Read Iloko Exodus 26 Bible Online

Exodus 26 - Iloko bible

Exodus 26

¹“Aramidem ti akin-uneg a paset ti santuario, ti Tolda ti Dios, iti sangapulo a kurtina a naabel iti nalamuyot a linen ken de lana nga asul, ube ken nalabaga. Pabordaam dagitoy kadagiti imahen dagiti kerubim.

²Pagpapadaem ti rukod ti tunggal kurtina: 12 a metro ti kaatiddogna ken dua a metro ti kaakaba.

³Lima a kurtina ti pagsasaipem iti maysa a naig; kasta met ti aramidem kadagiti dadduma a kurtina.

⁴Yaramidam iti pagyusokan nga asul a lupot iti pingir iti akinruar dagiti dua a bengbeng a napagsasaip.

⁵Ikkam iti 50 a pagyusokan iti umuna a kurtina iti umuna a naig. Kasta met ti aramidem iti maudi a kurtina iti maikadua a naig.

⁶Mangaramidka iti 50 a balitok a kawit a mamagkamang kadagitoy dua a naig tapno sangsangkanayonda.

⁷“Mangaramidka iti linong ti Tolda ti Dios iti sangapulo ket maysa a pedaso a lupot a naabel iti dutdot ti kalding.

⁸Pagpapadaem ti rukodda: 13 a metro ti kaatiddog ken dua a metro ti kaakaba.

⁹Pagsasaipem ti lima a pedaso; kasta met ti aramidem kadagiti innem a pedaso. Kulpiem ti maikanem a pedaso tapno agdawatdaw iti sango ti Tolda ti Dios.

¹⁰Ikkam iti 50 a pagyusokan ti pingir ti maudi a pedaso iti maysa a naig; kasta met iti sabali a naig.

¹¹Mangaramidka iti 50 a bronse a kawit ket yusongmo kadagiti pagyusokan a mamagkamang kadagiti dua a naig tapno mabukel ti maysa nga abbong.

¹²Aguy-oy ti kagudua ti pedaso ti tolda iti likud ti Tolda ti Dios.

¹³Aguy-oy met kadagiti sikigan ti Tolda ti Dios ti kagudua a yarda a surok ti pedaso iti agsumbangir ti kaatiddog ti tolda tapno abbonganna ti tabernakulo.

¹⁴Mangaramidka iti dua nga abbong, maysa iti napalabbaga a lalat ti kalakian a karnero ket ti maysa iti nafino a lalat nga agpaay nga akinruar nga abbong.

¹⁵“Akasia dagiti aramidem a bastidor ti tabernakulo.

¹⁶Sangapulo ket lima a kadapan ti kaatiddog ken 27 a pulgada ti kaakaba ti tunggal bastidor.

¹⁷Ikkam iti dua nga agpada a sunta a mamagkamang kadagiti bastidor. Suntaam ti amin a bastidor.

¹⁸Mangaramidka iti 20 a bastidor a maikabil iti bangirna ti abagatan.

¹⁹Mangaramidka met iti 40 a pirak a pagbatayan dagiti bastidor; dua a pagbatayan ti tunggal bastidor ket dagitoy ti pagsaadan dagiti suntana.

²⁰Duapulo a bastidor ti aramidem para iti bangirna iti amianan.

²¹Mangaramidka pay iti 40 a pirak a pagbatayan; dua a pagbatayan iti tunggal tabla.

²²Para iti likudan ti Tolda iti bangirna iti laud, mangaramidka iti innem a bastidor

²³ken dua a bastidor a maikabil kadagiti nagsulian.

²⁴Agkakamang dagiti pasuli a bastidor iti umuna a pagyusokan, manipud iti baba agingga iti tuktok. Kastoy ti pannakaaramid dagiti dua a bastidor iti dua a suli.

²⁵Iti kasta, addanto walo a bastidor, agraman dagiti 16 a pirak a pagbatayanda, dua ti pagbatayan ti tunggal bastidor.

²⁶“Mangaramidka iti 15 a balunet a kayo nga akasia, lima para kadagiti bastidor iti maysa a bangir ti Tolda,

²⁷lima para kadagiti bastidor iti sabali a bangir, ken lima para kadagiti bastidor iti bangirna iti laud, iti likudan.

²⁸Masapul nga aglayon ti nagtengnga a balunet a naikapet iti nagtengngaan dagiti bastidor manipud iti maysa a pungto ti Tolda agingga iti sabali a pungto.

²⁹Kalupkopam dagiti bastidor iti balitok ket kaptam iti balitok nga argolia a mangtengngel kadagiti balunet a nakalupkopan met iti balitok.

³⁰Bangonem ti Tolda ti Dios a kas mayannurot iti plano a naipakita kenka iti bantay.

³¹“Mangaramidka iti kurtina iti nafino a linen a naabel iti delana nga asul, ube ken nalabaga. Bordaam kadagiti imahen dagiti kerubim.

³²Ibitinmo ti kurtina kadagiti uppat a poste a kayo nga akasia a nakalupkopan iti balitok; adda kawitda ken naisaad kadagiti uppat a pirak a pagbatayan.

³³Ibitinmo ti kurtina kadagiti naintar a kawit nga adda iti baba ti Tolda ket ikabilmo ti Lakasa ti Tulag a nakaidulinan dagiti tapi a bato iti likudan ti kurtina. Adda ti kurtina iti nagbaetan ti Nasantoan a Disso ken ti Kasasantoan a Disso.

³⁴Ikabilmo ti kalub iti rabaw ti Lakasa ti Tulag.

³⁵Iti Nasantoan a Disso, yapiringmo ti lamisaan iti Tolda iti bangirna iti amianan ken ti kandelero iti bangirna iti abagatan.

³⁶“Yaramidam met ti ruangan ti Tolda iti kurtina a gapuanan ti agborborda ken naaramid iti nafino a linen a naabel iti delana nga asul, ube ken nalabaga.

³⁷Yaramidam ti kurtina iti lima a poste nga akasia a makalupkopan iti balitok, ken makaptan kadagiti balitok a kawit. Mangaramidka iti lima a bronse a pagbatayan dagitoy a poste.