Read Iloko Exodus 12 Bible Online

Exodus 12 - Iloko bible

Exodus 12

¹Nagsao ni Yahweh kada Moises ken Aaron idiay Egipto:

²“Manipud ita, daytoy a bulan ti umuna a bulan iti tawen para kadakayo.

³Ipakaammoyo iti amin nga umili iti Israel nga iti maika-10 nga aldaw iti daytoy a bulan, masapul a pumili ti ama ti familia iti urbon a karnero wenno urbon a kalding nga agserbi iti familiana.

⁴No bassit ti bilang ti maysa a familia ket dida maibus ti sangabukel nga urbon, mabalinda ti agkakalanglang iti kaarruba a familia a saan met a makaibus iti sangabukel nga urbon. Maibatay iti bilang dagiti agkakalanglang a mangsida iti natuno nga urbon iti kaadu ti makan ti tunggal maysa.

⁵Masapul a kalakian ti urbon, maysa ti tawenna, ken awan dadael wenno pakapilawanna. No awan ti karnero, mabalin ti kalding.

⁶Ipupokyo ti animal, ket iti karabiyan ti maika-14 nga aldaw ti bulan, aggigiddanto ti sangkapagilian nga Israel a patayen ti animalda.

⁷Mangalada iti dara dagitoy sada iwarsi iti agsumbangir a baotek ken iti ngatoen ti ruangan dagiti balbalay a pakasidaan dagiti animal.

⁸Iti dayta a rabii, masapul a maletson ti urbon ket maipangan ti karnena iti tinapay nga awan lebadurana ken iti nateng a napait.

⁹Diyo kilawen wenno angren ti aniaman a paset no di ket letsonenyo a sibubukel agraman ulo, dagiti saka ken dagiti lalaemna.

¹⁰Dikay mangipabigat iti uray ania; no adda matda, masapul a mapuoran.

¹¹Kastoyto ti pannanganyo: masapul a nakakaweskayo a kas agbiahe, sisasapatoskayo, sisasarukodkayo, ket darasenyo a kanen. Daytoy ti Fiesta ti Paskua a pammadayaw kaniak, ni Yahweh.

¹²Iti dayta a rabii, sursorekto ti Egipto ket papatayek ti amin nga inauna nga annak a lallaki iti pagilian, tao man wenno animal. Dusaekto ti amin a didiosen ti Egipto. Siak ni Yahweh.

¹³Agpaayto ti dara a kas pagilasinan: Labsakto dagiti amin a balbalay a makitak nga adda dara kadagiti baotekna. Awanto ti pakaan-anoanyo inton dusaek ti Egipto.

¹⁴Rambakanyo iti agnanayon dayta nga aldaw kas maysa a nasagradoan a fiesta a mangipalagip kadakayo iti inaramidko.”

¹⁵Kinuna ni Yahweh, “Pito nga aldaw a masapul nga awan lebadura ti tinapay a kanenyo. Iti umuna nga aldaw, masapul nga ikkatenyo ti amin a lebadura kadagiti balbalayyo. No adda mangan iti tinapay a nalebaduraan manipud iti umuna agingga iti maikapito nga aldaw, masapul a maisina iti Israel.

¹⁶Iti umuna nga aldaw, masapul nga adda nasantoan a panaggigimongyo; kastanto manen ti aramidenyo iti maikapito nga aldaw. Dikay agtrabaho kadagita nga aldaw, ngem mabalinyo ti agisagana iti kanenyo.

¹⁷Ngilinenyo daytoy a fiesta agsipud ta iti daytoy met la nga aldaw, inruarko dagiti amin a puliyo iti daga ti Egipto. Taginayonenyo a ngilinen a kas fiesta daytoy nga aldaw.

¹⁸Masapul a mangankayo iti tinapay nga awan lebadurana manipud iti rabii ti maika-14 nga aldaw ti umuna a bulan agingga iti rabii ti maika-21 nga aldaw.

¹⁹Iti las-ud ti pito nga aldaw, masapul nga awan ti masarakan a lebadura kadagiti balbalayyo. Ta no adda mangan iti tinapay a nalebaduraan, ganggannaet man wenno nayanak nga Israelita, saanton a maibilang a maysa kadagiti tattaok.”

²⁰

²¹Inummong ni Moises dagiti amin a panglakayen ti Israel. “Pumili ti tunggal maysa kadakayo iti urbon ti karnero wenno kalding ket patayenyo tapno rambakan ti familiayo ti Paskua,” kinunana kadakuada.

²²“Mangalakayo iti sanga ti hisopo, isawsawyo iti dara nga adda iti palanggana ket warsianyo dagiti baotek ken ti ngatoen ti ruangan dagiti balbalayyo. Agtalinaedkayo kadagiti balbalayyo agingga iti bigat.

²³Agsursorto ti Apo iti Egipto a mangpapatay kadagiti Egipcio. Makitananto ti dara kadagiti baotek, ket dinanto ipalubos a sumrek ti Anghel ni Patay iti balayyo tapno agpapatay.

²⁴Tungpalenyo dagitoy nga alagaden kas mataginayon a bilin kadakayo ken kadagiti annakyo.

²⁵Inton sumrekkayo iti daga nga inkari ti Apo nga ited kadakayo, masapul a rambakenyo daytoy a fiesta.

²⁶No saludsodento dagiti annakyo no ania ti kayat a sawen daytoy a seremonia,

²⁷ibagayonto kadakuada, ‘Daytoy ti daton iti Paskua a pammadayaw iti Apo, gapu ta linabsanna dagiti balay dagiti Israelita idiay Egipto. Nagpapatay kadagiti Egipcio ngem dinakami inan-ano.’” Nagparintumeng dagiti Israelita ket nagdaydayawda.

²⁸Kalpasanna, napanda inaramid ti imbilin ni Yahweh kada Moises ken Aaron.

²⁹Iti tengnga ti rabii, pinapatay ni Yahweh dagiti amin nga inauna nga annak a lallaki iti Egipto manipud iti anak ti ari nga agtawid iti trono agingga iti anak ti balud; napapatay met amin nga inauna nga annak dagiti animal.

³⁰Iti dayta a rabii, nariing ti ari, dagiti amin nga ofisialesna ken amin nga Egipcio. Adda napigsa a dung-aw iti entero nga Egipto gapu ta adda minatay iti tunggal balay.

³¹Iti dayta met la a rabii, pinaayaban ti ari da Moises ken Aaron. “Pumanawkayon, dakayo ken dagiti Israelita!” kinunana kadakuada. “Panawanyo ti pagiliak, ket inkayo agdaydayaw iti Apo a kas dinawatyo.

³²Alaenyo dagiti karnero, dagiti kalding ken dagiti bakayo ket pumanawkayon. Ikarkararagyo met ti pannakabendisionko.”

³³Dinagdag dagiti Egipcio a pumanaw dagiti Israelita iti pagilian. “Mataykam amin no dikay pumanaw,” kinunada.

³⁴Iti kasta, innala dagiti tattao ti ginamayda a masa nga awan lebadurana. Inkabilda iti paglutoan iti tinapay sada binalkot iti pagan-anayda ket imbaklayda.

³⁵Tinungpal dagiti Israelita ti bilin ni Moises. Dimmawatda kadagiti Egipcio iti alahas a pirak ken balitok ken iti kawes.

³⁶Intan-ok ni Yahweh dagiti Israelita ket nagraem kadakuada dagiti Egipcio. Intedda ti kinalikaguman dagiti Israelita. Kastoy ti panangipanaw dagiti Israelita iti kinabaknang dagiti Egipcio.

³⁷Manipud Rameses, nagrubbuat dagiti Israelita nga agturong idiay Succot. Adda agarup 600,000 a lallaki, malaksid dagiti babbai ken ubbing.

³⁸Adu pay dagiti sabali a tattao a nakikuyog kadakuada, agraman ti adu a karnero, kalding ken baka.

³⁹Nagaramidda kadagiti tinapay nga awan lebadurana iti masa nga inggapuda idiay Egipto. Kellaat ngamin ti pannakapapanawda ket awan tiempoda a nagluto iti kanenda wenno nangisagana iti masa nga adda lebadurana.

⁴⁰Uppat a gasut ken tallopulo a tawen a nagnaed idiay Egipto.

⁴¹Iti aldaw a naggibus ti 430 a tawen, pimmanaw dagiti amin a tattao ni Yahweh iti dayta a pagilian.

⁴²Iti daydi a rabii, nagpatpatnag a nagbantay ni Yahweh tapno iruarna ida idiay Egipto. Daytoy met la a rabii ti maidaton ken ni Yahweh iti amin a tiempo a kas rabii a masapul nga agbantay dagiti Israelita.

⁴³Kinuna ni Yahweh kada Moises ken Aaron, “Dagitoy ti alagaden iti Fiesta ti Paskua. Maiparit ti ganggannaet a mangan iti daytoy

⁴⁴ngem mabalin a mangan ti amin a nagatang a tagabu no la ket kugitenyo ida nga umuna.

⁴⁵Maiparit ti sangsangaili wenno mangmangged a mangan iti daytoy.

⁴⁶Masapul a kanenyo iti balay a nakaisaganaanna; diyo iruar iti balay. Ket diyo tukkolen ti uray ania a tulang ti animal.

⁴⁷Rambakan dagiti amin nga Israelita daytoy a fiesta.

⁴⁸No adda ganggannaet a makipagnaed kadakayo a mayat a mangrambak iti Paskua ni Yahweh, kugitenyo pay nga umuna dagiti lallaki iti familiana. Kalpasanna, mabalinna ti makipagrambak; maibilangto a kas Israelita. Ngem maiparit iti saan a kugit a mangan iti daytoy.

⁴⁹Agpaay daytoy nga alagaden iti nayanak nga Israelita ken iti ganggannaet a makipagnaed kadakayo.”

⁵⁰Tinungpal dagiti amin nga Israelita ti imbilin ni Yahweh kada Moises ken Aaron.

⁵¹Iti dayta nga aldaw, inruar ni Yahweh dagiti amin a puli dagiti Israelita idiay Egipto.