Read Iloko Nehemiah 6 Bible Online

Nehemiah 6 - Iloko bible

Nehemiah 6

¹Nadamag da Sanballat, Tobias, Gesem ken dagiti dadduma a kabusormi a nabangonmin ti bakud ket awanen ti giwangna, nupay di pay naikapet dagiti ruangan kadagiti pagserkan.

²Pinaibaga da Sanballat ken Gesem nga agkikitakami iti maysa kadagiti barrio iti Tanap ti Ono. Ngem kunada laeng dayta ta kayatdak a dangran.

³Nangibaonak kadagiti mangibaga kadakuada, “Adda nasken nga aramidek ket diak masango ti umay dita. Diak kayat a maisardeng ti trabaho gapu laeng iti umaykayo panangkita kadakayo.”

⁴Namimpat a kasta ti pinaibagada kaniak, ngem isu met laeng ti insungbatko.

⁵Nangipatulod ni Sanballat iti mensahe iti maikalima a daras. Silulukat daytoy a surat a pinaipanna kadagiti adipenna.

⁶Kastoy ti nailanad: “Kuna ni Gesem kaniak nga agwarwaras ti damag kadagiti kabangibang a nasion a panggepyo a Judio ti umalsa. Daytoy ti gapuna a bangbangonenyo manen ti bakud. Panggepmo kano ti agbalin nga ari,

⁷ket nakitulagka kadagiti sumagmamano a profeta a mangipakdaar kenka nga ari ti Juda idiay Jerusalem. Awan duadua a madamagto daytoy ti Natan-ok nga Ari, isut' gapuna nga isingasingko nga umayka ket pagsaritaanta daytoy a banag.”

⁸Daytoy ti sungbatko kenkuana, “Awan ti kinapudno ti ibagbagam. Sika met laeng ti nangparbo kadagita a sasao.”

⁹Butbutngendakami ta kayatda nga isardengmi ti trabaho. Ngem ita, O Dios, papigsaennak kadi!

¹⁰Iti dayta a tiempo, sinarungkarak ni Semaias nga anak ni Delaias ken apoko ni Mehetabel, ta saanna a mapanawan ti balayna. Kinunana kaniak, “Inta aglemmeng iti santuario ti Templo, ket tulbekanta dagiti ridaw, agsipud ta umaydaka papatayen. Iti uray ania a rabii, umaydaka papatayen.”

¹¹“Saanak a takrot a lalaki nga agtaray ken aglemmeng,” insungbatko. “Ipagarupmo kadi nga aglemmengak iti Templo tapno maispal ti biagko? Diak aramiden dayta.”

¹²Idi pampanunotek daytoy, naamirisko a saan a nagsao ti Dios ken ni Semaias no di ket pinasuksokan da Tobias ken Sanballat tapno ballaagandak.

¹³Tinangdananda a mangbutbuteng kaniak tapno agbasolak ket madadael ti dayawko ken maibabainak.

¹⁴Inkararagko, “O Dios, laglagipem ti inaramid da Tobias ken Sanballat, ket dusaem ida. Laglagipem met ti inaramid ni Nodias, dayta profeta a babai, ken dagiti dadduma pay a profeta a nangbutbuteng kaniak.”

¹⁵Iti maika-25 nga aldaw ti bulan ti Elul, nalpasmi a binangon ti bakud; 52 nga aldaw a nagtrabahokami.

¹⁶Idi madamag daytoy dagiti kabusormi kadagiti kabangibang a nasion, nabigbigda a naibabainda gapu ta ammo ti amin a nalpas ti trabaho babaen iti tulong ti Dios.

¹⁷Kabayatan dayta a tiempo, nakisinsinnurat dagiti papangulo a Judio ken ni Tobias.

¹⁸Adu kadagiti taga-Juda ti kimmanunong ken ni Tobias agsipud ta manugang ni Secanias a Judio nga anak ni Ara. Maysa pay, inasawa ni Jehohanan nga anakna ti babai nga anak ni Mesullam nga anak ni Barakias.

¹⁹Ipangpangngeg dagiti tattao kaniak dagiti amin a naimbag nga aramid ni Tobias. Ipulpulongda met kenkuana dagiti amin a saok. Kanayon a suratannak tapno butbutngennak.