, kas mayallubog iti alagaden a nailanad iti Libro ni Moises.

¹⁹Iti sumuno a tawen, iti maika-14 nga aldaw ti umuna a bulan, narambakan ti Fiesta ti Paskua. Rinambakan daytoy dagiti Israelita a nagsubli manipud iti sabali a pagilian a nakaibellenganda.

²⁰Dinalusan dagiti amin a papadi ken dagiti Levita ti bagbagida ket naibilangda amin a nadalus iti imatang ti linteg. Pinartida dagiti animal a daton iti Fiesta ti Paskua nga agpaay kadagiti nagsubli, kadagiti padada a papadi ken agpaay kadakuada.

²¹Nangan dagiti nagsubli nga Israelita. Nangan met dagiti amin a tattao a nangbaybay-a kadagiti ugali dagiti pagano nga agnanaed sadiay ken dimmar-ay tapno agdaydayawda ken ni Yahweh a Dios ti Israel.

²²Pito nga aldaw a rinambakanda a siraragsak ti Fiesta ti Tinapay nga awan Lebadurana. Naragsakda gapu ta tinignay ni Yahweh ti emperador ti Asiria tapno tulonganna ida iti pannakabangon manen ti Templo ti Dios ti Israel.