Read Iloko Exodus 15 Bible Online

Exodus 15 - Iloko bible

Exodus 15

¹Kinanta ni Moises ken dagiti Israelita daytoy a kanta kas pammadayaw ken ni Yahweh: “Kantaak ti Apo gapu iti nadayag a balligina; inlemmesna iti baybay dagiti kabalio ken dagiti nagsakay.

²Ti Apo ti pigsak ken kantak; isu ti nangisalakan kaniak. Isu ti Diosko ket idaydayawko; isu ti Dios ti kapuonak ket itan-okko.

³Mannakigubat ti Apo; Yahweh ti naganna.

⁴“Intappuakna iti baybay ti armada ken luglugan a pakigubat ti Egipto; nalmes dagiti kalaingan nga ofisialesna iti Nalabaga a Baybay.

⁵Iti adalem a baybay nalmesda, limnedda a kas bato iti lansadna.

⁶“Napigsa ken mannakabalinka, O Apo; ta makannawan nga imam winarawarana dagiti kabusormo.

⁷Iti naindaklan a kinadayagmo, parmekem dagiti kabusormo; sumged ti pungtotmo ket puoranna ida a kasla garami.

⁸Imbulosmo ti angin iti baybay, ket pinagpangatom ti danum. Nagtakder a kas pader ti agay-ayus a danum, nagbalay ti danum agingga iti lansad.

⁹‘Kamatentay ida. Tiliwentay ida,’ kinuna ti kabusor. ‘Bingayentayo ti kinabaknangda ket alaentayo ti amin a kayattayo; asutentayo ti kampilantayo, ket alaentayo amin nga adda kadakuada.’

¹⁰Ngem iti maysa la a pug-awmo, Apo, nalmes dagiti Egipcio; kasda la buli a limned iti nakabutbuteng a danum.

¹¹“Siasino, O Apo, kadagiti didiosen ti kas kenka? Siasino ti umasping kenka iti nakaskasdaaw a kinasantom? Siasino ti pumada kenka nga agar-aramid iti milagro ken pagbutngan gapu kadagiti nakaskasdaaw nga aramidmo?

¹²Ilayatmo ta kannawan nga imam ket alun-onen ti daga dagiti kabusormi.

¹³Napudnoka iti karim, idalanmo dagiti inispalmo a tattao; babaen iti pigsam iturongmo ida iti nasantoan a taengmo.

¹⁴Agwaras ti damag ket agtigerger dagiti pagilian; uray dagiti Filisteo inda mapabutngan.

¹⁵Agbuteng dagiti pangulo ti Edom, agpigpigerger dagiti maingel ti Moab; mapukaw ti tured dagiti amin nga agnaed idiay Canaan.

¹⁶Buteng ken alliaw ti manglengnges kadakuada. Gapu iti kasta unay a pigsam, O Apo, kasda la bato a di makakuti, agingga a makalasat dagiti tattaom nga inispalmo iti pannakatagabuda.

¹⁷Ipanmo ida iti bantaymo ket ipasdekmo ida sadiay, iti lugar, Apo, a pinilim a pagnaedan, iti nasantoan a taeng nga impasdekmo.

¹⁸Agari ti Apo iti agnanayon nga awan inggana.”

¹⁹Nagna dagiti Israelita iti baybay iti namaga a daga. Ngem idi timmapog dagiti Egipcio agraman dagiti lugan ken dagiti nagkabalio a soldado, pinagsubli ni Yahweh ti danum a nanglemmes kadakuada.

²⁰Maysa a profeta ni Miriam a kabsat ni Aaron. Innalana ti panderetana, ket simmurot kenkuana dagiti amin a babbai nga agtuktokar kadagiti pandereta ken agsasala.

²¹Kinantaan ida ni Miriam: “Kantaanyo ti Apo gapu iti nadayag a balligina; inlemmesna iti baybay dagiti kabalio agraman dagiti nagsakay.”

²²Indauloan ni Moises dagiti Israelita iti ipapanawda iti Nalabaga a Baybay tapno mapanda iti let-ang ti Sur. Tallo nga aldawda a nagdaliasat iti let-ang. Awan ti masarakanda a danum.

²³Dimtengda iti maysa a disso a managan iti Mara, ngem nakapapait ti danum ket dida mainum. Isut' gapuna a napanaganan dayta a lugar iti Mara.

²⁴Nagdayengdeng dagiti tattao ken ni Moises. “Ania ti inumentayo?” sinaludsodda.

²⁵Sipapasnek ni Moises a nagkararag ken ni Yahweh ket impakita ni Yahweh kenkuana ti maysa a sanga. Innala ni Moises ti sanga sana impurruak iti ubbog ket nagbalin a mainum ti danumna. Sadiay ti nangsuotan ni Yahweh kadakuada, ket inikkanna ida iti maysa a linteg ken di agbaliw nga alagaden.

²⁶Kinunana kadakuada, “No ipangagyo a sipupudno ti ibagak, ni Yahweh a Diosyo, ket aramidenyo ti ibilangko a nalinteg, saankayto a dusaen iti uray ania a sakit nga impalak-amko kadagiti Egipcio. Siak ni Yahweh a mamaimbag kadakayo.”

²⁷Kalpasanna, dimtengda idiay Elim nga yan ti sangapulo ket dua nga ubbog ken pitopulo a puon ti palma. Nagkampoda iti igid ti danum sadiay.