Read Iloko Esther 4 Bible Online

Esther 4 - Iloko bible

Esther 4

¹Idi maammoan ni Mardokeo ti amin a naaramid, rinay-abna ti pagan-anayna, nagkawes iti nakersang a lupot, winarakiwakanna ti ulona iti dapu ket nagpagnapagna iti siudad nga agan-anug-og iti napigsa ken nasaem.

²Nagpatingga la iti ruangan ti palasio, ta saan a mapalubosan a sumrek ti kasta ti pagan-anayna.

³Iti amin a probinsia a nakaipakaammoan ti bilin ti ari, napigsa ti panagdung-aw dagiti Judio. Nagayunar, nagsangit ken nagdung-awda. Adu ti nagkawes iti nakersang a lupot ken nangikabil iti dapu iti uloda.

⁴Napalalo ti pannakariribuk ni Reyna Ester idi ipadamag dagiti adipenna a babbai ken eunoko ti ar-aramiden ni Mardokeo. Nagpaitulod iti pagan-anay ken ni Mardokeo tapno suktanna ti nakersang a lupot a kawesna, ngem saan nga inawat ni Mardokeo.

⁵Kalpasanna, pinaayaban ni Ester ni Hatak a maysa kadagiti eunoko iti palasio a dinutokan ti ari nga agserbi kenkuana. Binilinna ni Hatak a mapan ken ni Mardokeo tapno ammoenna ti mapaspasamak ken no apay a kasta ti ar-aramiden ni Mardokeo.

⁶Napan ni Hatak iti ayan ni Mardokeo iti plasa iti sangoanan ti ruangan ti palasio.

⁷Imbaga ni Mardokeo ken ni Hatak ti amin a napasamak kenkuana, agraman ti dagup ti kuarta nga inkari ni Haman nga ited iti pagidulinan iti gameng ti palasio para iti pannakapapatay dagiti amin a Judio.

⁸Inted ni Mardokeo kenkuana ti kopia ti bilin a naipakaammo iti Susa maipapan iti pannakapapatay dagiti Judio. Indawat ni Mardokeo nga ipakitana ken ni Ester ket ilawlawagna kenkuana ti mapaspasamak. Kiniddaw ni Mardokeo a mapan agpakpakaasi ni Ester iti ari tapno kaasianna dagiti Judio.

⁹Nagtungpal ni Hatak.

¹⁰Pinagsubli ni Ester ni Hatak ket pinaibagana daytoy ken ni Mardokeo:

¹¹“Mapapatay ti siasinoman a lalaki wenno babai a sumrek iti akin-uneg a paraangan tapno dumatag iti ari no saan a naayaban. Dayta ti linteg. Ammo amin daytoy dagiti mammagbaga iti ari ken dagiti tattao kadagiti probinsia. Awan ti makalisi iti daytoy a linteg malaksid no ipaturong ti ari kenkuana ti balitok a setrona ket iti kasta, saan a mapapatay. Adda makabulanen a dinak inayaban ti ari.”

¹²Idi naammoan ni Mardokeo ti imbaga ni Ester,

¹³pinaibagana daytoy a ballaag: “Dimo ipagarup a nataltalgedka ngem ti uray siasinoman a Judio gapu ta addaka iti palasio.

¹⁴No agulimekka iti kastoy a mapaspasamak, tinto langit ti tumulong kadagiti Judio ket isalakanna ida. Ngem mataykanto ket mapukawton ti kaputotan ni tatangmo. Siasino ti makaammo? Nalabit a naitan-okka a kas reyna para iti kastoy a panawen.”

¹⁵Daytoy ti sungbat ni Ester ken ni Mardokeo:

¹⁶“Ummongem ti amin a Judio nga adda iti Susa. Agayunarkayo ket idawdawatandak. Dikay mangan wenno uminum iti uray ania iti tallo nga aldaw ken rabii. Agayunarakto met agraman dagiti adipenko a babbai. Kalpasanna, uray no maisalungasing iti linteg, innakto iti ari ket no pakatayak, awatek a siraragsak.”

¹⁷Pimmanaw ni Mardokeo ket tinungpalna amin nga imbilin ni Ester.