Read Iloko Esther 2 Bible Online

Esther 2 - Iloko bible

Esther 2

¹Iti saan a nabayag, bimmaaw ti pungtot ni Ari Xerxes. Ngem kankanayon a pampanunotenna ti inaramid ni Vasti ken ti impaulogna a bilin a maibusor kenkuana.

²Insingasing ngarud ti sumagmamano a nasinged a mammagbaga iti ari, “Apay a dika agpabirok kadagiti napipintas ken ubbing a birhen a babbalasang?

³Mangdutokka kadagiti ofisiales iti tunggal probinsia ti pagarian, ket payegmo kadakuada dagitoy a babbalasitang ditoy Susa a kabesera a siudad, iti intudingmo a pagnaedan dagiti kakasta a babbai. Maipaaywanda ken ni Hegai, ti eunoko a para aywan kadagiti babbaim, tapno mapapintasda.

⁴Alaemto ti babai a magustoam unay ket isaadmo a reyna a sukat ni Vasti.” Nagustoan ti ari daytoy a balakad ket tinungpalna.

⁵Adda idi maysa a Judio nga agnaed idiay Susa. Isu ni Mardokeo nga anak ni Jair. Nagtaud iti tribu ti Benjamin ket kaputotan da Kis ken Simei.

⁶Naitalaw idi ni Mardokeo a kas balud manipud Jerusalem. Kaduana dagidi intalaw ni Nebucadnesar agraman ni Jeconias nga ari ti Juda.

⁷Adda kasinsin ni Mardokeo nga agnagan Ester. Hadasa ti naganna iti Hebreo. Idi natay dagiti nagannak ken ni Ester, innala ni Mardokeo ket pinadakkelna a kas pudno nga anakna. Nalibnos a balasang ni Ester ket napintas ti pammagina.

⁸Idi naipaulogen ti baro a bilin ti ari, adu a babbalasang ti naipan idiay Susa. Naipan met ni Ester ket naipaaywan ken ni Hegai a mangimaton iti pagnaedan dagiti babbai.

⁹Nagustoan ni Hegai ni Ester ket nagun-od ni Ester ti panangipateg ni Hegai kenkuana. Dinagdagus ni Hegai nga inrugi ti pannakapapintas ni Ester babaen iti masahe ken ti pannangtedna kenkuana iti naisangsangayan a taraon. Intedna ti kapintasan a kuarto kenkuana ket nangpili iti pito a babbai a naggapu iti palasio nga agserbi kenkuana.

¹⁰Inlimed ni Ester ti kina-Judiona agsipud ta kasta ti imbilin ni Mardokeo.

¹¹Inaldaw nga aglabaslabas ni Mardokeo iti sango ti paraangan ti pagnaedan dagiti babbai tapno ammoenna ti kasasaad ni Ester ken ti aniaman a mapasamak kenkuana.

¹²Makatawen ti naituding a pannakapapintas dagiti babbai. Innem a bulan a masapsapoanda iti lana ti mirra ken innem met a bulan iti bangbanglo. Kalpasanna, maipan ti tunggal babai ken ni Ari Xerxes no dumteng ti batangna.

¹³Mapalubosan ti tunggal maysa a mangikawes iti aniaman a kayatna iti ipapanna iti palasio.

¹⁴Mapan iti palasio iti rabii ket iti sumuno a bigat, maipan iti sabali a kuarto tapno maipaaywan ken ni Saasgaz a para aywan kadagiti assawa ti ari. Saanen nga agsubli iti palasio malaksid no kayat ti ari ket paayabanna iti mismo a naganna.

¹⁵Dimteng ti batang ni Ester a mapan iti ari, ni Ester nga anak ni Abihail ken kasinsin ni Mardokeo a pannakaamana, ni Ester a raraemen ti amin a makakita kenkuana. Inkawesna ti pagan-anay nga imbaga ni Hegai nga aramatenna. Ni Hegai ti para aywan iti kuarto dagiti babbai.

¹⁶Ngarud, iti maikapito a tawen a panagari ni Xerxes, iti maika-10 a bulan a maaw-awagan iti Tebet, naidatag ni Ester ken ni Ari Xerxes iti palasio.

¹⁷Ad-adda ti panagayat ni Xerxes ken ni Ester ngem kadagiti dadduma a babbai. Ad-adda a ni Ester ti nakagun-od iti ayat ken pammategna. Kinoronaanna ni Ester ket isu ti insaadna a reyna a sukat ni Vasti.

¹⁸Kalpasanna, nangipaay iti dakkel a padaya a kas pammadayaw ken ni Ester. Inawisna dagiti ofisiales ken dagiti agserserbi kenkuana iti trono. Inwaragawagna pay ti panagfiesta ti entero a pagarian ket nagibunong kadagiti sagut a kas maikanatad nga aramiden ti maysa nga ari.

¹⁹Kabayatanna, dinutokan ti ari ni Mardokeo iti natan-ok a saad iti palasio.

²⁰No maipapan ken ni Ester, inlimedna ti kina-Judiona, kas imbilin ni Mardokeo kenkuana. Tinungpalna ni Mardokeo a kas iti panagtungpalna kenkuana idi ubing pay laeng.

²¹Kabayatan ti panagsaad ni Mardokeo a kas ofisial iti palasio, dua kadagiti eunoko a mangguguardia iti ridaw ti kuarto ti ari ti gimmura ken ni Ari Xerxes ket insikatda a patayen. Isuda da Bigtana ken Teres.

²²Naammoan ni Mardokeo ti panggepda ket impulongna ken ni reyna Ester. Imbaga ngarud ti reyna iti ari ti naammoan ni Mardokeo.

²³Idi mapalutpot ti kaso, natakuatan a pudno ket nabitay dagiti dua. Imbilin ti ari a mailanad daytoy a pasamak iti libro a pakaisuratan dagiti inaldaw a mapaspasamak iti pagarian.