Read Iloko Nehemiah 2 Bible Online

Nehemiah 2 - Iloko bible

Nehemiah 2

¹Bulan idi ti Nisan, iti maika-20 a tawen a panagturay ni Artaxerxes. Iti maysa nga aldaw a mangmangan ti ari, impanko ti arak kenkuana. Idi pay laeng a nadlawna a nalidayak, isut'

²gapuna a sinaludsodna, “Apay a nalidayka? Apay a saanka a naragsak idinto a saanka met a masakit?” Nagdanagak iti daytoy,

³ket kinunak, “Agbiag koma ti Natan-ok nga Ari iti agnanayon! Kasano a mailingedko ti lidayko? Rebba pay laeng ti siudad a nakaitaneman dagiti kapuonak ken di pay nabangon dagiti nauram a ruanganna.”

⁴Sinaludsod ti ari, “Ania ngarud ti kayatmo?” Nagkararagak iti Dios ti Langit

⁵ket kalpasanna, kinunak iti ari, “No maragsakan kaniak ti Natan-ok nga Ari ket kayatna a patgan ti dawatko, palubosannak koma a mapan idiay Juda tapno bangonek manen ti siudad a nakaitaneman dagidi kapuonak.”

⁶Agtugtugaw idi ti reyna iti abay ti ari. Sinaludsod ti ari no kasano ti kabayag ti kaawanko ken kaano nga agsubliak. Imbagak kenkuana ket immannugot iti dawatko.

⁷Kalpasanna, dinawatko iti ari a pakuyogannak kadagiti suratna para kadagiti gobernador iti probinsia iti Laud-ti-Eufrates ket ibilinna a kitaenda nga awan pakaan-anoak agingga a makadanonak idiay Juda.

⁸Indawatko pay a suratanna ni Asaf, ti agay-aywan iti bakir a kukua ti ari tapno ikkannak kadagiti kayo a masapul kadagiti ruangan ti sarikedked ti Templo, kadagiti bakud ti siudad ken iti balay a pagnaedak. Pinatgan ti ari ti amin a dawatko agsipud ta adda ti Dios kaniak.

⁹Pinakuyogannak ti ari iti sumagmamano nga ofisiales ti armada ken maysa a bunggoy dagiti mannakigubat a nagkabalio. Nagturongak iti Laud-ti-Eufrates ket intedko dagiti surat ti ari kadagiti gobernador.

¹⁰Ngem nakapungtot ni Sanballat a taga-Bet Horon ken ni Tobias nga ofisial nga Ammonita idi nadamagda nga adda simmangpet nga agtrabaho iti pagimbagan dagiti Israelita.

¹¹Nagtarusak idiay Jerusalem ket nagyanak sadiay iti tallo nga aldaw.

¹²Awan nangibagbagaak iti imbilin ti Dios kaniak nga aramidek iti Jerusalem. Iti tengnga ti rabii, bimmangonak, inayabak ti sumagmamano kadagiti kakaduak ket rimmuarkami. Ti la nagsakayak nga asno ti intugotmi nga animal.

¹³Rabii pay laeng idi panawak ti siudad. Nagnaak iti Ruangan ti Tanap iti laud, ket nagpa-abagatanak iti Burayok ti Dragon saak nagturong iti Ruangan a Pagibellengan iti Rugit. Bayat ti ilalabasko, sinukimatko dagiti narba a bakud ti siudad ken dagiti ruangan a nauram.

¹⁴Kalpasanna, nagpa-amiananak a napan iti Ruangan ti Ubbog ken iti Tangke ti Ari. Awan mabalin a pagnaan ti asno a pagsaksakayak kadagiti rebba,

¹⁵isu a nagturongak iti tanap ket intultuloyko a sinukimat ti bakud. Kalpasanna, nagsubliak iti siudad, iti isu met laeng a nagnaak iti Ruangan ti Tanap.

¹⁶Saan nga ammo dagiti agtuturay iti siudad no sadino ti napanak wenno ania ti ar-aramidek. Awan pay ngamin imbagbagak kadagiti Judio—kadagiti papadi, kadagiti papangulo, kadagiti ofisiales, wenno iti siasinoman a makipagtrabahonto.

¹⁷Kinunak kadakuada, “Makitayo ti agdama a parikuttayo. Narba ti Jerusalem ket nauram dagiti ruanganna. Agtitinnulongtayo a mangbangon manen kadagiti bakud tapno saantayon a maibabain.”

¹⁸Imbagak kadakuada no kasano ti panangtarabay ken panangtulong ti Dios kaniak. Imbagak met kadakuada ti sao kaniak ti ari. “Rugiantayo ngaruden,” insungbatda, isu a nagsaganada a mangirugi iti trabaho.

¹⁹Ngem idi madamag da Sanballat, Tobias ken Gesem nga Arabo ti aramidenmi, kinatkatawaan ken linalaisdakami. Kinunada, “Ania ti kayatyo a paneknekan iti daytoy nga aramidenyo? Busorenyo kadi ti ari?”

²⁰“Pagballigiennakaminto ti Dios ti Langit,” insungbatko. “Dakami dagiti adipenna ket rugianmin ti agbangon. Awan ti kalinteganyo a mangtagikua iti aniaman iti Jerusalem, ket awan met pasetyo iti pakasaritaanna.”