Read Iloko Esther 8 Bible Online

Esther 8 - Iloko bible

Esther 8

¹Iti dayta nga aldaw, inted ni Ari Xerxes ken ni Reyna Ester ti amin a sanikua ni Haman a kabusor dagiti Judio. Imbaga ni Ester iti ari a kabagianna ni Mardokeo ket manipud idin, mapalubosanen ni Mardokeo a dumatag iti ari.

²Inuksot ti ari ti singsing nga adda timbrena sana inted ken ni Mardokeo. Daytoy daydi singsing nga intedna ken ni Haman ngem innalana met laeng. Dinutokan ni Ester ni Mardokeo nga enkargado iti amin a sanikua ni Haman.

³Napan manen nakisao ni Ester iti ari. Agsangsangit a nagpakleb iti sangoanan ti ari. Impakpakaasina kenkuana a pasardengenna ti pannakaipatungpal ti dakes a gandat ni Haman a kaputotan ni Agag a maibusor kadagiti Judio.

⁴Intudo ti ari ti setrona ken ni Ester ket nagtakder ni Ester sana kinuna,

⁵“Natan-ok nga Ari, no maragsakanka, no ay-ayatennak met laeng ken no ipagarupmo a naimbag, pangngaasim ta mangipaulogka iti bilin a mangwaswas iti naiwaragawag a bilin ni Haman nga anak ni Hammedata a kaputotan ni Agag, a mangpapatay kadagiti amin a Judio iti pagarian.

⁶Kasano a maituredko a kitaen ti pannakadidigra dagiti padak a Judio ken ti pannakapapatay dagiti kabagiak?”

⁷Kinuna ngarud ni Ari Xerxes kada Reyna Ester ken Mardokeo a Judio, “Kitaenyo, binitayko ni Haman gapu iti panangisikatna kadagiti Judio ket intedkon ken ni Ester dagiti sanikuana.

⁸Ngem saan a mawaswas ti bilin a naipaulog iti nagan ti ari ken natimbrean iti selio ti pagarian. Nupay kasta, mabalinyo ti agsurat kadagiti Judio iti aniaman a kayatyo. Mabalinyo nga isurat iti naganko ket timbreanyo iti selio ti pagarian.”

⁹Napasamak daytoy iti maika-23 nga aldaw iti maikatlo a bulan a maaw-awagan iti Sivan. Inayaban ni Mardokeo dagiti sekretario ti ari ket indiktarna ti surat nga agpaay kadagiti Judio, kadagiti gobernador, kadagiti administrador, kadagiti ofisiales kadagiti 127 a probinsia manipud India agingga iti Etiopia. Naisurat daytoy a bilin iti bukod a panagsurat ken bukod a pagsasao ti tunggal probinsia, kasta met iti bukod a panagsurat ken bukod a pagsasao dagiti Judio.

¹⁰Pinaisurat ni Mardokeo iti nagan ni Ari Xerxes, ket natimbrean ti surat iti selio ti pagarian. Pinaitulodna dagiti surat kadagiti nagsakay kadagiti napapardas a kabalio ti ari.

¹¹Iti daytoy a bilin ti ari, naikkan dagiti Judio iti kalintegan nga agtitimpuyog iti tunggal siudad ket salaknibanda ti bagida. Dadaelen, papatayen ken ikisapda ti aniaman a grupo dagiti armado a tattao iti aniaman a probinsia a mangraut kadakuada agraman dagiti assawa ken annakda, ken samsamenda dagiti sanikua dagiti kabusorda.

¹²Maipatungpal daytoy a bilin iti entero a pagarian ti Persia iti aldaw a naikeddeng a pannakapapatay dagiti Judio—iti maika-13 nga aldaw ti maika-12 a bulan a maaw-awagan iti Adar.

¹³Maipakaammo ti bilin a kas linteg iti amin a probinsia tapno makapagsagana dagiti Judio a mangsalaknib kadagiti bagbagida kadagiti kabusorda inton dumteng dayta nga aldaw.

¹⁴Ngarud, dinagdagus dagiti nagkabalio ti napan a sipapardas iti nakaibaonanda, kas bilin ti ari. Naipaulog met ti bilin idiay Susa, ti kabesera a siudad.

¹⁵Rimmuar ni Mardokeo iti palasio, nadaeg ti arruatna: asul ken puraw a pagan-anay, ken nalabaga a linen a kagay, ken nadayag a balitok a koronana. Ket nagallangogan ti dir-i kadagiti kalsada idiay Susa gapu iti ragsak dagiti umili.

¹⁶Nagragsak ken nagrag-o dagiti Judio ta dakkel a pammadayaw daytoy kadakuada.

¹⁷Iti tunggal probinsia ken siudad a nakaiwaragawagan ti bilin ti ari, nagrambak dagiti Judio. Ket iti entero a pagarian, adu ti nangipakaammo a Judioda gapu ta kabutengdan dagiti Judio.