Read Iloko Nehemiah 5 Bible Online

Nehemiah 5 - Iloko bible

Nehemiah 5

¹Dimteng ti panawen a nagreklamo dagiti tattao, lallaki ken babbai, gapu iti aramid dagiti padada a Judio.

²Adda dagiti nagkuna, “Adukami a sangafamiliaan. Masapulmi ti taraon tapno agbiagkami.”

³Adda met dagiti nagkuna: “Kapilitan nga insaldami dagiti talon, kaubasan ken balaymi tapno adda igatangmi iti kanenmi ket dikam agbisin.”

⁴Kinuna pay ti dadduma, “Immutangkami iti kuarta tapno adda pagbuismi kadagiti talon ken kaubasanmi.

⁵Ti kasapulanmi kas met laeng iti kasapulan dagiti padami a Judio. Ania ti nakaigiddiatan dagiti annakmi kadagiti annakda? Ngem inkapilitan a patagabumi dagiti annakmi. Kinaagpaysona, nailakomin a tagabu dagiti sumagmamano nga annakmi a babbai. Awan ti maaramidmi ta sabalin ti agtagikua kadagiti taltalon ken kaubasanmi.”

⁶Napalalo ti pungtotko a nakangngeg kadagiti reklamoda,

⁷ket inkeddengko ti agtignay. Napanak kadagiti papangulo ken dagiti ofisiales ket binabalawko ida. Kinunak kadakuada: “Parparigatenyo dagiti kakabsatyo!” Inummongko dagiti tattao tapno risutenmi dagiti parikut.

⁸Kinunak, “Inaramidtayo amin a kabaelantayo a nangsubbot kadagiti kakabsat a Judio a nangilako iti bagbagida kadagiti ganggannaet. Ngem ita, apay a pilitenyo dagiti kakabsatyo a paadipenda kadagiti padatayo a Judio?” Nagulimek dagiti pangulo ket awan ti naisungbatda.

⁹Kinunak pay: “Saan a nasayaat ti kasta nga aramidyo! Rebbengyo ti agbuteng iti Dios ket agaramidkayo iti naimbag tapno awan pakalaisantayo kadagiti Hentil a kabusortayo.

¹⁰Pinautangak dagiti tattao iti kuarta ken taraon. Kasta met ti inaramid dagiti kaduak ken dagiti tattao nga agtartrabaho iti babaek. Ditay koman pampanunoten dagiti impautangtayo.

¹¹Ita met laeng, isubliyon dagiti talon, kaubasan, kaoliboan ken dagiti balbalayda. Pakawanenyon dagiti amin nga utangda—kuarta, taraon, arak wenno lana.”

¹²“Tungpalenmi ti ibagam,” kinuna dagiti pangulo. “Isublimin ti sanikuada ken dimin singsingiren dagiti utangda.” Inayabak dagiti papadi ket iti imatangda, pinagsapatak dagiti pangulo a tungpalenda dagiti karida.

¹³Inikkatko ti barikesko, winagwagko ket kinunak: “Kastoyto ti panangwagwag ti Dios iti siasinoman a di mangtungpal iti karina. Alaento ti Dios dagiti balbalayyo ken amin a kukuayo ket awanto a pulos ti ibatina kadakayo.” Sangsangkamaysa dagiti amin nga adda sadiay ti nagkuna: “Sapay koma ta kasta!” Indaydayawda ni Yahweh ket tinungpalda ti inkarida.

¹⁴Sangapulo ket dua a tawen a naggobernadorak iti Juda. Nangrugiak idi maika-20 a tawen a panagturay ni Artaxerxes agingga iti maika-32 a tawen iti akemna a kas emperador. Kabayatan dayta a tiempo, saankami a nangnangan kadagiti kakabagiak kadagiti taraon nga abastok a kas gobernador.

¹⁵Pinadagsenan dagiti gobernador nga immun-una ngem siak dagiti tattao. Inaldaw nga agsingirda iti kagudua a kilo a pirak a maigatang iti taraon ken arak. Uray dagidi adipenda, pinarparigatda dagiti tattao. Ngem sabali ti inaramidko ta adda panagbutengko iti Dios.

¹⁶Impanko amin a kabaelak a nangbangon manen iti bakud, ket awan nagamgamko a sanikua. Timmulong dagiti amin a tattaok.

¹⁷Inaldaw a nagpakanak iti 150 a Judio ken dagiti papanguloda, malaksid pay kadagiti tattao a naggapu kadagiti kabangibang a nasion.

¹⁸Inaldaw a nagpartiak iti maysa a baka, innem a napili a karnero ken adu a manok. Tunggal sangapulo nga aldaw, agpainumak iti baro nga arak. Nupay kasta, saanko nga innal-ala ti abastok a kas gobernador, ta madagsenan unay dagiti tattao.

¹⁹Dawatek kenka, O Dios, nga ibilangmo a pakaidayawak dagiti amin nga inaramidko kadagitoy a tattao.