Read Iloko Exodus 22 Bible Online

Exodus 22 - Iloko bible

Exodus 22

¹“No takawen ti maysa a tao ti maysa a baka wenno karnero ken partienna wenno ilakona, lima a baka ti isukatna iti maysa a baka ken uppat met a karnero ti isukatna iti maysa a karnero.

²Masapul a bayadanna ti tinakawna. No awan ti pagbayadna, isu ti mailako. No ti natakaw nga animal, baka man wenno asno wenno karnero, ket masarakan a sibibiag iti ikutna, dua ti isukatna. “No matiliwan ti mannanakaw nga agtaktakaw iti rabii iti maysa a balay ket mapapatay, awan sungsungbatan ti pimmatay. Ngem no mapasamak daytoy iti aldaw, makabasol ti pimmatay.

⁵“No ipaarab ti maysa a tao dagiti animalna ket makabulosda sada mapan araben ti mula ti sabali a tao, masapul nga isukatna dagiti kasayaatan nga apit iti bukodna a talon wenno kaubasan.

⁶“No agpuor ti maysa a tao iti talonna ket agkayamkam ti apuy a mangsilmut kadagiti ruot iti talon ti sabali ket mapuoran dagiti dumakdakkel a trigo wenno dagiti pempen a dawa, masapul a bayadan ti nagpuor ti amin a nadadael.

⁷“No italek ti maysa a tao ti kuarta wenno aniaman a sanikuana iti sabali a tao ket matakaw dagitoy iti balay ti nagpaidulinanna, doble ti pagbayad ti matiliwan a nangtakaw.

⁸No saan a masarakan ti nagtakaw, maidatag ti nagpaidulinanna iti Dios ket isapatana a dina tinakaw dagiti sanikua.

⁹“Amin a kaso a pakaseknan iti sanikua, baka man wenno asno wenno karnero wenno pagan-anay wenno aniaman a napukaw, maipanda iti imatang ti Dios. Maidatag iti pagdaydayawan dagiti mangibaga a kukuada ti sanikua, ket ti siasinoman a sentensiaan ti Dios, doble ti bayadanna iti pudno nga agtagikua.

¹⁰“No umanamong ti maysa a tao nga aywananna ti asno wenno baka wenno karnero wenno uray ania nga animal ti sabali a tao, ket matay ti animal wenno masugatan wenno maitalaw, no awan ti makasaksi iti naaramid, masapul nga

¹¹agsapata ti nagan ti Apo iti disso a pagdaydayawan a dina tinakaw ti animal. No saan a natakaw ti animal, ibilang ti akinkukua a kas pukawna ket saan a masapul nga agbayad ti nangaywan.

¹²Ngem no matakaw ti animal, masapul nga agbayad ti agaywan.

¹³No pinatay dagiti narungsot nga animal, masapul nga ipakita ti agaywan ti narangrangkay nga animal a kas pammaneknek. Saan a nasken a bayadanna ti pinatay dagiti narungsot nga animal.

¹⁴“No buloden ti maysa a tao ti animal ti sabali ket masugatan wenno matay a saan a nakita ti akinkukua, masapul a bayadanna ti animal.

¹⁵Ngem no mapasamak ti kasta iti imatang ti akinkukua, saan a masapul nga agbayad ti nangbulod. No naabangan ti animal, umdas ti abangna a pagbayadna iti natay nga animal.

¹⁶“No sulisogen ti maysa a lalaki ti balasang a birhen a saan a naitulag a mayasawa ket kaiddaenna, masapul nga ikasarna ti babai kalpasan iti pannangtedna iti sab-ong.

¹⁷Ngem no madi ti ama ti babai nga ipaasawa ti anakna, masapul nga ited ti lalaki ti naituding a gatad ti sab-ong; yawatna daytoy iti ama ti babai.

¹⁸“Papatayenyo ti babai a manggagamud.

¹⁹“Papatayenyo ti siasinoman a makikaidda iti animal.

²⁰“Papatayenyo ti siasinoman nga agidaton iti uray ania a didiosen, ta siak laeng, ni Yahweh, ti pagidatonan.

²¹“Diyo ranggasan wenno idadanes ti ganggannaet. Laglagipenyo a ganggannaetkayo met idi idiay Egipto.

²²Diyo irurumen ti uray siasinoman a balo wenno ulila.

²³No aramidenyo ti kasta, siak, ni Yahweh, ipangagkonto ti asug dagiti agpatulong kaniak.

²⁴Sumgedto ti pungtotko ket patayenkayto iti gubat. Mabalonto dagiti assawayo ket maulilanto dagiti annakyo.

²⁵“No umutang kadakayo ti siasinoman a napanglaw a tattaok, diyo tultuladen ti usurero a paanakanna ti ipautangna.

²⁶No alaenyo ti kagay ti siasinoman a kas pangigawidyo iti utangna, masapul nga isubliyo sakbay a lumnek ti init;

²⁷ta dayta laeng ti pagimengna pangpapudot iti bagina. Anianto pay ti pagturogna? Inton umasug kaniak a patulongan, ipangagkonto agsipud ta manangngaasiak.

²⁸“Dikay agsao iti maibusor iti Dios ket diyo ilunod ti siasinoman a panguloyo.

²⁹“Itedyo kaniak a dagus dagiti daton nga agtaud iti apit, iti arak ken iti lanayo no tiempo ti panagited. “Itedyo kaniak ti inauna nga anakyo a lalaki,

³⁰agraman ti inauna a kalakian dagiti baka ken karneroyo; agyan pay laeng ti urbon iti inana iti las-ud ti pito nga aldaw ket maidaton kaniak iti maikawalo nga aldaw.

³¹“Dakayo dagiti tattaok, isu a dikay agsida iti karne ti animal a pinatay dagiti narungsot nga ayup. Itedyo ketdi dagitoy kadagiti aso.