Read Iloko Exodus 14 Bible Online

Exodus 14 - Iloko bible

Exodus 14

¹Kinuna ni Yahweh ken ni Moises,

²“Pagsubliem dagiti Israelita ta mapanda agkampo iti sango ti Pihahirot iti nagbaetan ti Migdol ken ti Nalabaga a Baybay, iti asideg ti Baal Zefon.

³Ipagarupto ti ari ti Egipto a nayaw-awanda ket napupokda iti let-ang.

⁴Patangkenekto ti pusona ket kamatennanto ida. Maidaydayawakto iti panangparmekko kenkuana ken iti amin nga armadana. Maammoanto dagiti Egipcio a siak ni Yahweh.” Tinungpal dagiti Israelita ti naibilin kadakuada.

⁵Idi naibaga iti ari ti Egipto a nakapanawen dagiti Israelita, nagbaliw ti panunotna, kasta met dagiti ofisialesna ket kinunada, “Ania daytoy nga inaramidtayo? Impalubostayo a pumanaw dagiti Israelita ket ita, awandan a tagabutayo!”

⁶Pinaisagana ti ari ti luganna a pakigubat ken ti armadana.

⁷Nagrubbuat a kaduana ti amin a lugan a pakigubat agraman dagiti 600 a kasayaatan a lugan nga impanguloan dagiti ofisialesda.

⁸Pinatangken ni Yahweh ti puso ti ari ket kinamatna dagiti Israelita a pumampanaw a sibaballigi.

⁹Sinunson ida ti armada ti Egipto—dagiti amin a kabalio, dagiti lugan a pakigubat, ken dagiti nagkabalio a soldado. Nakamakamda dagiti Israelita iti kampoda iti igid ti Nalabaga a Baybay, iti asideg ti Pihahirot ken Baal Zefon.

¹⁰Idi makita dagiti Israelita ti ari ken ti armadana a kumamkamat kadakuada, kasta unay ti butengda ket immawagda ken ni Yahweh.

¹¹Kinunada ken ni Moises, “Apay pay laeng nga inyegnakami a matay ditoy let-ang? Awan aya ti pagitaneman idiay Egipto? Kitaem ti nagbanagan ti panangiruarmo kadakami iti Egipto!

¹²Sakbay a pimmanawtayo, imbagami kenkan a kastoy ti mapasamak! Kinunami idi a bay-annakami lattan a tagabu dagiti Egipcio. Naim-imbag a tagabukami sadiay ngem ti mataykami ditoy let-ang.”

¹³Kinuna ni Moises kadakuada, “Dikay agbuteng. Patibkerenyo ti pakinakemyo. Ita nga aldaw, makitayo ti panangisalakan ti Apo kadakayo. Diyonton makita dagiti Egipcio.

¹⁴Ti Apo ti makigubat ket awan nasken nga aramidenyo.”

¹⁵“Apay nga awagannak?” kinuna ni Yahweh ken ni Moises. “Bilinem dagiti Israelita nga ituloyda ti magna.

¹⁶Ilayatmo ta sarukodmo iti baybay. Mabingayto ti danumna tapno mabalin dagiti Israelita ti magna iti namaga a daga.

¹⁷Patangkenek iti kasta unay ti puso dagiti Egipcio tapno kamatenda ida. Maidaydayawakto iti panangparmekko iti ari, iti armadana, kadagiti luganna ken kadagiti nagkabalio a soldadona.

¹⁸Maammoanto dagiti Egipcio a siak ni Yahweh inton maparmekko ida.”

¹⁹Nagpalikud ti anghel ti Dios a magmagna iti sangoanan dagiti Israelita. Immalis met ti monmon nga ulep ket

²⁰nagyan iti nagbaetan ti armada dagiti Egipcio ken dagiti Israelita. Gapu iti ulep, nasipnget ti ayan dagiti Egipcio ngem nalawag ti yan dagiti Israelita, isu a nagpatpatnag a saan a nakapaginnasideg dagiti dua nga armada.

²¹Inlayat ni Moises ti imana iti baybay. Imbulos ni Yahweh ti napigsa nga angin manipud iti daya. Nagpatpatnag a nagang-angin agingga a nagmaga ti baybay. Nagbisngay ti danum,

²²ket limmasat dagiti Israelita iti namaga a lansad ti baybay. Nagbalin a pader dagiti danum iti agsumbangir.

²³Kinamat ida dagiti Egipcio ken dagiti amin a kabalio ti ari, dagiti lugan ken dagiti nagkabalio a soldadona. Sinurotda ida iti baybay.

²⁴Idi agbannawag, manipud iti monmon nga apuy ken ulep, tinannawagan ni Yahweh ti armada dagiti Egipcio ket pinagkakaribusona ida.

²⁵Tiningalanna ti pilid dagiti luganda ket narigat ti panaggunayda. Kinuna dagiti Egipcio, “Ti Apo ti kagubgubattayo, saan a dagiti Israelita. Pumanawtayo ditoy!”

²⁶“Ilayatmo ta imam iti baybay tapno agsubli ti danum, ket malapunosto dagiti Egipcio, dagiti luganda ken dagiti nagkabalio a soldadoda,” kinuna ni Yahweh ken ni Moises.

²⁷Inlayat ni Moises ti imana iti baybay ket idi aglawag, nagsubli ti danum iti sigud a kaadalemna. Kayat dagiti Egipcio a malisian ngem linemmes ida ni Yahweh iti baybay.

²⁸Nagsubli ti danum ket nalapunos dagiti lugan, dagiti nagkabalio a soldadona ken amin nga armada ti ari a simmurot kadagiti Israelita iti baybay. Awan ti uray maysa kadakuada a nakalasat.

²⁹Ngem namaga a daga ti nagnaan dagiti Israelita ta nagbalin a pader dagiti danum iti agsumbangir.

³⁰Iti dayta nga aldaw, insalakan ni Yahweh dagiti Israelita kadagiti Egipcio. Nakitada dagiti naiwalang a bangkay dagiti Egipcio iti igid ti baybay.

³¹Nagbutengda ken ni Yahweh idi nakitada ti dakkel a pannakabalin a pinangparmekna kadagiti Egipcio. Nagtalekda ken ni Yahweh, kasta met ken ni Moises nga adipenna.