Read Iloko Exodus 10 Bible Online

Exodus 10 - Iloko bible

Exodus 10

¹Kinuna ni Yahweh ken ni Moises, “Inka iti ari. Pinatangkenko ti pusona, kasta met dagiti ofisialesna tapno ipakitak kadakuada daytoy a pannakabalinko.

²Inaramidko dagitoy a milagro tapno masaritamto kadagiti annakmo ken appokom no kasano ti panamagbalinko a maag dagiti Egipcio ket iti kasta, maammoanyonto amin a siak ni Yahweh.”

³Napan da Moises ken Aaron iti ari ket kinunada kenkuana, “Kastoy ti paibaga ti Apo a Dios dagiti Hebreo, ‘Kasano pay ti kabayag ti dimo panagpakumbaba kaniak? Palubosam a pumanaw dagiti tattaok tapno umayda agdaydayaw kaniak.

⁴No madika latta, yegko inton bigat dagiti dudon iti pagiliam.

⁵Kasta unayto ti kaaduda ket agsaknapdanto agingga a saan a makita ti daga gapu iti kapuskolda. Ibusendanto ti amin a saan a dinadael ti yelo, uray pay dagiti natda a puon ti kayo.

⁶Serkendanto dagiti palasiom ken dagiti balay dagiti ofisialesmo ken amin a tattaom. Narangranggasdanto ngem ti aniaman a nakita dagidi kapuonanyo.’” Pimmanaw ni Moises apaman a naisaona daytoy.

⁷Kinuna kenkuana dagiti ofisiales ti ari, “Kaanonto nga isardeng daytoy a tao ti panangriribukna kadatayo? Palubosam idan tapno mapanda agdaydayaw iti Apo a Diosda. Dimo kadi makita a madadaelen ti Egipto?”

⁸Iti kasta, naidatag manen da Moises ken Aaron iti ari. Kinunana kadakuada, “Mabalinyon ti mapan agdaydayaw iti Apo a Diosyo. Ngem siasino dagiti mapan?”

⁹Insungbat ni Moises, “Mapankami amin, agraman dagiti annakmi ken dagiti babbaket ken lallakay. Itugotmi dagiti karnero, kalding, ken dagiti bakami. Masapul nga inkami amin ta mangipaaykami iti maysa a parambak iti Apo.”

¹⁰Kinuna ti ari kadakuada, “Isapatak iti Apo a diak ipalubos nga itugotyo dagiti babbai ken dagiti ubbing! Nalawag a panggepyo ti umalsa.

¹¹Saan a mabalin! Dagiti laeng lallaki ti mapan agdaydayaw iti Apo no dayta ti kalikagumanyo.” Apaman a nasaona daytoy, napapanaw da Moises ken Aaron iti saklang ti ari.

¹²Kinuna ni Yahweh ken ni Moises, “Yunnatmo ta imam iti daga ti Egipto tapno tumaud dagiti dudon. Umaydanto ibusen ti amin a mula a natda idi nagtinnag dagiti yelo.”

¹³Inlayat ni Moises ti sarukodna iti daga ti Egipto. Pinataud ni Yahweh ti angin manipud iti daya ket nagmalmalem ken nagpatpatnag a nagpuypuyopoy. Kabigatanna, inyeg ti angin dagiti dudon.

¹⁴Pinangenpangenda a dimteng ket nagdissoda iti amin a lugar iti pagilian. Daytoy pay la ti kapuskolan a pangen ti dudon a timmaud ket awanen ti kastoy a kaadu, uray iti masakbayan.

¹⁵Uray la ngimmisit ti daga iti kaaduda; inibusda amin a tedda ti yelo, agraman dagiti bunga dagiti kayo. Awan ti bulong a natda iti kayo wenno mula iti entero nga Egipto.

¹⁶Dinardaras ti ari a pinaayaban da Moises ken Aaron ket kinunana kadakuada, “Nakabasolak iti Apo a Diosyo, kasta met kadakayo.

¹⁷Pangngaasiyo ta pakawanenyo ti basolko, uray ita laeng. Idawdawatyo iti Apo a Diosyo nga ikkatenna kaniak daytoy makapatay a dusa.”

¹⁸Pimmanaw ni Moises ket nagkararag ken ni Yahweh.

¹⁹Binaliwan ni Yahweh ti turongen ti angin a naggapu iti daya. Pinagbalinna a nakapigpigsa a naggapu iti laud a nangitayab kadagiti dudon ket impanna ida iti Baybay a Nalabaga. Pulos nga awan ti natda a dudon iti entero a daga ti Egipto.

²⁰Ngem pinatangken ni Yahweh ti puso ti ari ket dina impalubos a pumanaw dagiti Israelita.

²¹Kinuna ni Yahweh ken ni Moises, “Ingatom ta imam tapno makumotan ti entero nga Egipto iti nakaro a sipnget nga uray la agar-arikap dagiti tattao.”

²²Ingngato ni Moises ti imana ket nagsipnget ti entero nga Egipto. Tallo nga aldaw a nakumotan ti pagilian iti napuskol a sipnget.

²³Saan a makapagkikinnita dagiti Egipcio, isu nga awan ti rimmuar iti balayna kabayatan dayta a tiempo. Ngem nalawag ti lugar a pagnaedan dagiti Israelita.

²⁴Inayaban ti ari ni Moises. Ket kinunana kadakuada, “Mabalinyon ti mapan agdaydayaw iti Apo. Itugotyo dagiti babbai ken ubbingyo, ngem mabati dagiti karnero, kalding ken bakayo.”

²⁵Kinuna ni Moises, “No kasta ngarud, masapul nga ikkannakami kadagiti animal a puoranmi nga idaton iti Apo a Diosmi.

²⁶Ngem kasapulan nga ikuyogmi dagiti animalmi; awan ti uray maysa a mabati. Ket pilienmi dagiti animal a pagdaydayaw iti Apo a Diosmi. Dimi pay ammo no ania dagiti idatonmi agingga a makadanonkami iti lugar a pagdaydayawanmi kenkuana.”

²⁷Pinatangken ni Yahweh ti puso ti ari ket dina impalubos a pumanaw dagiti Israelita.

²⁸Kinuna ti ari ken ni Moises, “Pumanawka ditoy ket saankan nga agpakpakita kaniak! Papapatayka iti kanito nga agpakitaka kaniak.”

²⁹“Matungpal ti bilinyo,” kinuna ni Moises, “saandakton a makita.”