Read Iloko Exodus 27 Bible Online

Exodus 27 - Iloko bible

Exodus 27

¹“Mangaramidka iti altar a kayo nga akasia. Kuadrado ti altar: 7 1/2 a kadapan ti kaatiddogna, 7 1/2 a kadapan ti kaakaba, ken 4 1/2 a kadapan ti kangatona.

²Ikkam kadagiti sinan-sara nga agdawadaw kadagiti uppat a sulina ket sangsangkanayonda iti altar a makalupkopan met iti bronse.

³Mangaramidka kadagiti bronse nga alikamen ti altar: dagiti palanggana a pagikkan kadagiti dapu ti napuoran a taba, dagiti pala, malukong, pagadaw ken pagikkan iti beggang.

⁴Agaramidka met iti bronse a barandilias ket kabitam ti tunggal sulina iti argolia a pagbaklayan.

⁵Ikapetmo ti barandilias iti sirok ti agdawadaw a paset ti altar tapno danonenna ti gudua ti kangato ti altar.

⁶Mangaramidka kadagiti assiw nga akasia a makalupkopan iti bronse.

⁷No awitenyo ti altar, yusokyo dagiti assiw kadagiti argolia iti tunggal sulina.

⁸Tabla ti aramidem nga altar ket awan nagyan iti unegna, kas mayannurot iti plano nga impakitak kenka iti bantay.

⁹“Kas bakud ti Tolda ti Dios, agaramidka kadagiti kurtina iti nafino a linen. Iti bangirna iti abagatan, 50 a yarda ti kaatiddog dagiti kurtina,

¹⁰a maibitin kadagiti duapulo a bronse a poste a maipatakder kadagiti duapulo a bronse a pagbatayan. Pirak dagiti kawit dagiti poste ken dagiti pasikkilda.

¹¹Kasta met ti aramidem iti bangirna iti amianan ti bakud.

¹²Iti bangirna iti laud, 25 a yarda ti kaatiddog dagiti kurtina nga addaan sangapulo a poste ken sangapulo a pagbatayan.

¹³Iti bangirna iti daya, nga ayan ti ruangan, 25 a yarda ti kalawa ti mabakudan.

¹⁴Iti agsumbangir ti pagserkan, 7 1/2 a yarda ti kaatiddog dagiti kurtina ken addaan iti tallo a poste ken tallo a pagbatayan.

¹⁶Iti mismo a ruangan, adda kurtina a 10 a yarda ti kaatiddog. Nabordaan daytoy ken naaramid iti nafino a linen ken naabel iti de lana nga asul, ube ken nalabaga. Maibitinto iti uppat a poste a maisaad iti uppat a pagbatayan.

¹⁷Agkakamang dagiti amin a poste iti aglikmut ti paraangan babaen iti pasikkil a pirak. Pirak met dagiti kawitda ngem bronse dagiti pagbatayanda.

¹⁸Lima pulo a yarda ti kaatiddog ti paraangan, 25 a yarda ti kalawana, 2 1/2 a yarda ti kangatona. Nafino a linen ti aramidem a kurtina ket bronse dagiti pagbatayan.

¹⁹Pasig a bronse dagiti alikamen ti Tolda agraman dagiti pasok ti Tolda ken ti bengbeng.

²⁰“Ibilinmo kadagiti Israelita a mangyegda kenka kadagiti kasayaatan a puro a lana ti olibo para iti pagsilawan tapno rinabii a sigagangat.

²¹Ikabil ni Aaron ken dagiti annakna daytoy a pagsilawan iti Tolda ti Dios, iti ruar ti kurtina nga adda iti sango ti Lakasa ti Tulag. Sadiay, iti imatang ni Yahweh, agpatpatnag a sigagangat. Aramiden dagiti Israelita ken dagiti kaputotanda daytoy iti agnanayon.