Read Iloko Esther 5 Bible Online

Esther 5 - Iloko bible

Esther 5

¹Iti maikatlo nga aldaw a panagayunar ni Ester, inkawesna ti pagan-anayna a reyna. Napan iti akin-uneg a paraangan ti palasio a sumango iti kuarto nga ayan ti trono. Agtugtugaw idi ti ari iti tronona a sumangsango iti ruangan.

²Idi makitana ni Reyna Ester nga agtaktakder iti ruar, naragsakan ket impaturongna kenkuana ti balitok a setro. Immasideg ni Ester sana sinagid ti murdong ti setro.

³Kinuna ti ari, “Ania ti masapulmo, Reyna Ester? Ibagam ti kayatmo ket itedko kenka uray no kagudua ti pagariak.”

⁴Simmungbat ni Ester, “No pakaragsakan ti Natan-ok nga Ari, awisenkayo koma ken ni Haman ita a rabii iti maysa a pannangan nga isagsaganak nga agpaay kadakayo.”

⁵Pinaayaban a dagus ti ari ni Haman tapno matungpal ti kalikagum ni Ester. Napan ngarud ti ari ken ni Haman iti pannangan nga insagana ni Ester.

⁶Bayat ti panaginumda iti arak, kinuna ti ari ken ni Ester, “Ibagam ti kayatmo ket itedko kenka. Patgak ti dawatmo, uray no kagudua ti pagariak.”

⁷Kinuna ni Ester,

⁸“No patgan ti Natan-ok nga Ari ti dawatko, tarigagayak a dakayo koma ken ni Haman ti sangailik manen inton bigat iti pannangan nga isaganak nga agpaay kadakayo a dua. Isunto ti panangibagak ti kayatko.”

⁹Naragsak ni Haman a naggapu iti pannangan nga insagana ni Ester. Ngem idi makitana ni Mardokeo iti ruangan ti palasio a saan a timmakder a mangipakita iti panagraemna kenkuana, nakapungtot iti kasta unay.

¹⁰Nupay kasta, tinengngelna ti pungtotna ket nagawid. Inawisna dagiti gagayyemna iti balayna, ket inayabanna ni Zeres nga asawana a makisango kadakuada.

¹¹Impasindayagna kadakuada ti kinabaknangna ken ti kaadu dagiti annakna a lallaki. Impalangguadna pay ti panangingato ti ari kenkuana iti saad, nga isun ti kangatoan nga ofisial ket nangatngato ngem dagiti dadduma nga ofisiales ti ari.

¹²“Saan la a dayta,” innayon ni Haman, “siak laeng ken ti ari ti inimbitaran ni Reyna Ester a dumar-ay iti pasken nga inangayna. Awisennakami a mapan manen inton bigat.

¹³Ngem awan ti serserbi kaniak amin dagitoy no adda pay met laeng a makitkitak dayta Judio a Mardokeo nga agtugtugaw iti ruangan ti palasio.”

¹⁴Imbalakad ni Zeres ken dagiti gagayyem ni Haman, “Agpaaramidka iti pagbitayan a 75 a kadapan ti kangatona. Inton bigat, dawatem iti ari a mabitay ni Mardokeo dita. Kalpasanna, makadar-ayka a siraragsak iti pannangan.” Nagustoan ni Haman daytoy a balakadda ket nagpaaramid iti pagbitayan.