Read Iloko Nehemiah 1 Bible Online

Nehemiah 1 - Iloko bible

Nehemiah 1

¹Daytoy ti salaysay ni Nehemias nga anak ni Hacalias. Siak ni Nehemias. Addaak idi idiay Susa a kabesera a siudad, iti bulan ti Kislev, iti maika-20 a tawen a panagturay ni Artaxerxes nga emperador.

²Immay sadiay ni Hanani a maysa kadagiti kakabsatko ken ti sumagmamano a lallaki. Naggapuda idiay Juda. Dinamagko kadakuada ti kasasaad dagiti nagsubli a Judio, isuda a naitalaw idi a kas balud, ken ti Jerusalem.

³Imbagada nga agsagsagabada iti kasta unay ket lalaisen ida dagiti ganggannaet nga agnanaed iti kabangibang a lugar. Saan pay kano a nabangon dagiti bakud ti Jerusalem, ket di pay natarimaan dagiti nauram a ruanganna.

⁴Idi mangngegko daytoy, nagtugawak ket nagsangitak. Adu nga aldaw a nagladladingitak ket saanak a nangnangan. Nagkararagak iti Dios.

⁵Kinunak, “Apo a Dios ti Langit! Naindaklanka, ket agbutengkami kenka. Mapagtalkanka ket tungpalem ti katulagam kadagiti tattao nga agayat kenka ken agtungpal kadagiti bilbilinmo.

⁶Kitaennak, O Apo, ket denggem ti kararagko iti aldaw ken rabii a panangidawdawatko kadagiti Israelita nga adipenmo. Ipudnok a nagbasolkami, dakami nga Israelita. Wen, nagbasolkami, siak ken dagiti kapuonak.

⁷Dakes dagiti inaramidmi ket maibusorda kenka. Dimi tinungpal dagiti bilin ken linteg nga intedmo babaen ken ni Moises nga adipenmo.

⁸Lagipem ita ti imbagam ken ni Moises, ‘Dakayo nga Israelita, no saankayo nga agtalinaed a napudno kaniak, iwaraswaraskayto kadagiti amin a nasion.

⁹Ngem no agsublikayo kaniak ket aramidenyo dagiti imbilbilinko kadakayo, isublikayto iti lugar a pinilik a pagdaydayawanyo kaniak, uray pay no naiwarawarakayo agingga iti ungto ti daga.’

¹⁰“O Apo, dagitoy dagiti adipenmo, wen, dagiti tattaom. Inispalmo ida babaen iti naindaklan a pannakabalin ken bilegmo.

¹¹Timudem koma ti kararagko ken dagiti kararag dagiti amin nga adipenmo a mayat nga agdayaw kenka. Pagballigiennak ita nga aldaw, ket tignayem ti ari tapno kaasiannak.” Kadagidi nga aldaw, siak ti nangimaton iti pannakaiserbi ti arak iti lamisaan ti ari.