Read Iloko Nehemiah 9 Bible Online

Nehemiah 9 - Iloko bible

Nehemiah 9

¹Iti maika-24 nga aldaw ti isu met la a bulan, naguummong dagiti Israelita tapno agayunarda. Nagkawesda iti nakersang a lupot ken inikkanda dagiti uloda iti dapu. Daytoy ti mangipakita iti panagladingitda ken panagbabawida kadagiti basbasolda.

²Simminada idin kadagiti ganggannaet. Nagtakderda ket rinugianda ti nagipudno kadagiti basbasolda kasta met iti basol dagiti kapuonanda.

³Agarup tallo nga oras a naibasa kadakuada ti Linteg ni Yahweh a Diosda. Tallo nga orasda met a nagipudpudno kadagiti basbasolda ken nagdaydayaw ken ni Yahweh a Diosda.

⁴Adda plataforma a naisagana a pagtakderan dagiti Levita, ket sadiay ti nagtakderan da Jesua, Bani, Kadmiel, Sebanias, Bunni, Serebias, Bani ken Kenani. Nagkararagda iti napigsa ken ni Yahweh a Diosda.

⁵Dagitoy a Levita ti nangted iti pagilasinan iti panangrugi ti panagdaydayaw: Jesua, Kadmiel, Bani, Hasabneyas, Serebias, Hodias, Sebanias ken Petahias. Kinunada: “Tumakderkayo ket idaydayawyo ti Apo a Diosyo; idaydayawyo iti agnanayon nga awan inggana. O Apo, idaydayaw koma ti amin ti nagloriaan unay a naganmo; nupay no awan tao a makaited iti naan-anay a pagdaydayaw kenka.”

⁶Daytoy ti inkararagda: “O Apo, siksika laeng ti Apo; sika ti namarsua kadagiti langit ken kadagiti bituen iti tangatang. Pinarsuam ti daga ken ti baybay ken ti amin nga adda sadiay. Sika ti nangted iti biag ti amin, agtamed ken agdaydayaw kenka dagiti nailangitan a pannakabalin.

⁷OApo a Dios, pinilim ni Abram, ket inruarmo idiay Ur iti Babilonia; Abraham ti insukatmo iti naganna.

⁸Napaneknekam a napudno kenka, ket nakitulagka kenkuana. Inkarim nga itedmo kenkuana ti daga ti Canaan, ti daga dagiti Heteo ken Amorreo, ti daga dagiti Perezeo, Jebuseo ken Gergeseo, tapno pagnaedan dagiti kaputotanna. Tinungpalmo ti karim, agsipud ta mapagtalkanka.

⁹“Nakitam ti panagsagaba dagiti kapuonanmi idiay Egipto; nangngegmo ti panagpatulongda idi addada idiay Baybay a Nalabaga.

¹⁰Nakaskasdaaw dagiti milagro nga inaramidmo a maibusor iti ari ti Egipto, kasta met kadagiti ofisialesna, ken dagiti tattao iti pagilianna. Ammom ngamin ti panangidadanesda kadagiti tattaom. Nagun-odmo idi ti dayaw, wen, ti dayaw nga adda pay laeng kenka ita.

¹¹Nangaramidka iti pagnaan dagiti tattaom iti baybay, ket indalanmo ida iti namaga a daga. Ngem inlemmesmo dagiti mangkamkamat kadakuada, batbato a limned iti nadawel a baybay ti arigda.

¹²Iti aldaw, indalanmo ida babaen iti ulep, iti rabii, linawagam ti dalanda babaen iti apuy.

¹³Manipud langit, bimmabaka, napanka idiay Bantay Sinai ket sadiay nakisaoka kadagiti tattaom. Inikkam ida kadagiti naimbag a linteg ken nasayaat a pannursuro.

¹⁴Imbagam a ngilinenda ti Aldaw a Panaginana. Intedmo kadakuada dagiti lintegmo babaen ken ni adipenmo a Moises.

¹⁵“Idi mabisinda, inikkam ida iti tinapay a naggaput' langit. Idi mawawda, inikkam ida iti danum a naggapu iti bato. Imbagam kadakuada nga iturayanda ti daga, ti daga nga inkarim nga ited kadakuada.

¹⁶Ngem timmangsit ken simmukir dagiti kapuonanmi, ket dida kinayat a tungpalen dagiti bilinmo.

¹⁷Dida kinayat ti agtulnog, nalipatanda dagiti amin nga inaramidmo; nalipatanda dagiti pinarnuaymo a milagro. Iti kinatangsitda, pimmilida iti pangulo a mangisubli kadakuada idiay Egipto tapno agbalinda manen a tagabu. Ngem sika ti Dios a mamakawan, naasi ken naayatka, ket saanka a nalaka nga agpungtot. Naindaklan unay ti panangngaasim, saanmo a binaybay-an ida.

¹⁸Nangsukogda iti didiosen a sinan-baka, kinunada nga isu ti dios a nangiruar kadakuada idiay Egipto! O Apo, anian a panangpabainda kenka.

¹⁹Ngem saanmo a binaybay-an ida idiay let-ang, agsipud ta naindaklan ti asim. Dimo impanaw ti ulep wenno ti apuy a nangidalan kadakuada iti aldaw ken rabii.

²⁰Naimbagka ket imbagam dagiti masapul nga aramidenda. Pinakanmo ida iti mana, ket inikkam ida iti danum nga ininumda.

²¹Iti 40 a tawen a panagyanda idiay let-ang, intedmo kadakuada ti amin a masapulda. Saan a narunot dagiti pagan-anayda, saan met a limteg dagiti sakada.

²²“Impalubosmo a sakupenda dagiti nasion ken pagarian, dagiti daga nga adda iti beddengda. Pinarmekda ti daga ti Hesbon, nga iturayan ni Sihon. Pinarmekda pay ti Basan, ti pagarian nga iturayan ni Og.

²³Adu nga annak ti imparaburmo kadakuada, kas kadagiti bituen sadi langit ti kaaduda. Pinalubosam ida a mangparmek ken agnaed iti daga nga inkarim nga ited kadagiti kapuonanda.

²⁴Pinarmekda ti daga ti Canaan; pinagtalawmo dagiti agnaed sadiay. Inikkam dagiti tattaom iti pannakabalin nga agaramid iti kaykayatda kadagiti tattao ken ar-ari iti daga ti Canaan.

²⁵Sinakup dagiti tattaom dagiti siudad a nasarikedkedan ken dagiti nadam-eg a daga, balbalay a napno iti kinabaknang, dagiti bubon a nakalin, dagiti kayo ti olibo, kayo nga agbunga ken dagiti kaubasan. Kinnanda amin a kinaykayatda ket limmukmegda, linak-amda dagiti amin a naimbag nga intedmo kadakuada.

²⁶“Ngem immalsa dagiti tattaom, ket saanda a nagtulnog kenka; tinallikudanda ti Lintegmo. Pinatayda dagiti profeta a nangballaag kadakuada, a nangibaga kadakuada nga agsublida kenka. Masansan a laisendaka.

²⁷Isut' gapuna a pinalubosam dagiti kabusorda a mangparmek ken mangituray kadakuada. Iti tiempo ti pannakariribukda, nagpatulongda kenka ket manipud langit, sinungbatam ida. Gapu iti naindaklan nga asim, inikkam ida kadagiti pangulo a nangispal kadakuada kadagiti kabusorda.

²⁸No agsublin ti talna, agbasolda manen, ket ipalubosmo a parmeken manen ida dagiti kabusorda. Nupay kasta, no agbabawida ket dawatenda nga isalakanmo ida, mangngegmo ida dita langit, ket gapu iti asim kanayon nga isalakanmo ida.

²⁹Binallaagam ida nga agtulnogda iti bukodmo a pannursuro, ngem dida inawat dagiti lintegmo gapu iti kinatangsitda, nupay no agturong iti biag ti panangtaginayon iti Lintegmo. Dida kinayat ti agtulnog kenka gapu ta natangken ti uloda ken nasukirda.

³⁰Tinawen nga inan-anusam a binallaagam ida, ngem tuleng dagiti tattaom, uray no nagsao dagiti profeta. Ngarud, impalubosmo nga iturayan ida dagiti pagilian iti likmutda.

³¹Nupay kasta, gapu ta naindaklan ti asim, dimo binaybay-an wenno dinadael ida. Naasika a Dios, naparaburka.

³²“O Dios a Diosmi, naindaklanka unay! Nakabutbuteng ken mannakabalinka! Salimetmetam a sipupudno dagiti karim iti katulagam. Manipud iti tiempo a panangidadanes kadakami dagiti ar-ari ti Asiria, adun ti sinagsagabami agpapan ita. Nagsagaba dagiti ar-arimi, dagiti papangulo, papadi ken profetami, dagiti kapuonanmi ken amin a tattaomi. Lagipem kadi ti adu unay a sinagabami.

³³Nalinteg ti inaramidmo iti panangdusam kadakami, napudnoka ngem nagbasolkami.

³⁴Sinukir dagiti kapuonanmi ti Lintegmo, kasta met dagiti ar-ari, papangulo ken papadimi. Saanda met nga impangag dagiti bilbilin ken ballaagmo.

³⁵Gapu iti bendisionmo inturayan dagiti ar-ari dagiti tattaom, idi nagnaedda iti nalawa ken nadam-eg a daga nga intedmo kadakuada; ngem dida tinallikudan dagiti basolda tapno agserbida kenka.

³⁶Ita, tagabukamin iti daga nga intedmo kadakami, iti daytoy nadam-eg a daga a pagtaudan ti taraonmi.

³⁷Maited ti amin nga apit kadagiti ari nga insaadmo gapu ta nagbasolkami. Aramidenda ti kaykayatda kadakami ken kadagiti bakami, ket napalalo ti pannakaparigatmi.”

³⁸Gapu kadagiti amin a napasamak, mangaramidkami iti maysa a kasuratan a masapataan ken patalgedan dagiti papangulo, Levita ken papadimi.