Read Iloko Exodus 18 Bible Online

Exodus 18 - Iloko bible

Exodus 18

¹Nadamag ni Jetro, ti padi ti Midian ken katugangan ni Moises, ti amin nga impaay ti Dios ken ni Moises ken kadagiti Israelita idi inruar ni Yahweh ida idiay Egipto.

²Iti kasta, napan ni Jetro ken ni Moises. Intugotna ti asawa ni Moises, isu ni Sefora a nabati idi,

³agraman da Gersom ken Eliezer nga annakda ken Moises. (Napanaganan ti maysa iti Gersom gapu ta kinuna idi ni Moises, “Ganggannaetak idi iti sabali a daga.” Napanaganan met ti maysa iti Eliezer

⁴gapu ti kinuna ni Moises, “Ti Dios ni amak ti timmultulong kaniak ket inlisinak idi patayennak koma ti ari ti Egipto.”)

⁵Dimteng da Jetro, Sefora ken dagiti dua nga annak ni Moises iti bantay ti Dios iti let-ang a nagkampoan ni Moises.

⁶Pinakaammoanna ni Moises iti kaaddada isut' gapuna a

⁷rimmuar ni Moises a nangsabat iti katuganganna. Kinablaawanna sana inagkan. Nagpinnakomustada iti kasasaad ti salun-at ti tunggal maysa sada simrek iti tolda ni Moises.

⁸Imbaga ni Moises ken ni Jetro ti amin nga inaramid ni Yahweh iti ari ken iti amin nga Egipcio tapno ispalenna dagiti Israelita. Imbagana met kenkuana ti rigat a naglasatan dagiti tattao iti dalan ken no kasano ti panangilasat ni Yahweh kadakuada.

⁹Naragsakan ni Jetro a nakangngeg iti amin dagitoy

¹⁰ket kinunana, “Madaydayaw ti Apo a nangisalakan kadakayo kadagiti Egipcio ken iti ari! Madaydayaw ti Apo a nangispal kadagiti tattao iti panangtagabu dagiti Egipcio.

¹¹Ita, ammokon a nabilbileg ti Apo ngem dagiti amin a didiosen gapu iti panangispalna kadagiti Israelita iti kinaranggas dagiti Egipcio.”

¹²Nangidatag ni Jetro iti daton a mapuoran ken sabsabali pay a sakrifisio a maipaay iti Dios. Kimmuyog kenkuana ni Aaron ken dagiti amin a panglakayen ti Israel a napan iti nasagradoan a pannangan a naisagana a pagdaydayaw iti Dios.

¹³Iti sumuno nga aldaw, makumikom ni Moises iti panangrisutna kadagiti riri dagiti tattao. Nagmalmalem a napan kenkuana dagiti tattao.

¹⁴Idi makita ni Jetro a katuganganna ti amin nga asikasoen ni Moises, sinaludsodna, “Ania daytoy ar-aramidem para kadagiti tattao? Apay a bukbukodam ti mangasikaso kadagitoy ket agmalmalem nga umay ditoy dagiti tattao tapno makiumanda kenka?”

¹⁵Kinuna ni Moises, “Masapul nga aramidek daytoy agsipud ta umayda ammoen kaniak ti bilin ti Dios.

¹⁶No adda agriri, umayda kaniak, ikeddengko no siasino kadakuada ti husto ket ibagak dagiti bilin ken linteg ti Dios.”

¹⁷“Saan a husto ti ar-aramidem,” imbalakad ni Jetro.

¹⁸“Parparigatem laeng ta bagim, kasta met dagiti tattao. Dimo mabukodan daytoy a trabaho.

¹⁹Denggem ti naimbag nga ibalakadko ket tulongannakanto ti Dios. Masapul a sika ti dumatag iti Dios a kas pannakabagi dagiti tattao ket yumanmo kenkuana dagiti parikutda.

²⁰Masapul nga isurom kadakuada dagiti bilin ti Dios ket ilawlawagmo no kasano ti rumbeng a panagbiagda ken no ania ti nasken nga aramidenda.

²¹Ngem saan la a dayta. Pumilika met kadagiti makabael a lallaki. Dutokam ida a kas pangulo dagiti tattao; adda mangipangulo kadagiti rinibu, kadagiti ginasut, kadagiti saglilimapulo, ken kadagiti sagsasangapulo. Masapul a managbutengda iti Dios, mapagtalkan ken di mapasuksokan.

²²Agserbida a kas permanente a hues kadagiti tattao. Mabalin nga idatagda kenka dagiti narikut a kaso, ngem isuda ti makaammo a mangibanag kadagiti babassit a riri. Nalaklakanto ti trabahom ket mapalag-anankanto iti panangtulongda kenka.

²³No aramidem daytoy, kas ibilin ti Dios, dikanto marigatan ket agawidto dagiti tattao a naibanag dagiti parikutda.”

²⁴Tinungpal ni Moises ti imbalakad ni Jetro.

²⁵Nangpili kadagiti makabael a lallaki kadagiti amin nga Israelita. Dinutokanna ida a kas pangulo dagiti rinibu, dagiti ginasut, dagiti saglilimapulo, ken dagiti sagsasangapulo.

²⁶Nagserbida a kas permanente a hues kadagiti tattao. Ni Moises ti pangidataganda kadagiti narikut a kaso ngem isuda ti mangibanag kadagiti babassit a riri.

²⁷Kalpasanna, nagpakada ni Jetro ken ni Moises ket nagsubli iti ilina.