Read Iloko Nehemiah 4 Bible Online

Nehemiah 4 - Iloko bible

Nehemiah 4

¹Kasta unay ti pungtot ni Sanballat idi nadamagna a bangbangonenmi manen ti bakud. Rinugianna ti nanglais kadakami a Judio.

²Kinunana iti sangoanan dagiti kakaduana ken dagiti mannakigubat a Samaritano, “Ania ti kayat a paneknekan dagitoy nakakaasi a Judio iti daytoy nga ar-aramidenda? Kayatda kadi a bangonen manen ti siudad? Ipagarupda aya a babaen iti panagidatagda kadagiti daton, malpasda ti trabaho iti maysa nga aldaw? Mabalinda aya a pagbangon dagiti nauram ken naburburak a batbato?”

³Agtaktakder idi ni Tobias nga Ammonita iti abay ni Sanballat. Innayonna, “Ania met ti bangbangonenda? Nalaka a matuang—uray musang laeng ti magna, marsuoden.”

⁴Inkararagko, “O Dios, denggem ti panangrabrabakda kadakami. Agdissuor koma kadakuada ti pananglalaisda kadakami. Masamsam koma amin a sanikuada, ket maitalawda a kas balud iti sabali a daga.

⁵Dimo pakawanen ti dakes nga aramidda, ket dimo liplipatan dagiti basolda, agsipud ta pabpabainandakami iti ar-aramidenmi.”

⁶Intuloymi latta a binangon ti bakud, ket iti saan a nabayag, naguduamin ti katayagna, gapu ta napasnek dagiti tattao nga agtrabaho.

⁷Kasta unay ti pungtot da Sanballat ken Tobias, kasta met dagiti taga-Arabia, Ammon ken Asdod, idi madamagda nga agtultuloy latta ti pannakabangon ti bakud ti Jerusalem, ket dandanin maserraan dagiti giwangna.

⁸Iti kasta, nagtutulagda a rauten ti Jerusalem ken mangriribukda.

⁹Ngem nagkararagkami iti Diostayo, ket nangdutokkami kadagiti lallaki nga agguardia iti aldaw ken iti rabii.

¹⁰Kinuna dagiti taga-Juda, “Kumapuykami nga agbagbagkat iti nadagsen. Adu unay ti bato a bunagenmi. Saanmi a kabaelan a bangonen ti bakud.”

¹¹Impagarup dagiti kabusormi a saanmi nga ammo wenno makita ti panggepda a mangraut ken agpapatay kadakami tapno agsardengen ti trabahomi.

¹²Kanayon nga umay dagiti Judio nga agnaed kadagiti lugar dagiti kabusormi ket binallaagandakami iti naminsangapulo maipapan iti dakes a panggepda.

¹³Inarmasak ngarud dagiti tattao iti kampilan, pika ken pana ket impuestok ida iti likudan dagiti bakud a di pay nalpas. Impuestok ida segun ti familiada.

¹⁴Nadlawko a madanagan dagiti tattao, isut' gapuna a kinunak kadakuada, kadagiti papangulo ken ofisialesda, “Dikay agbuteng kadagiti kabusortayo! Laglagipenyo a naindaklan ken makaam-amak ti Apo. Isu ti makigubat a mangsalaknib kadagiti kailianyo, kadagiti annakyo, kadagiti assawayo ken kadagiti balbalayyo.”

¹⁵Nadamag dagiti kabusormi a naammoanmi ti gandatda ket nabigbigda a saan a pinagballigi ti Dios dagiti panggepda. Iti kasta, intuloymi a binangon ti bakud.

¹⁶Manipud idin, kagudua ti bilang dagiti tattao ti nagtrabaho, ket ti kagudua ti nagguardia. Nakaarmas dagiti guardia iti gayang, kalasag, pana ken sikakabalda. Inted dagiti papangulo ti naan-anay a tulongda kadagiti taga-Juda

¹⁷a mangtartarimaan iti bakud. Uray pay ti agbunag kadagiti materiales, iggemna dagitoy iti maysa nga imana idinto nga igam ti petpetpetan ti maysa.

¹⁸Sibabarikes latta iti kampilan dagiti agbangbangon bayat ti panagtrabahoda. Adda iti abayko ti mangpuyot iti trumpeta a pangballaag kadagiti tattao.

¹⁹Kinunak kadagiti tattao, kadagiti ofisiales ken papanguloda, “Atiddog ti bakud a tartrabahoentayo ket agaaddayotayo.

²⁰No mangngegyo ti trumpeta a mapuyot a kas ballaag, lawlawendak. Ti Diostayo ti makigubat a mangsalaknib kadatayo.”

²¹Inaldaw a kasta ti aramidmi. Manipud parbangon agingga iti rabii nga agparang dagiti bituen, kagudua ti agtrabaho, ket ti kagudua agguardiada a nakaiggem iti gayang.

²²Kabayatan dayta a tiempo, imbagak kadagiti amin a lallaki a mangimaton nga agyanda idiay Jerusalem iti rabii, agraman dagiti amin a katulonganda, tapno maguardiaanmi ti siudad iti rabii ket agtrabahokami iti aldaw.

²³Diak uksoben dagiti pagan-anayko uray iti rabii, kasta met dagiti kakaduak, wenno dagiti adipenko, wenno dagiti guardiak. Iggemmi latta dagiti armasmi, uray no inkam sumakdo.