Read Iloko Exodus 2 Bible Online

Exodus 2 - Iloko bible

Exodus 2

¹Iti daydi a panawen, adda lalaki a nagtaud iti kaputotan ni Levi a nangasawa iti katribuanna.

²Nagsikog ti babai ket nangipasngay iti lalaki. Idi makitana a nalungpo ti ubing, inlemmengna iti las-ud ti tallo a bulan.

³Ngem idi dinan mailemmeng, nangala iti basket a naaramid iti runo ket pinastaanna iti alketran tapno saan a makastrek ti danum. Inkargana ti ubing iti uneg ti basket sana inkabil iti karunoan iti igid ti karayan.

⁴Iti saan unay nga adayo, nagtakder ti manang ti ubing tapno makitana ti mapasamak iti adingna.

⁵Iti saan a mabayag, simmalog ti babai nga anak ti ari ti Egipto tapno agdigos iti karayan. Nakitana ti basket iti karunoan ket pinaalana iti maysa kadagiti babbai nga agserserbi kenkuana nga agpagnapagna iti igid ti karayan.

⁶Idi luktan ti prinsesa ti basket, nakitana ti maysa nga ubing nga agsangsangit ket naasian. “Anak ti Hebreo daytoy!” kinunana.

⁷Immasideg ti manang ti ubing ket kinunana, “Apo, kayatmo kadi nga isapulanka iti Hebreo a mangtagibi iti dayta nga ubing?”

⁸“Sige, isapulannak,” insungbatna. Napan ngarud ti balasitang ket inayabanna ti ina ti maladaga.

⁹Kinuna ti anak ti ari iti ina, “Alaem daytoy nga ubing. Tagibiem a kas anakko ket tangdanankanto.” Innala ti ina ti maladaga ket tinagibina.

¹⁰Idi makadakkel bassit ti ubing, impanna iti prinsesa a nangibilang iti ubing a kas anakna. “Gapu ta inaonko iti danum daytoy nga ubing, panaganak iti Moises,” kinuna ti prinsesa.

¹¹Iti maysa nga aldaw, idi maysan nga agtutubo ni Moises, sinarungkaranna dagiti kadaraanna a Hebreo. Naimatanganna ti pannakaparparigatda. Nadagsen ti trabahoda. Nakitana ti maysa nga Egipcio a mangkabkabil iti maysa a Hebreo.

¹²Inwaras ni Moises ti panagkitana ket idi awan makitana a sabali a tao, pinatayna ti Egipcio sana inkali ti bangkay iti kadaratan.

¹³Iti sumuno nga aldaw, nagsubli ni Moises ket nakitana ti dua a Hebreo nga aggubgubal. “Apay a kabkabilem ti padam a Hebreo?” kinunana iti nakabasol.

¹⁴“Apay? Siasino kadi ti nangisaad kenka a mangituray ken mangukom kadakami?” insungbatna. “Patayennak met kadi a kas iti panangpataymo iti Egipcio?” Nagdanag ni Moises ket kinunana iti nakemna, “Naammoanda gayamen ti inaramidko.”

¹⁵Idi madamag daytoy ti ari, kayatna a patayen ni Moises, ngem nakalibas ni Moises ket napan nagnaed idiay Midian. Iti maysa nga aldaw, idi agtugtugaw ni Moises iti asideg ti maysa a bubon,

¹⁶dimteng ti pito a babbai tapno sumakdoda. Annak ida ni Jetro a padi ti Midian. Pinunnoda dagiti pagkargaan ti danum tapno painumenda dagiti karnero ken kalding ni amada.

¹⁷Ngem adda dagiti agpaspastor a dimteng ket pinapanawda dagiti babbai. Inarayat ida ni Moises sana pinainum dagiti animalda.

¹⁸Idi nagawidda, sinaludsod ni amada, “Apay a nasapakayo a simmangpet?”

¹⁹Kinunada, “Adda dagiti agpaspastor a nangpapanaw kadakami iti pagpainuman. Ngem tinulongannakami ti maysa nga Egipcio. Insakduannakami ken pinainumna pay dagiti animal.”

²⁰“Sadino ti ayanna?” sinaludsodna. “Apay a pinanawanyo? Inkay ayaban ta makipangan kadatayo.”

²¹Inkeddeng ni Moises ti agnaed sadiay. Impaasawa ni Jetro kenkuana ni Sefora nga anakna.

²²Nangipasngay ni Sefora iti maysa a lalaki. Gapu ta ganggannaet ni Moises iti sabali a daga, pinanagananna iti Gersom ti anakna.

²³Limmabas ti adu a tawen. Natay ti ari ti Egipto, ngem nagtuloy latta ti pannakaparigat dagiti Israelita gapu iti pannakatagabuda. Immasugda a patulongan iti Dios

²⁴ket impangagna ida; nalagipna ti tulagna ken ni Abraham, ni Isaac ken ni Jacob.

²⁵Nakitana ti kasasaad dagiti Israelita ket naasian kadakuada.