Read Iloko Exodus 21 Bible Online

Exodus 21 - Iloko bible

Exodus 21

¹“Ipaulogmo dagitoy a linteg kadagiti Israelita:

²No gumatangkayo iti lalaki a tagabu a Hebreo, agserbinto kadakayo iti innem a tawen. Iti maikapito a tawen, mawayawayaanto nga awan bayadanna.

³No awan asawana idi magatang, pumanawto met nga awan asawana. Ngem no adda asawana idi magatang, pumanawto agraman ti asawana.

⁴No ikkan ti amongna iti asawa ket aganak, kukua ti amongna ti asawana ken ti tunggal anakna. Ti lalaki laeng ti pumanawto.

⁵Ngem no dina kayat gapu ta ay-ayatenna ti amongna, ti asawa ken dagiti annakna, ket dina kayat ti mawayawayaan,

⁶ipanto ngarud ti amongna iti lugar a pagdaydayawan. Sadiay, pagtakderento ti amongna iti ruangan wenno iti baotek ti ruangan ket tebbengannanto. Ket tagabunanto agingga't tungpal biagna.

⁷“No ilako ti maysa nga ama ti anakna a babai a kas tagabu, saanto a mawayawayaan daytoy a kas iti pannakawayawaya ti tagabu a lalaki.

⁸No mailako iti agpanggep a mangasawa kenkuana ngem dinto kayat ti lalaki, masapul a sakaen met laeng ti amana. Awan kalintegan ti amongna a mangilako kenkuana kadagiti ganggannaet ta saan a nasayaat ti panangtratarna kenkuana.

⁹No gumatang ti maysa a tao iti babai a tagabu nga ipaasawana iti anakna, masapul nga ibilangna a kas bukodna nga anak.

¹⁰No mangasawa dayta a lalaki iti sabali, masapul nga ituloyna nga ited ti sigud a taraon, kawes ken kalinteganna.

¹¹No dina tungpalen dagitoy a pagrebbengan, masapul a wayawayaanna ti babai ket saanen a masapul nga agbayad ti babai iti pannakawayawayana.

¹²“Siasinoman a mangkabil iti maysa a tao a pakaigapuan ti ipapatayna, rumbeng met a mapapatay.

¹³No dina inggagara wenno pinanggep a patayen, mabalinna ti mapan agkamang iti lugar nga itudingkonto ket awanto ti pakaan-annoanna sadiay.

¹⁴Ngem no makapungtot ti maysa a tao ket igagarana a patayen ti sabali, masapul a mapapatay uray no agkamang iti altarko.

¹⁵“Siasinoman a mangkabil iti ama wenno inana, rumbeng a mapapatay.

¹⁶“Siasinoman a mangkidnap iti maysa a tao tapno ilako wenno tagabuenna, rumbeng a mapapatay.

¹⁷“Siasinoman a mangilunod iti ama wenno iti inana, rumbeng a mapapatay.

¹⁸“No adda agapa ket madunor ti maysa babaen iti bato wenno gemgemna, saan a madusa no saan a matay ti dinangranna. Ngem no maidalit ti nadangran,

¹⁹ket mabalinna ti bumangon ken magna uray no agsarukod, bayadan ti nakadunor dagiti aldaw a napukawna ken taripatoenna agingga nga umimbag.

²⁰“Siasinoman a mangpang-or iti tagabuna, lalaki man wenno babai, rumbeng a madusa no matay a dagus ti pinang-orna.

²¹Ngem no saan a matay ti tagabu kalpasan ti maysa wenno dua nga aldaw, saan a madusa ti amo ta umdasen a dusana ti pannakapukaw ti tagabuna.

²²“No adda agkakabil a lallaki ket masaktanda ti maysa a masikog a pakaigapuan ti pannakaalisna ngem awanen ti sabali a dunorna, mamulta ti nakadunor iti gatad nga ikeddeng ti asawa ti nadangran, kas mayannurot iti inkeddeng ti ukom.

²³Ngem no madunor ti babai, madusa ti nangdangran: biag iti biag,

²⁴mata iti mata, ngipen iti ngipen, ima iti ima, saka iti saka,

²⁵puor iti puor, sugat iti sugat, dunor iti dunor.

²⁶“No kabilen ti maysa a tao ti tagabuna, lalaki man wenno babai ket nabuldinganna, rebbengna a wayawayaan ti tagabu a kas bayad ti matana.

²⁷Ket no natuppolanna ti tagabu, rebbengna a wayawayaan a kas bayad ti ngipenna.

²⁸“No matay ti siasinoman a sangdoen ti baka, masapul a maubor ti baka agingga a matay ket saan a sidaen ti karnena; nupay kasta, saan a madusa ti akimbaka.

²⁹Ngem no sumasangdo ti baka ken napakdaaran ti akinkukua ngem dina ipupok, ket matay ti tao a sinangdona, maubor ti baka agingga a matay; mapapatay pay ti akinkukua.

³⁰Ngem no mapalubosan nga agmulta ti akimbaka tapno maispal ti biagna, bayadanna ti amin a naikeddeng a pagbayad.

³¹No ubing a lalaki wenno babai ti mapatay ti baka, daytoy met laeng a linteg ti masurot.

³²No tagabu a lalaki wenno babai ti mapatayna, agbayad ti akimbaka iti 30 a bagi ti pirak iti among ti tagabu ket mabato ti baka agingga a matay.

³³“No ikkaten ti maysa a tao ti kalub ti abut a pagurnongan iti danum wenno agkali iti sabali sa dina kaluban ket adda baka wenno asno a matnag ditoy,

³⁴masapul a bayadanna ti animal. Itedna ti kuarta iti akinkukua iti abut ket alaenna ti natay nga animal.

³⁵No ti baka ti maysa a tao patayenna ti baka ti sabali, mailako ti sibibiag a baka sada pagguduaan ti naglakoanda. Pagguduaanda met ti natay nga animal.

³⁶Ngem no ugali ti baka ti sumangdo ngem saan nga ipupok ti akimbaka, masapul a sukatanna iti sibibiag a baka, ket kukuana metten ti natay nga animal.