Read Iloko Esther 7 Bible Online

Esther 7 - Iloko bible

Esther 7

¹Iti kasta, iti maikadua a gundaway, napan da Ari Xerxes ken Haman iti pannangan nga insagana ni Ester. Bayat ti panaginumda iti arak, sinaludsod ti ari ken ni Ester, “Ita, Reyna Ester, ania ti kayatmo? Ibagam kaniak ket itedko, uray no kagudua ti pagariak.”

³Insungbat ni Reyna Ester, “Natan-ok nga Ari, no adda met la pateg ti nanumo a dawatko, dawatek a maispal ti biagko ken dagiti padak a Judio.

⁴Nailakokamin—siak ken dagiti tattaok—tapno mapapatay. No nailakokami laeng a matagabu, agulimekak ket diakon ringgoren ti ari, ngem dandanidakam patayenen ket mapukawkamton!”

⁵Sinaludsod ti ari ken ni Ester, “Siasino ti tao a natured a nangaramid iti kastoy? Sadino ti ayanna?”

⁶“Maysa a kabusormi! Maysa a mangidadanes kadakami. Awan sabali no di ni Haman a managdakdakes,” insungbat ni Ester. Kasta unay ti danag ni Haman a simmango iti ari ken reyna.

⁷Sipupungtot a timmakder ti ari, rimmuar iti kuarto a napan iti hardin ti palasio. Narikna ni Haman a desidido ti ari a mangdusa kenkuana, isu a nagbati tapno ipakpakaasina ken ni Reyna Ester a maispal koma ti biagna.

⁸Idi agsubli ti ari a naggapu iti hardin, nadanonna ni Haman iti sofa ni Ester ket sipapakleb iti sangoananna. Idi makita ti ari, impukkawna, “Ramesen kadi daytoy a tao ti reyna iti sangoanak ken iti mismo nga uneg ti palasiok?” Apaman a naisao ti ari daytoy, inabungotan dagiti eunoko ti ulo ni Haman.

⁹Kinuna ni Harbona a maysa kadagiti eunoko, “Natan-ok nga Ari, nagaramid ni Haman iti pagbitayan a 75 a kadapan ti katayagna iti asideg ti balayna tapno adda pangibitayanna ken ni Mardokeo a nangispal iti biagmo.” “Ibitayyo dita ni Haman,” imbilin ti ari.

¹⁰Binitayda ngarud ni Haman iti pagbitayan a nairanta ken ni Mardokeo. Ket bimmaaw ti pungtot ti ari.