Read Iloko Exodus 25 Bible Online

Exodus 25 - Iloko bible

Exodus 25

¹Kinuna ni Yahweh ken ni Moises, “Ibagam kadagiti Israelita a mangipaayda iti sagut kaniak. Awatem ti aniaman a sagut nga ited ti siasinoman.

³Dagitoy ti idatonda: balitok, pirak ken bronse;

⁴di pay naabel a de lana, a natayengteng nga asul, ube ken nalabaga ti marisda; nafino a linen, lupot a naaramid iti dutdot ti kalding;

⁵nakorte a lalat ti kalakian a karnero, nafino a lalat, ken kayo ti akasia.

⁶Mangidatonda met iti lana para kadagiti pagsilawan, dagiti bangbanglo a mailaok iti lana a pagkonsagrar ken iti naayamuom nga insenso;

⁷dagiti nangina a bato a karnelia ken dadduma a nangina a bato a pagtampok iti efod ken pektoral ti Kangatoan a Padi.

⁸Masapul a yaramidandak dagiti tattao iti santuario tapno agnaedak kadakuada.

⁹Aramidenyo ti tabernakulo ken ti amin nga alikamenna kas mayannurot iti plano nga ipakitak kenka.

¹⁰“Ibagam kadagiti tattao a mangaramidda iti Lakasa nga akasia; 45 a pulgada ti kaatiddog, 27 a pulgada ti kaakaba ken 27 a pulgada ti kangatona.

¹¹Kalupkopam iti puro a balitok iti uneg ken ruarna. Paikingam iti balitok iti aglikmut.

¹²Yaramidam iti uppat a pagyusokan a balitok ket ikabilmo ida kadagiti sakana a sagdudua iti agsumbangir.

¹³Mangaramidka kadagiti assiw nga akasia a kalupkopam iti balitok.

¹⁴Ikabilyo dagiti assiw kadagiti pagyusokan iti agsumbangir ti Lakasa.

¹⁵Diyo ikkaten dagiti assiw iti pagyusokan.

¹⁶Ikabilmo iti uneg ti Lakasa dagiti dua a tapi a bato a nakailanadan dagiti bilin nga itedkonto kenka.

¹⁷“Mangaramidka iti kalubna iti puro a balitok: 45 a pulgada ti kaatiddog ken 27 a pulgada ti kaakabana.

¹⁸Mangaramidka iti dua a sinan-kerubim iti napitpit a balitok,

¹⁹maysa iti agsumbangir a pungto. Aramidem dagitoy a sangsangkanayon iti kalub.

²⁰Agsinnangoda a nakaukrad dagiti payakda iti ngatoenda tapno malinongan ti kalub. Situturong dagiti rupada iti kalub.

²¹Ikabilmo iti uneg ti Lakasa dagiti dua a tapi a bato samonto iparabaw ti kalub a simbolo ti trono ti kaasi.

²²Sadiayto ti pangsarakak kadakayo. Iti ngatoen ti kalub ken iti nagbaetan dagiti dua a sinan-kerubim nga adda iti rabaw ti Lakasa, itedkonto kenka ti amin a bilinko nga annuroten dagiti Israelita.

²³“Mangaramidka iti lamisaan nga akasia 36 a pulgada ti kaatiddog, 18 a pulgada ti kaakaba ken 27 a pulgada ti kangatona.

²⁴Kalupkopam iti puro a balitok ket paikingam iti balitok ti aglikmutna.

²⁵Pagdawadawem iti aglikmut iti tallo a pulgada ti kaakabana ket paikingam iti balitok.

²⁶Mangaramidka iti uppat a balitok a pagyusokan ket ikapetmo kadagiti uppat a suli nga ayan dagiti sakana.

²⁷Ikabilmo dagiti pagkursongan ti assiw iti lamisaan iti asideg ti agdawadaw.

²⁸Akasia dagiti aramidem nga assiw a makalupkopan iti balitok.

²⁹Agaramidka kadagiti lunglongan a puro a balitok a pinggan, tasa, pitser, ken malukong a mausar kadagiti daton nga arak.

³⁰Maikabil ti lamisaan iti sango ti Lakasa ti Tulag ket iti rabaw ti lamisaan, masapul nga adda latta ti tinapay a maidaton kaniak.

³¹“Mangaramidka iti kandelero a puro a balitok. Aramidem ti puon ken ungkayna iti napanday a balitok. Sangsangkanayon iti kandelero dagiti arkosna a kimmopa a sabong ken busel.

³²Innem ti sangana—tallo iti agsumbangir—

³³ket masapul nga addaan ti tunggal sanga iti tallo a kimmopa a sabong a masukog a kas iti sabong ti almendras.

³⁴Yaramidam met ti ungkay ti kandelero iti uppat a kimmopa a sabong a kas kadagiti naikabit kadagiti sanga.

³⁵Masapul nga adda busel iti baba ti tunggal maysa kadagiti tallo a paris a sangsanga.

³⁶Sangsangkanayon dagiti busel ken dagiti sanga ken ti kandelero; maaramidda iti puro a napanday a balitok.

³⁷Mangaramidka iti pito a pagsilawan a maikabil iti kandelero ket isaadmo tapno agpasango ti lawagda.

³⁸Mangaramidka kadagiti sipit ken pagarsangan a puro a balitok.

³⁹Usarem ti 35 a kilogramo a puro a balitok a pangaramidmo iti kandelero ken amin dagitoy nga arruaten.

⁴⁰Kitaem ta aramidem dagitoy a kas mayannurot iti plano a naipakita kenka idiay bantay.