Read Iloko Esther 3 Bible Online

Esther 3 - Iloko bible

Esther 3

¹Iti saan a mabayag, insaad ni Ari Xerxes ti maysa a tao nga agnagan iti Haman a kangatoan nga ofisial ti pagarian. Isu ti anak ni Hammedata a nagtaud iti kaputotan ni Agag.

²Binilin ti ari dagiti amin nga ofisiales nga agserserbi kenkuana a raemenda ni Haman babaen iti panagparintumeng ken panagtamedda kenkuana. Nagtungpalda amin iti bilin, malaksid ni Mardokeo.

³Sinaludsod dagiti dadduma nga ofisiales iti palasio ken ni Mardokeo, no apay a sukirenna ti bilin ti ari.

⁴Inaldaw a palagipanda ni Mardokeo ngem dina impangag ida. Inlawlawagna kadakuada a kas maysa a Judio, dina kayat ti agtamed ken ni Haman. Imbagada daytoy ken ni Haman tapno kitaenda no ipalubosna ti kasta nga ar-aramiden ni Mardokeo.

⁵Napalalo ti pungtot ni Haman idi naammoanna a saan nga agparintumeng ken agtamed ni Mardokeo kenkuana.

⁶Ket idi nadamagna a Judio ni Mardokeo, inkeddengna a saan la a ni Mardokeo ti dusaenna. Inkeddengna a mapapatay amin a Judio iti entero a pagarian ti Persia.

⁷Bulan idi ti Nisan, ti umuna a bulan ti maika-12 a tawen a panagturay ni Ari Xerxes. Naaramid iti sangoanan ni Haman ti binnunot a maaw-awagan iti Pur tapno maammoan no ania nga aldaw ken bulan ti pannakapapatay dagiti amin a Judio. Napili ti maika-13 nga aldaw iti maika-12 a bulan a maaw-awagan iti Adar.

⁸Kinuna ni Haman iti ari, “Adda naidumduma a tattao nga agnaed ken nawaraswaras iti amin a probinsia ti pagariam. Maigiddiat ti ugalida kadagiti dadduma a tattao, ket dida agtungpal kadagiti linteg ti pagarian. Natan-ok nga Ari, saanmo a pagimbagan no bay-am a kastoy ti aramidda.

⁹No kayatmo, Natan-ok nga Ari, adda koma ipaulogmo a bilin a mapapatayda, ket ikarik a mangtedak iti 375 a tonelada a pirak iti pagidulinan iti kuarta a maaramat iti pannakaituray ti pagarian.”

¹⁰Inuksot ti ari ti singsingna ket intedna ken ni Haman nga anak ni Hammedata a kabusor dagiti Judio. Maus-usar ti singsing a pangtimbre kadagiti bilin nga ipaulog ti ari.

¹¹Kinuna ti ari kenkuana, “Adda iti pannakabalinmo dagiti tattao ken dagiti kuartada. Aramidem ti kayatmo kadakuada.”

¹²Iti maika-13 nga aldaw iti umuna a bulan, inayaban ni Haman dagiti sekretario ti ari ket indiktarna kadakuada ti bilin nga agpaay kadagiti agtuturay, kadagiti gobernador ken ofisiales. Ipatarusda daytoy a bilin iti tunggal pagsasao iti entero a pagarian. Naisurat ti bilin iti nagan ni Ari Xerxes ket natimbrean iti bukodna a singsing.

¹³Naipan dagiti kopia daytoy a bilin iti amin a probinsia ti pagarian. Nailanad kadagitoy a bilin a mapapatay amin a Judio—agtutubo ken nataengan, babbai ken ubbing—iti maysa nga aldaw, iti maika-13 nga aldaw iti bulan ti Adar, ket masamsam dagiti sanikuada.

¹⁴Maiwaragawag a kas linteg ti linaon ti bilin iti amin a probinsia tapno maammoan dagiti tattao iti amin a puli ket makapagsaganada iti dayta nga aldaw.

¹⁵Naiwaragawag ti pakaammo idiay Susa a kabesera ti Persia. Sipapardas met dagiti imbaon ti ari a nangipan kadagiti kopia ti bilin iti amin a probinsia tapno maammoan ti amin a tattao iti pagarian. Naginum ti ari ken ni Haman iti arak, ngem nariribuk ti siudad ti Susa.