Read Iloko Nehemiah 3 Bible Online

Nehemiah 3 - Iloko bible

Nehemiah 3

¹Kastoy ti pannakabangon manen ti bakud ti siudad. Ni Eliasib a Nangato a Padi ken dagiti padana a papadi ti nangbangon iti Ruangan ti Karnero. Kinonsagrarda ti ruangan ket insublida dagiti ridaw iti lugarda. Binangonda manen ti bakud agingga iti Torre dagiti Sangagasut ken iti Torre ni Hananel.

²Dagiti lallaki a taga-Jerico ti nangtarimaan iti sumaruno a paset. Ni Zaccur nga anak ni Imri ti nangbangon iti sumaruno a paset.

³Dagiti lallaki nga annak ni Hassenaa ti nangbangon iti Ruangan ti Ikan. Inkabilda dagiti aoanan ken dagiti ridaw, ket inkabilda dagiti pagibalunetan ken dagiti balunet a pangserra iti ruangan.

⁴Ni Meremot nga anak ni Urias ken apoko ni Hakkoz ti nangbangon iti sumaruno a paset. Ni Mesullam nga anak ni Barakias ken apoko ni Mesezabel ti nangbangon iti sumaruno a paset. Ni Zadok nga anak ni Baana ti nangbangon iti sumaruno a paset.

⁵Dagiti lallaki a taga-Tekoa ti nangbangon iti sumaruno a paset. Ngem di kayat dagiti mabigbigbig a lallaki iti ili ti agtrabaho iti nadagsen, ti trabaho nga inted dagiti mangimaton kadakuada.

⁶Ni Joyada nga anak ni Pasea ken ni Mesullam nga anak ni Besodias ti nangbangon iti Ruangan ti Jesana. Inkabilda dagiti aoanan ken ridaw, kasta met dagiti pagibalunetan ken dagiti balunet a pangserra iti ruangan.

⁷Ni Melatias a taga-Gabaon, ni Jadon a taga-Meronot ken dagiti lallaki a taga-Gabaon ken Mizpa ti nangbangon iti sumaruno a paset. Nagpatinggada iti pagtaengan ti gobernador ti Laud-ti-Eufrates.

⁸Ni Uzziel nga anak ni Harhaias ken platero ti nangbangon iti sumaruno a paset. Ni Hananias nga agar-aramid iti bangbanglo ti nangbangon iti sumaruno a paset agingga iti Akaba a Bakud.

⁹Ni Refaias nga anak ni Hur, ti mangituray iti kagudua ti Distrito ti Jerusalem, ti nangbangon iti sumaruno a paset.

¹⁰Ni Jedaias nga anak ni Harumaf ti nangbangon iti sumaruno a paset, nga adda iti asideg ti balayna. Ni Hattus nga anak ni Hasabneyas ti nangbangon iti sumaruno a paset.

¹¹Ni Malkija nga anak ni Harim ken ni Hassub nga anak ni Pahat Moab ti nangbangon iti sumaruno a paset ken iti Torre dagiti Urno.

¹²Ni Sallum nga anak ni Hallohes, ti mangituray iti sabali a kagudua ti Distrito ti Jerusalem, ti nangbangon iti sumaruno a paset. (Tinulongan dagiti babbai nga annakna.)

¹³Ni Hanun ken dagiti agnaed iti siudad ti Zanoa ti nangbangon manen iti Ruangan ti Tanap. Inkabilda dagiti ridaw iti sigud a lugarda, inkapetda dagiti pagibalunetan ken dagiti balunet ti ruangan, ket tinarimaanda ti paset ti bakud a 1,500 a kadapan ti kaatiddog agingga iti Ruangan a Pagibellengan iti Rugit.

¹⁴Ni Malkija nga anak ni Rekab, ti mangituray iti Distrito ti Bet Hakkerem, ti nangbangon iti Ruangan a Pagibellengan iti Rugit. Inkabilna dagiti ridaw iti sigud a lugarda kasta met dagiti pagibalunetan ken dagiti balunet ti ruangan.

¹⁵Ni Sallum nga anak ni Colhoze, ti mangituray iti Distrito ti Mizpa, ti nangbangon iti Ruangan ti Ubbog. Ginaburanna ti pagnaan, inkabilna dagiti ruangan iti sigud a lugarda ket inkapetna dagiti pagibalunetan ken dagiti balunet ti ruangan. Iti asideg ti Tangke ti Sela, binangonna ti bakud a dumna iti hardin ti ari agingga iti agdan nga agpababa nga aggapu iti Siudad ni David.

¹⁶Ni Nehemias nga anak ni Azbuk, ti mangituray iti kagudua ti Distrito ti Bet-zur, ti nangbangon iti sumaruno a paset, agingga iti tanem ni David, ti tangke ken ti kampo dagiti mannakigubat.

¹⁷Dagitoy dagiti Levita a nangbangon manen kadagiti dadduma a paset ti bakud. Ni Rehum nga anak ni Bani ti nangbangon iti sumaruno a paset. Ni Hasabias a mangituray iti kagudua ti Distrito ti Keila ti nangbangon iti sumaruno a paset iti nagan ti distritona.

¹⁸Ni Bavvai nga anak ni Henadad, ti mangituray iti sabali a kagudua ti Distrito ti Keila, ti nangbangon iti sumaruno a paset.

¹⁹Ni Ezer nga anak ni Jesua, ti mangituray iti Mizpa, ti nangbangon iti sumaruno a paset, iti sangoanan ti pagiduldulinan iti armas agingga iti pagsikkoan ti bakud.

²⁰Ni Baruc nga anak ni Zabbai ti nangbangon iti sumaruno a paset agingga iti pagserkan ti balay ni Eliasib a Nangato a Padi.

²¹Ni Meremot nga anak ni Urias ken apoko ni Hakkoz ti nangbangon iti sumaruno a paset, agingga iti ungto ti balay ni Eliasib.

²²Dagitoy dagiti papadi a timmulong iti pannakabangon manen ti bakud. Dagiti papadi nga agnaed iti lawlaw ti Jerusalem ti nangbangon iti sumaruno a paset.

²³Da Benjamin ken Hassub ti nangbangon iti sumaruno a paset, iti sangoanan dagiti balbalayda. Ni Azarias nga anak ni Maaseias ken apoko ni Ananias ti nangbangon iti sumaruno a paset, iti sango ti balayna.

²⁴Ni Binnui nga anak ni Henadad ti nangbangon iti sumaruno a paset, manipud iti balay ni Azarias agingga iti suli ti bakud.

²⁵Ni Palal nga anak ni Uzai ti nangbangon iti sumaruno a paset, manipud iti suli ken iti torre ti akingngato a palasio iti paraangan ti guardia. Ni Pedaias nga anak ni Paros ti nangbangon iti sumaruno a paset agingga iti daya iti asideg ti Ruangan ti Danum ken ti torre a pagguardiaan iti Templo. (Asideg daytoy iti paset ti siudad, iti maysa a lugar a managan Ofel a pagnanaedan dagiti agtartrabaho iti Templo.)

²⁷Dagiti lallaki a taga-siudad ti Tekoa ti nangbangon iti sumaruno a paset, manipud iti kasumbangir ti dakkel a torre a pagguardiaan iti Templo agingga iti bakud iti asideg ti Ofel. Daytoy ti maikadua a binangonda.

²⁸Maysa a grupo dagiti papadi ti nangbangon iti sumaruno a paset, manipud iti Ruangan ti Kabalio nga agpa-amianan. Binangon ti tunggal maysa ti bakud iti sangoanan ti balayna.

²⁹Ni Zadok nga anak ni Immer ti nangbangon iti sumaruno a paset, iti sango ti balayna. Ni Semaias nga anak ni Secanias, ti agay-aywan iti Akindaya a Ruangan, ti nangbangon iti sumaruno a paset.

³⁰Ni Hananias nga anak ni Selemias ken ni Hanun a maikanem nga anak ni Zalaf ti nangbangon iti sumaruno a paset. Daytoy ti maikadua a binangonda. Ni Mesullam nga anak ni Barakias ti nangbangon iti sumaruno a paset, iti sangoanan ti pagnanaedanna.

³¹Ni Malkija a platero ti nangbangon iti sumaruno a paset agingga iti patakder nga us-usaren dagiti agtartrabaho iti Templo ken dagiti komersiante iti abay ti ruangan nga agturong iti Templo, iti asideg ti kuarto iti ngatoen ti amianan-a-daya ti suli ti bakud.

³²Dagiti platero ken dagiti komersiante ti nangbangon iti sumaruno a paset, manipud iti kuarto iti suli agingga iti Ruangan ti Karnero.