Read Iloko Exodus 13 Bible Online

Exodus 13 - Iloko bible

Exodus 13

¹Kinuna ni Yahweh ken ni Moises, “Idatonyo kaniak dagiti amin nga inauna nga annak a lallaki iti Israel. Kukuak ida, tao man wenno animal.”

³Kinuna ni Moises kadagiti tattao, “Laglagipenyo daytoy nga aldaw—ti aldaw nga ipapanawyo idiay Egipto, a nakatagabuanyo. Daytoy ti aldaw nga inruarnakayo ti Apo babaen iti dakkel a pannakabalinna. Dikay mangan iti tinapay nga adda lebadurana.

⁴Panawanyo ti Egipto ita nga aldaw, iti umuna a bulan, iti bulan ti Abib.

⁵Inkari ti Apo kadagiti kapuonanyo nga itedna kadakayo ti daga dagiti Cananeo, Heteo, Amorreo, Heveo ken Jebuseo. Nabaknang ken nabunga dayta a daga. Inton ipannakay iti dayta a daga, tinawen a rambakanyo daytoy a fiesta iti umuna a bulan.

⁶Iti las-ud ti pito nga aldaw, mangankay iti tinapay nga awan lebadurana; iti maikapito nga aldaw, agfiestakayo iti maipaay iti Apo.

⁷Pito nga aldaw a mangankayo iti tinapay nga awan lebadurana; masapul nga awan ti tinapay nga adda lebadurana wenno lebadura a masarakan iti dagayo.

⁸Inton mangrugi ti fiesta, ibagayo kadagiti annakyo nga aramidenyo daytoy kas panglagip iti panangispal ti Apo kadakayo idi impanawnakayo idiay Egipto.

⁹Agbalinto daytoy a fiesta a pakalaglagipan kas iti maiputipot iti imayo wenno iti mugingyo; ipalagipnanto kadakayo nga itultuloyyo a basaen ken adalen ti Linteg ti Apo, gapu ta inruarnakayo ti Apo idiay Egipto babaen iti dakkel a pannakabalinna.

¹⁰Tinawen a rambakanyo daytoy a fiesta iti naituding a tiempo.”

¹¹Intuloy ni Moises, “Ipannakayto ti Apo iti daga dagiti Cananeo nga insapatana nga ited kadakayo ken kadagiti kapuonanyo. Inton maitedna kadakayo dayta a daga,

¹²idatonyonto kenkuana ti amin nga inauna a lallaki. Kukua ti Apo ti amin nga inauna nga annak a lallaki dagiti animalyo.

¹³Ngem masapul a subbotenyonto ti amin nga inauna a kalakian nga urbon ti asno babaen iti panangidatonyo iti urbon a karnero. No diyo kayat a subboten, rungdoenyo ti tengngedna. Masapul a subbotenyo ti inauna a lalaki nga anakyo.

¹⁴Iti masakbayan, no saludsodento ti anakyo no ania ti kayat a sawen daytoy, kunayonto, ‘Babaen iti dakkel a pannakabalinna, inruarnakami ti Apo idiay Egipto, ti lugar a nakatagabuanmi.

¹⁵Idi impatangken ti ari ti Egipto a dinakami palubosan, pinatay ti Apo ti amin nga inauna nga anak a lalaki iti daga ti Egipto, tao ken animal. Daytoy ti gapuna nga idatontayo iti Apo ti amin nga inauna nga anak a lalaki dagiti animal, ngem subbotentayo ti inauna a lalaki nga anaktayo.’

¹⁶Agbalinto daytoy a pakalaglagipan, kas maysa a banag a maiputipot iti imatayo wenno iti mugingtayo; ipalagipnanto kadatayo nga inruarnatayo ti Apo idiay Egipto babaen iti dakkel a pannakabalinna.”

¹⁷Idi pinalubosan ti ari ti Egipto a pumanaw dagiti Israelita, saan nga inturong ti Dios ida iti dalan iti igid ti baybay nga agpa-Filistia, nupay as-asideg a pagnaenda. Kinuna ti Dios, “Diak kayat nga agbabawi dagiti tattao ket agsublida idiay Egipto inton maammoanda a masapul a makigubatda.”

¹⁸Inlikawna ida nga impan idiay let-ang nga agturong iti Nalabaga a Baybay. Siaarmas dagiti Israelita ket nakasaganada a makigubat.

¹⁹Intugot ni Moises dagiti tulang ni Jose ta pinagsapata idi ni Jose dagiti Israelita nga aramidenda ti kasta. “Inton ispalennakayo ti Dios,” kinuna idi ni Jose, “ket panawanyo daytoy a lugar, itugotyonto dagiti tultulangko.”

²⁰Pinanawanda ti Succot ket nagkampoda idiay Etam iti igid ti let-ang.

²¹Iti aldaw, indalan ida ni Yahweh babaen iti monmon nga ulep ket iti rabii, lawaganna ida babaen iti monmon nga apuy. Iti kasta, mabalinda ti magna iti aldaw ken iti rabii.

²²Adda latta ti monmon nga ulep iti sangoanan dagiti tattao iti aldaw ken ti monmon nga apuy iti rabii.